ءبىر كۇنى تۇندە ويانا كەتىپ، ءومىردىڭ ماعىناسىز ەكەنىن الاسۇرا سەزىنەسىڭ - پاۋلو كوەلو
(پاۋلو كوەلونىڭ «ديۋ جانە سەنوريتا پريم» كىتابى) بۇل كىتاپتا ءار ادامنىڭ جان- دۇنيەسىندەگى نۇر مەن تۇنەكتىڭ كۇرەسى، بۇل كۇرەستىڭ، ءوز ارمانىنا ەرۋ، وزگەشە بولا الۋعا دەگەن ەرجۇرەكتىك، بىزگە ناعىز ءومىر كەشۋگە مۇمكىندىك بەرمەيتىن قورقىنىشتى جەڭۋ جولىندا اركىمنىڭ كۇندەلىكتى ارەكەتىمەن بايلانىسى شەبەر بەينەلەنگەن.
مەن ىلعي دا ادامنىڭ جانىنداعى جانە قوعامداعى ەڭ تەرەڭ وزگەرىستەر وتە قىسقا مەرزىمدەردە وتەدى دەپ سانادىم. ءبىز ونشا كۇتە قويماعان ساتتە ءومىر ءبىزدىڭ ەرجۇرەكتىگىمىز بەن ومىرىمىزدە وزگەرىستەر بولۋىن قالايتىنىمىزدى تەكسەرۋ ءۇشىن شاقىرۋ جاسايدى، جانە دە، ەشتەڭە بولماعانداي ءتۇر بىلدىرەدى، نەمەسە ءبىز وعان ءالى دايىن ەمەستىگىمىزدى ايتىپ قويا سالادى.
ءبىراق، ونداي شاقىرۋعا تەز ارادا جاۋاپ بەرە ءبىلۋ كەرەك. ءومىر كەرى ورالمايدى سوندىقتان ارتقا قارامايدى. مۇنداي جاعدايلاردا، ءارى كەتكەندە ءبىر اپتادا، ءوز تاعدىرىمىزدى قابىلدايمىز با، قابىلدامايمىز با، تەزىرەك شەشىمگە كەلۋىمىز كەرەك.
* * *
اۋليە ساۆيني دەپ اتالىپ كەتكەن ءبىر كىسى قالا سىرتىنداعى ۇڭگىردە ءومىر سۇرەدى ەكەن. ول كۇندىز ەل اراسىندا بولىپ، تۇنەمەگە ۇڭگىرىنە ورالادى ەكەن. ءبىر كۇنى ۇڭگىردە جالعىز تۇنەۋدەن جالىققان ول قالاعا كەلىپ احاب دەگەن اراپتىڭ ۇيىنە كەلىپ تۇنەپ شىعۋدى ءوتىنىپتى. احاب وڭىردەگى ەڭ قورقىنىشتى قانىشەردىڭ ءبىرى ەكەن.
- سەن مەنىڭ كىسى ولتىرگىش ەكەنىمدى بىلمەيسىڭ بە، نەگە كەلدىڭ؟ - دەپ سۇراپتى احاب.
- بىلەمىن، ءبىراق مەن ۇڭگىردە جالعىز تۇنەۋدەن شارشادىم. ءبىر ءتۇن تۇنەپ كەتەيىنشى - دەيدى ساۆيني.
اۋليەنىڭ اتاعى ءوز اتاعىنان كەم ەمەس ەكەنىن بىلەتىن احاب وعان تۇنەۋگە رۇقسات ەتىپتى، ءبىراق ول اتاق- داڭقتى وزىنشە تۇسىنەتىن ەدى، جانە ونى ەشكىممەن بولىسكىسى كەلمەيتىن، سول ءتۇنى ونى ءولتىرىپ تاستاۋدى، ءسويتىپ باسەكەلەسىنەن قۇتىلۋدى ويلاپتى.
ەكەۋى جاتار الدىندا ءبىراز اڭگىمەلەسىپتى. احاب اۋليەنىڭ سوزدەرىنىڭ تەرەڭدىگىنە، قيسىنىنا تاڭىرقاپتى، ءبىراق ول جاقسىلىق اتاۋلىعا سەنۋدەن قالعان ادام ەدى. اۋليەگە جاتاتىن توسەگىن كورسەتىپتى دە، ءوزى پىشاعىن قايراۋعا وتىرىپتى. اۋليە ۇيقىعا كەتكەنشە ونىڭ نە ىستەپ جاتقانىن قاراپ جاتىپ، ۇيىقتاپ كەتىپتى.
تاڭەرتەڭ ويانسا احاب پىشاعىن ءالى قايراپ وتىر ەكەن. اۋليەنىڭ ويانعانىن كورىپ، ول ەڭىرەپ جىلاپتى.
- سەن مەنەن قورىققان جوقسىڭ جانە مەنى ايىپتامادىڭ. ءتۇنى بويى وتىرىپ، مەنىڭ جاقسىلىق جاساي الاتىنىما، مەنىڭ دە بىرەۋگە تۇنەمەلىك ورىن بەرە الاتىنىما سەنگەن ادامدى ولتىرە المادىم - دەپتى.
وسى وقيعادان سوڭ احاب ءوزىنىڭ قاراقشىلىق جولىن ۇمىتىپ، وزگەرىپتى جانە وزگەلەردى دە دۇرىس جولعا باعىتتايتىن بولىپتى.
ول تۇراتىن قالا دا ىزگى قالاعا اينالىپتى.
* * *
الدىمەن، ۋادەلەرگە سەنۋ كەرەك. ال، بۇل عالامدا ول وتە كوپ: بايلىقتى ۋادە ەتەدى، جانىڭدى تازارتۋعا ۋادە بەرەدى، ولگەنىڭشە ماحابباتتان اينىماۋعا ۋادە بەرەدى. نە قالاساڭ سونىڭ ءبارىن ءۇيىپ- توگىپ قويۋعا دا سەندىرەتىن ادامدار بار. وسىعان ساي، ءوز ءومىرى وزگەرۋىنە بىرەۋ كەپىلدەمە بەرسە، سوعان يلانا كەتەتىن ادامدار دا كوپ. ۋادە بەرىپ، ونى ورىندامايتىن ادامدار تۇبىندە قاجىر- قايراتسىز، تۇككە ارزىمايتىن بولىپ كەتەدى. ارزان ۋادەگە سەنە سالاتىندار دا سولاي بولادى.
* * *
كەيبىر قىزدار ءبىرىنشى كەزدەسكەن اداممەن، ەگەر ول ونى وزىمەن بىرگە الىپ كەتەمىن دەسە، ونى جۇرەگى قالاپ تۇرماسا دا، ىلەسە كەتۋگە ءازىر. ولار تۇبىندە ءسۇيىپ كەتەرمىن، كوپ نارسەلەر سياقتى ماحاببات دەگەن دە ۋاقىتتىڭ قۇزىرىنا باعىناتىن نارسە عوي دەپ ويلايدى.
* * *
كەز- كەلگەن ادامزات بالاسى، قولايلى جاعداي تۋا قالسا، جاماندىق جاساي كەتۋگە بەيىم.
* * *
اتاعى بار نەمەسە اقشاسى كوپ ادام ءوز سۇراقتارىنا جاۋاپتى كىتاپتاردى اقتارىپ، ۋنيۆەرسيتەتتە ءدارىس الىپ، نەمەسە ءبىلىمى مولىراق بىرەۋلەردى جالداپ- اق تاۋىپ الا بەرەدى.
* * *
جولىنان اداسىپ، ساسىپ قالعان ادام، قونىس اۋدارسا ءوزىن قايتادان تابادى.
* * *
اۋىلدا تۇراتىن ادامدار وزدەرىن وركەنيەتتىڭ كەسىرىنەن اۋلاق تۇرۋ راحات دەپ سەندىرەدى، ءبىراق ولاردىڭ ءاربىرى اۋانى لاستايتىن ىعى- جىعى اۆتوموبيلدەردىڭ اراسىندا، ءيا بولماسا، ءاربىر قادامى قاتەرلى تاس دجۋنگليدە ءومىر سۇرسەك قايتەر ەدى دەپ قيالداۋدان تانبايدى. ونىڭ سەبەبى - ۇلكەن قالالاردىڭ شارۋالاردى تارتىپ تۇراتىن ماگيالىق اسەرى بولادى.
* * *
ادامدار ەكى جاعدايدا وزدەرىنىڭ ارماندارىنا جەتە المايدى: ەگەر ونىڭ ورىندالۋى مۇمكىن ەمەس بولسا جانە تاعدىر دوڭعالاعى بىردەن وزگەشە باعىت الىپ ارمانى ورىندالۋى مۇمكىن بولا كەتىپ، وعان ءوزى دايىن بولا الماي قالعاندا. ەكىنشى جاعدايدا ادامدا قايدا الىپ بارارى بەلگىسىز جول الدىندا، تۇسىنىكسىز جولعا شاقىرىپ تۇرعان ءومىر الدىندا، ۇيرەنىسىپ جانە قالىپتاسىپ قالعان نارسەنىڭ ءبارى ىدىراپ، ماڭگىلىك ءىزسىز- توزسىز جوعالىپ كەتۋ قاۋپى الدىندا قورقىنىش پايدا بولادى.
ادامدار ءبارىن دە وزگەرتىپ تاستاعىسى كەلىپ تۇرادى، جانە دە، سونىمەن بىرگە، بارلىعى بۇرىنعىداي قالپىندا قالا بەرسە دەپ ويلايدى.
* * *
الەمنىڭ ءبىر تۇكپىرىندە بولىپ- تولىپ وتىرعان، الدىنداعى تاماعىن شانىشقىمەن شۇقي باستاعان ادام ەشۋاقىتتا وسى قالپى كوپتەگەن ادامداردىڭ بەلى بۇگىلىپ ەڭبەكتەنىپ، جەردى ۇقساتىپ نەمەسە مال باعىپ، ولاردى جەم- شوپپەن قامتاماسىز ەتىپ، استىن تازالاپ تەر توگىپ جۇرگەنىنىڭ ارقاسىندا بولىپ جاتقانىن سەزىنبەيدى. شارۋالار ۇلكەن قالالاردىڭ تۇرعىندارىمەن سالىستىرعاندا ادامزات ءۇشىن كەرەگىرەك بولعانىمەن، وزدەرىن ەشتەڭەگە تۇرمايتىندار دەپ سانايتىنىنىڭ ءبىر سەبەبى سول.
* * *
جاقسىلىق پەن جاماندىقتىڭ بەتى بىرەۋ عانا. ءبارى ءبىزدىڭ جولىمىزدا ولار قاشان جولىعاتىنىنا بايلانىستى.
* * *
ءومىر - ەش ماعىناسىز باسەكە.
* * *
بارلىق ادام دايىن ۇلگىگە ساي سەزىنەدى جانە ويلايدى. بارلىعى دا وزدەرىنىڭ سەنەتىن نارسەلەرىنە عانا سەنەدى، باسقا ەشتەڭەگە سەنبەيدى. ولاردىڭ بارلىعىن ءوز ومىرلەرىن وزگەرتە الاتىن ساتتەردە قورقىنىش باۋرايدى. شىن جاقسىلىق دەگەن ىلعي قورقاق ادامدار تولىپ جۇرگەن جەردە دە، بىزدەر ءوزىمىزدى جاماندىقتان قورعاپ ءجۇرۋدى تىلەگەنىمىز ءۇشىن ءجابىر- جاپا تاراتۋشى جاراتۋشىنىڭ ءوزى تۇراتىن كوكتە دە جوق.
* * *
ومىردە بەلگىلى ءبىر پوزيتسيانى ۇستانۋعا قورقاتىندار كەڭپەيىلدى بولىپ كورىنۋگە تىرىسادى. بىرەۋگە قارسى تۇرىپ ءوزىڭنىڭ دۇرىستىعىڭدى قورعاۋدان گورى، ءوز ىزگىلىگىڭە سەنگەن جەڭىلىرەك. ەرجۇرەكتىك كورسەتىپ، مىقتى قارسىلاسپەن كۇرەسكە تۇسۋدەن، رەنىشتى جۇتىپ، نامىستانعانىڭدى ۇمىتا سالۋ اناعۇرلىم جەڭىل. قاشان بولسا دا ساعان لاقتىرىلعان تاس تيمەي جانىمنان ءوتىپ كەتتى دەۋگە بولادى، تەك سول رەنىشتەردى قابىلداعان كەزدەردەگى تۇندەردە عانا، وزىڭمەن ءوزىڭ قالعاندا ءوزىڭنىڭ قورقاقتىعىڭا مۇڭاياسىڭ.
* * *
بارلىعىمىز بارلىعىن باسقارىپ وتىرمىز دەپ ويلايمىز، شىن مانىندە ەشقايسىمىز ەشتەڭەنى دە باسقارىپ وتىرعانىمىز جوق.
* * *
ماقساتقا جۇمىلعان كوزبەن ۇمتىلۋعا بولمايدى.
* * *
توپاستاردىڭ ەكى ءتۇرى بار. بىرەۋلەرى باستاعان ءىسىن، قاتەردى سەزىنە قالعاندا، تاستاي سالادى. ەكىنشىلەرى قاتەر ارقىلى دا بىردەڭەلەرگە جەتۋگە بولادى دەپ سانايدى.
* * *
قارسىلاستى السىرەتۋدىڭ ەڭ تاماشا ءتاسىلى - ونىڭ جاعىندا ەكەنىڭدى سەزدىرىپ، جوسپارلارىمەن كەلىسۋ.
* * *
ءالى ۇڭگىرلەردە ءومىر ءسۇرىپ ءجۇرىپ- اق ادام قارۋ پايدالانا باستاعان، ول، اۋەلى تاماق تابۋ ءۇشىن قاجەت بولدى، ونىڭ ارتىنشا- اق قارۋدى باسقالاردىڭ ۇستىنەن بيلىك جۇرگىزۋ ءۇشىن قولدانا باستادى. الەم ءالى جەر وڭدەۋدى بىلمەيتىن، قولدا مال ۇستاپ، ونى پايدالانۋدى يگەرمەگەن كەزدە- اق، ءدىندى بىلمەي، مۋزىكاعا راحاتتانۋدى ۇيرەنە الماي تۇرىپ- اق، ادام كۇنىن قارۋسىز وتكىزە المايتىن بولىپتى.
* * *
ادامداردىڭ كۇندەلىكتى ءبىرىن- ءبىرى ءولتىرىپ جاتقانىنىڭ ءبارى، اينالىپ كەلگەندە، اقشا ءۇشىن بولىپ جاتىر.
* * *
ءبىر ادامنىڭ تاريحى - بۇكىل ادامزاتتىڭ تاريحى.
* * *
بيلىكشىلەر مەن ايلالىلار دار اعاشىن ويلاپ تابۋ ارقىلى ەرجۇرەكتىكتى - قورقاقتىققا، سەنۋدى - كۇدىكپەن قاراۋعا، تاۋەكەلشىل ادامدار تۋرالى تاريحتى - ماقۇلداي كەتەتىن سىبىرعا اينالدىردى.
* * *
ادامدار وزدەرىن قالاي بولۋى ءتيىس بولسا سولاي ۇستايتىنى، زاڭ تالاپتارىنا مويىنسۇنۋدان ەمەس، جازادان قورىققاننان كەلىپ شىققان. ءبىزدىڭ ءاربىرىمىزدىڭ بويىمىزدا دار اعاشى تۇر.
* * *
ءومىر ءسىز ويلاعاننان گورى كۇردەلىرەك ءارى بايىراق.
* * *
ادامنىڭ باسىنىڭ سول جاق جارتىسىندا سانا مەن قيسىن ورنالاسقان.
* * *
جاقسىلىق دەگەن جوق. جاقسىلىق جاساۋشى دەگەنىمىز - قۇبىجىقتىڭ ءبىر بەتى عانا. ادام وسىنى تۇسىنگەندە، ءبىزدىڭ الەم - قۇدايدىڭ قولىنداعى ويىنشىق قانا ەكەنىن تۇسىنەدى.
* * *
وتباسىنىڭ ۇلگىلى اكەسى، كىشكەنە بالالارىنىڭ كيىمدەرىن كيۋىنە جاردەمدەسىپ تۇرىپ، جۇمىسىندا جاس سۇلۋمەن كوڭىل قوسۋدى ويلاۋى مۇمكىن، ءبىراق ونى ايەلىنىڭ اشۋى عانا ۇستاپ تۇرادى. ايەلى دە جۇمىسقا شىققىسى جانە كوبىرەك تاۋەلسىزدىككە يە بولعىسى كەلەدى، ءبىراق ەرىنەن تايسالادى. ولاردىڭ بالالارى دا قورقىنىش پەن جازالى بولۋدان قاشىپ، وزدەرىن ءتارتىپتى ۇستايدى.
مىنا ءبىر، ساكىدە وتىرىپ، ۋايىمسىز قالىپتا كىتاپ وقىعان بولىپ وتىرعان قىز، بولاشاقتا جالعىز قالىپ قويماس پا ەكەنمىن دەپ قورقادى.
تەننيس راكەتكاسىن ۇستاعان مىنا جىگىتتىڭ دە جۇرەگى، اتا- انالارىمنىڭ ۇمىتىنەن شىعا الار ما ەكەنمىن دەپ قورقىپ وتىر.
باي كليەنتتەرگە كوكتەيل بەرىپ جاتقان مىنا وفيتسيانت تا كەز- كەلگەن ساتتە جۇمىسىمنان شىعارىپ جىبەرمەس پە ەكەن دەپ قورىققانىنان ءتارتىپتى.
مىنا ءبىر ستۋدەنت قىز بالەرينا بولعىسى كەلەدى، ءبىراق كورشىلەردىڭ وسەگىنەن قورقىپ ادۆوكات بولۋعا ازىرلەنىپ ءجۇر.
تەمەكى تارتۋ مەن ءسپيرتتى ىشىمدىك ءىشۋدى ۇناماعاننان كەيىن تاستادىم دەپ جۇرتتىڭ ءبارىن سەندىرىپ جۇرگەن مىنا شال دا، شىنىندا ءولىمنىڭ قورقىنىشى باسقاننان كەيىن سولاي ەتكەنىن جاسىرعىسى كەلەدى.
تەڭىز جاعالاۋىندا سۋ شاشىپ ويناپ، كۇلىپ بارا جاتقان، قول ۇستاسقان مىنا ەكى جاستا دا، سايىپ كەلگەندە، ءبىز دە قالتىراعان، قۋاتى تايعان، كورىكسىز شال مەن كەمپىرگە اينالامىز- اۋ دەگەن جاسىرىن قورقىنىش بار.
اۋلاقتاعى بىرەۋگە قولىن بۇلعاپ، ۋايىمسىز كورىنىپ تۇرعان، جاڭا عانا جۇرتتىڭ كوزىنشە قىمبات ماشينامەن كەلگەن، ءوڭى كۇنگە توتىققان مىنا ءبىر مىرزا دا، جاقىن ارادا بار بايلىعى كۇيرەپ، ونى قۇتقارۋدىڭ مۇمكىن بولمايتىنىن ويلاپ، ۋايىم شەگىپ تۇر.
قىزمەتكەرلەرىنە قاتاڭ تالاپ قوياتىن، ءوزى دە تىنىمسىز ەڭبەكتەنەتىن، كليەنتتەرى ريزا ءارى شات بولۋعا بار جاعدايدى جاساۋعا تىرىسىپ باعاتىن مىنا ءبىر وتەل قوجايىنى دا، قانشا ادال بولساڭ دا، ەسەپ- ساناقتان ءبىر كەمشىلىك تابا كەتەتىن شەنەۋنىكتەر كەزدەسە قالماسا ەكەن دەپ قورقادى.
* * *
ادامدا جاسىرىنىپ جاتقان ءبىر جارامسىز قىلىق تا بولۋى كەرەك، ونسىز ادام جەتىلە المايدى.
* * *
قۇداي ءوزىنىڭ سەنىمدى قۇلى «مەنى ۇمىتپادى ما ەكەن، كورىپ كەل» - دەپ، سايتاندى جىبەرىپتى.
سايتان بارىپ كەلىپ، «قۇلىڭا بار جاعدايدى جاساپ قويىپسىڭ، ارينە سوندىقتان ول سەنى ۇمىتپاپتى، ەگەر وعان بەرگەندەرىڭنىڭ ءبارىن الىپ قويساڭ عانا، ونىڭ كىم ەكەنىن بىلە الاسىڭ» - دەپتى.
قۇداي سولاي ەتىپتى. وزىنە سەنگەن ادامىنا بار باقىتسىزدىق پەن ازاپتى ءۇيىپ- توگىپتى. ادام بارىنشا ءتوزىپ باعىپتى، ءبىراق، بار يگىلىگىنەن ايىرىلىپ، جاقىندارى ءولىپ، دەنەسىن جارا باسىپ ازاپتانعان ءبىر كۇنى ءوزىن ازاپقا يتەرمەلەيتىن وركوكىرەكتىك جىبەرگەنى ءۇشىن قۇدايىنا ءتىلى ءتيىپتى. سوندا عانا قۇداي ونى بۇرىنعى جاقسى جاعدايىنا قايتا كەلتىرىپتى.
ادام ءوز تابيعاتىندا كۇناھار جانە وعان قۇداي بەرگەن قاسيەتتەر - قۇدايدىڭ قايىرىمى، جاقسى ءتارتىپ ءۇشىن بەرىلگەن سىي ەمەس. مەن وتە جاقسىمىن دەپ وركوكىرەكتىك تانىتا كەتسەك، ونىمىز ءۇشىن جازا الامىز.
سوندىقتان دا قۇداي «مەن ءوز قابىلەت- قارىمىممەن جاقسى دارەجەگە جەتتىم» دەپ ماستانعان قۇلىن اۋەلى تاۋبەسىنە كەلتىردى، سونى ءتۇسىنىپ وركوكىرەكتىگىنە وكىنگەن ساتتە كەشىردى. ءسويتتى دە بۇرىنعى قالپىنا قايتا ورالتتى.
ءوزىن- ءوزى اۋليە ساناعاندار قۇدايعا كۇپىرلىك كەلتىرەدى. ادام ءوز السىزدىكتەرى مەن كەمشىلىكتەرىن بىلە ءجۇرۋى ءتيىس.
* * *
ادام جۇرگەن جەرىنە، قورشاعان ورتاسىنا لايىق. ول ءۇشىن قۇداي ماعان ادىلەتسىز بولدى دەپ كۇپىرلىك ەتۋ ورىنسىز، ويتكەنى ول سوعان لايىق.
* * *
جاماندىق ەشۋاقىتتا سوڭىنان جاقسىلىق ىلەستىرىپ جۇرمەيدى.
* * *
كەدەيلىك پەن ادىلەتسىزدىكتى كورگەندە «مەن بار بولعانى توزاڭ مەن كۇل عانامىن» دەپ قايىرىمدىلىق جاسايمىن، جالقاۋلىق پەن بەكەرشىلىكتى كورگەندە «مەن قۇدايدىڭ جەردەگى كورىنىسىمىن» دەپ ولاردىڭ جاندارىنان ءوتىپ جۇرە بەرەمىن. ولاي ەتۋ ماعان زاتتىق جانە رۋحتىق الەم اراسىنداعى تەپە- تەڭدىكتى ساقتاۋعا جاردەم بەرەدى.
* * *
ءبىر كۇنى تۇندە ويانا كەتىپ، ءومىردىڭ ماعىناسىز ەكەنىن الاسۇرا سەزىنەسىڭ.
* * *
ول ادىلەتتى بولعىسى كەلگەن، ءبىراق اقىلدى ەمەس ەدى. اقىلدى بولعىسى كەلگەن، ءبىراق ساياساتكەر ەمەس ەدى. ساياساتكەر بولعىسى كەلگەن، ءبىراق وعان تاۋەكەلى جەتپەدى.
* * *
ەگەر ادامدى وزىڭە باعىندىرعىڭ كەلسە، وندا وعان قورقۋدى سەزىندىر.
* * *
جاس كەلە ءبىز ءبارىمىز ءولىمنىڭ كەلمەي قويمايتىنىن سەزىنەمىز. سوندىقتان ونى جايباراقات جانە اقىلمەن مويىنداۋدى ۇيرەنۋ كەرەك، سوندا ول ءبىزدى كەرەكسىز ۋايىم- قايعىدان ايىرادى.
* * *
جاقسىلىق پەن جاماندىقتىڭ كۇرەسى، بالكىم، ءار ادامنىڭ جۇرەگىندە ءاربىر سەكۋند سايىن ءجۇرىپ جاتاتىن بولار، ويتكەنى پەرىشتەلەر مەن سايتانداردىڭ كۇرەسى ءجۇرىپ جاتاتىن جەر - جۇرەك قوي.
* * *
ۇندەمەي قالۋ ىلعي دا كەلىسۋ بەلگىسى بولا بەرمەيدى، كەيدە ول ادامداردىڭ تەز ويلاپ، بىردەن شەشىمگە كەلە الماۋىن عانا بىلدىرەدى.
* * *
جۇماققا بارا قالعاندا دا، ادام وندا بارىپ قالعانىن تۇسىنبەي قالسا كەرەك. ولاي بولاتىنى ادامدار ەڭ قولايلى جەردە، راحات ورتاسىندا ءجۇرىپ تە ازاپ شەككىسى كەلەدى، ويتكەنى مۇنداي باقىتقا قايدان لايىق بولىپ قالدىم دەپ ويلايدى.
* * *
ادامنىڭ ءومىرى ءوزى قالاي وتكىزۋىنە بايلانىستى قىسقا نەمەسە ۇزاق بولۋى مۇمكىن.
اۋدارعان مىرزاگەلدى كەمەل