مۇزدان قاشالعان ەرتەگى

 استانا. قازاقپارات - كەيىپكەرلەرى ەلوردادا ءوتىپ جاتقان مۇزدان جاسالعان كوركەم تۋىندىلاردىڭ حالىقارالىق بايقاۋى اياقتالدى.

 قازاقستان، رەسەي، قىتايدان ارنايى اتسالىسقان 14 توپ نەبارى ءتورت كۇن ىشىندە شىعىس ەرتەگىسى كەيىپكەرلەرىن ناقىشىنا كەلتىرە قاشاپ شىقتى.

 قالاشىقتا شىعىس ەرتەگىلەرىنىڭ الۋان وبرازداعى كەيىپكەرلەرى مەن ءىشى گۇل- دەستەگە تولى مۇز مۇسىندەر جاعالاي ورنالاستىرىلعان. ودان ارىرەك اياق باسساڭىز ءتۇرلى- ءتۇستى اشەكەيلەرمەن بەزەندىرىلگەن مۇز كوپىر ارقاسىن توسادى. ساياباقتاعى «سەن تۇر، مەن اتايىن» دەگەندەي ءتۇرلى كورىنىستەگى مۇز مۇسىندەردىڭ قايسىسى بولسىن ەستەتيكالىق كۇش- قۋاتىمەن، تارتىمدىلىعىمەن تاڭداي قاقتىرادى. تاقىرىپتى اشۋ، جىلدامدىق، ورىنداۋ شەبەرلىگىنە قاراي قازىلار القاسىنىڭ تاڭداۋىمەن ۇزدىك جۇمىستار انىقتالدى. باس جۇلدەنى اقمولا وبلىسىنىڭ «دالالىقتار» توبى يەلەنسە، ءبىرىنشى ورىنعا قىتايلىق «حاربين» توبى لايىق دەپ تانىلدى. ەكىنشى ورىندى استانالىق «Astana ise master» توبى السا، قىتايدىڭ «گونكونگ» كومانداسى ءۇشىنشى ورىننان كورىندى. جۇلدەلى ورىن العان قاتىسۋشىلارعا اكىمدىك تاراپىنان 3 ميلليون تەڭگە كولەمىندە اقشالاي سىيلىقتار تارتۋ ەتىلدى. ەسىل اۋدانى اكىمى ورىنباسارىنىڭ مىندەتىن اتقارۋشى نۇرلان وماروۆ باستاما كەلەسى جىلى دا جالعاساتىنىن ايتادى.

 -  مۇز قالاشىعى شىعىس ەرتەگىسى ۇلگىسىندە جاسالدى. بۇل ءىسىمىز قالا تۇرعىندارى مەن قوناقتارىنا ۇنايدى دەگەن ۇمىتتەمىز. سوندىقتان اۋداندىق اكىمدىك شارانى داستۇرگە اينالدىرۋدى جوسپارلاپ وتىر، -  دەيدى نۇرلان وماروۆ. سونداي- اق بوتانيكالىق باقتىڭ اۋماعىندا بالالار مەن ەرەسەكتەرگە ارنالعان مۇز ايدىنى دا قاراستىرىلعان. وندا كونكيلەر مەن تيۋبينگتەر جالعا بەرىلەدى. ەندى كوكتەم كەلگەنشە ەلوردا قوناقتارى مەن تۇرعىندارىنا مۇز قۇرسانعان ساياباقتىڭ ەسىگى ايقارا اشىق.

ايا ءومىرتاي، «ەگەمەن قازاقستان»