قىزىلوردادا قالدىقسىز ءونىم شىعاراتىن زاۋىت ىسكە قوسىلدى

 قىزىلوردا. قازاقپارات - قىزىلوردا وبلىسى قارماقشى اۋدانىنا قاراستى ءدۇر وڭعار اۋىلىندا قالدىقسىز ءونىم شىعاراتىن زاۋىت ىسكە قوسىلدى، دەپ حابارلايدى قازاقپارات ءتىلشىسى.

اتالمىش زاۋىتتا كۇرىش شىعارىلادى. وندا تاۋلىگىنە 65 توننا ءونىم دايىنداۋعا مۇمكىندىك بار. كۇرىش قالدىعى دا قاجەتكە جارايدى. ودان مال ازىعى رەتىندە 3 ءتۇرلى ءونىم تۇتىنۋشىعا جول تارتادى.

 بۇرىنعى جىلداردا كۇرىش كەبەگى ەشبىر كادەگە جاراي قويمايتىن. ادەتتە، ول دالادا قوقىسقا اينالىپ نەمەسە ونى ديقاندار جاعىپ جىبەرۋگە ءماجبۇر بولاتىن. ەندىگى كەزەكتە مۇنداي ولقىلىققا جول بەرىلمەيدى. وسىنداي وڭدى ىستەردىڭ ناتيجەسىندە ەلدى مەكەندەگى 15 ادام كاسىپ كوزىن تاۋىپ وتىر. بۇل يگىلىكتى ءىستى اۋىلداعى «جاڭاجول» شارۋا قوجالىعى قولعا الدى.

 بىلتىر شارۋا قوجالىعى 3,2 مىڭ گەكتارعا كۇرىش ەكتى. ونىڭ ءار گەكتارىنان ورتاشا ەسەپپەن العاندا 74 سەنتنەردەن ءونىم كەلدى. ول سىر وڭىرىندە جوعارى كورسەتكىشتىڭ ءبىرى سانالادى.

«بۇرىنعى كۇرىش اقتايتىن ديىرمەننەن ايىرماشىلىعى كوپ. مۇندا فوتوسەپەراتور بار. قىزىل كۇرىشتەن اجىراتادى. ايتا كەتەرلىگى، ساعاتىنا 5 توننا كۇرىش شىعارۋعا ابدەن بولادى. ءونىمدى ەلىمىزدىڭ ءبىرقاتار وڭىرلەرىنە جىبەرىپ جاتىرمىز. كەلەشەكتە ەكسپورتقا شىعارۋدى جوسپارلاپ وتىرمىز» ، - دەدى شارۋا قوجالىعىنىڭ باس اگرونومى تولەۋ ەرعاليەۆ.