جاپونيادا قوناقۇيدە قىزمەت ەتەتىن روبوتتاردىڭ جارتىسى جۇمىستان شىعارىلدى
بۇل تۋرالى The Wall Street Journal باسىلىمى جازدى، دەپ حابارلايدى قازاقپارات.
2015 -جىلى جاپونيانىڭ ساسەبو ارالىندا اشىلعان قوناقۇي گيننەستىڭ رەكوردتار كىتابىنا روبوتتار قىزمەت ەتەتىن الەمدەگى العاشقى وتەل رەتىندە ەنگىزىلگەن بولاتىن.
«قازىرگە دەيىن قوناقۇي 243 روبوتتىڭ جارتىسىن جۇمىسقا جارامسىز دەپ تانىدى. ويتكەنى ولار قوناقتارعا قىزمەت ەتۋدە كوبىرەك قيىندىق تۋعىزعان»، - دەپ جازادى باسىلىم. قوناقۇيدىڭ باس مەنەدجەرى تاكەوسي وي تەحنولوگيا اتاۋلى ءتورت جىلدا ەسكىرىپ ۇلگەرەتىنىن ايتادى. ونىڭ سوزىنە قاراعاندا، قۇلتەمىرلەردى جاڭاسىنا الماستىرۋ تىم قىمباتقا تۇسەتىن كورىنەدى.
روبوتتار قوناقۇي تۇرعىندارىنا كادىمگىدەي قيىندىق تۋدىرعان. ماسەلەن، بولمەدەگى روبوت ۇيىقتاپ جاتقان ادامنىڭ قورىلىن تۇسىنبەي، «سىزگە قانداي كومەك قاجەت؟» دەپ وياتا بەرەتىن بولعان. ال وتەلگە ۋاقىتشا كەلەتىن قوناق روبوتتى قالاي ءسوندىرۋدى دە بىلمەيدى.
تەمىر قىزمەتكەرلەرگە تاعىلاتىن سىن كوپ. قوناقۇيدە 100 دەن استام بولمە بولسا، سونىڭ 20 سىنا عانا روبوتتار قوناقتاردىڭ قول جۇگىن اپارا الادى، ولار تەك تەگىس جەردە عانا قوزعالىپ، جاڭبىردىڭ سۋى تيسە بۇزىلىپ قالادى.
«ولار وتە جاي جۇرەدى، ەسەسىنە ىزىڭداپ مازاڭدى الادى. ەكى روبوت كەزىكسە، ءبىر- ءبىرىن اينالىپ وتۋگە «ميى» جەتپەيدى»، - دەپ شاعىمدانادى وتەل قوناقتارىنىڭ ءبىرى.