پەتروپاۆلدا اعىلشىن ءتىلى تەگىن وقىتىلادى

پەتروپاۆل. قازاقپارات - پەتروپاۆلدا اعىلشىن ءتىلى كۋرسىنا تىڭداۋشىلار قابىلدانىپ جاتىر. ءتىل مەڭگەرۋدى ماقسات ەتكەن قالا تۇرعىندارى اقپان ايىنان باستاپ بىلىمدەرىن تەگىن جەتىلدىرە الادى، دەپ حابارلايدى قازاقپارات ءتىلشىسى.

اعىلشىن ءتىلى كۋرسىن س ق و اكىمدىگىنىڭ تىلدەردى دامىتۋ باسقارماسىنىڭ «تىلدەردى وقىتۋ ورتالىعى» ك م م ۇيىمداستىرىپ وتىر. مۇنداي كۋرس بىلتىر دا جۇمىس ىستەگەن. 20 شاقتى ادام جازىلىپ، سونىڭ سەگىزى عانا سوڭىنا دەيىن وقىعان. مامانداردىڭ ايتۋىنشا، وعان سەبەپ - كۋرستىڭ تىم ۇزاققا، 8 ايعا سوزىلۋى.

«بيىلعى ەرەكشەلىگى - وقۋ كۋرسىنىڭ قىسقالىعىندا. تىڭداۋشىلار 2,5-اي وقيدى، ياعني 40 ساعاتتا اعىلشىن ءتىلىن قاراپايىم دەڭگەيدە ءبىلىپ شىعادى. ماسكەۋ ۋنيۆەرسيتەتىنىڭ پروفەسسورى د. پەتروۆتىڭ ءادىسىن قولدانامىز. ول وتىزدان ارتىق شەت ءتىلىن بىلەدى. عالىمنىڭ ايتۋىنشا، كەز كەلگەن ءتىلدى 16 ساعاتتا مەڭگەرىپ شىعۋعا»، - دەيدى «تىلدەردى وقىتۋ ورتالىعى» ك م م ديرەكتورىنىڭ ورىنباسارى ورال جاناتوۆ.

 اعىلشىن ءتىلى كۋرسى جاسى 18-دەن اسقان ەرەسەكتەرگە ارنالعان. كوبى جۇمىسباستى بولعاندىقتان، وقۋ اپتاسىنا ەكى رەت سارسەنبى جانە جۇما كۇندەرى كەشكى ساعات 18.30-دا باستالادى. ساباق 80 مينۋتقا شاقتالعان. ازىرشە تەك 10 ادام عانا وقۋعا تىلەك ءبىلدىرىپ، جازىلىپتى. ورتالىق جالپى جيىرما ادامعا دەيىن قابىلداۋعا قاۋقارلى. ال ءساۋىر ايىنىڭ ورتاسىنان باستاپ كەلەسى توپتى قابىلداپ، بازالىق ءبىلىم بەرمەك.

 تىلدەردى وقىتۋ ورتالىعىندا قازاق ءتىلىن دە تەگىن مەڭگەرۋگە بولادى. مامانداردىڭ ايتۋىنشا، بىلتىر پەتروپاۆلدىقتار تاراپىنان اعىلشىن ءتىلىن ۇيرەنۋگە سۇرانىس جوعارى بولسا، بيىل كەرىسىنشە. قازىردىڭ وزىندە 25 ادام قازاق ءتىلى كۋرسىنا جازىلىپ قويىپتى.

اۆتور: اقەركە داۋرەنبەك قىزى