قازاقستانداعى مەشىتتەر جاڭا تارتىپپەن سالىنادى

استانا. قازاقپارات - قازاقستان مۇسىلماندارى ءدىني باسقارماسى مەشىت سالۋدىڭ ارنايى ەرەجەسىن بەكىتتى، دەپ حابارلايدى قازاقپارات.

باسقارمانىڭ باسپا ءسوز قىزمەتىنىڭ حابارلاۋىنشا، ق م د ب عۇلامالار كەڭەسى بەكىتكەن قۇجات «قازاقستان رەسپۋبليكاسىندا تيپتىك جوباداعى مەشىت عيماراتىن سالۋدىڭ ءتارتىپ ەرەجەسى» دەپ اتالادى.

 «بۇل ەلىمىز بويىنشا تيپتىك جوباداعى مەشىت عيماراتىن سالۋدىڭ ءتارتىبىن قالىپتاستىراتىن نەگىزگى قۇجات. ەرەجە ق ر «ءدىني قىزمەت جانە ءدىني بىرلەستىكتەر تۋرالى» زاڭىنا، «ق ر ساۋلەت، قالا قۇرىلىسى جانە قۇرىلىس قىزمەتى تۋرالى» زاڭى مەن وزگە دە نورماتيۆتىك قۇقىقتىق اكتىلەرگە، سونىمەن قاتار ق م د ب جارعىسىنا سايكەس ازىرلەندى. بۇدان بىلاي مەشىت عيماراتى جەرگىلىكتى جاماعاتتىڭ سانىنا وراي 3 دەڭگەيدە سالىنادى: اۋىلدىق (سىيىمدىلىعى 70-500 ادام)، اۋداندىق (سىيىمدىلىعى 500-1500 ادام)، وبلىستىق، قالالىق (سىيىمدىلىعى 1000-5000 ادام) »، - دەلىنگەن حابارلامادا.

ەرەجەگە سايكەس، بولاشاقتا جاڭادان سالىناتىن مەشىتتىڭ قۇرىلىسى زاماناۋي تالاپقا ساي جانە عيماراتتىڭ كورىكتى بولۋى شارت. مەشىت سالۋدا زاماناۋي وزىق ۇلگىلەرى مەن يسلامنىڭ جانە جەرگىلىكتى ساۋلەت ونەرىن ايشىقتارىن پايدالانۋ مىندەتتى. ودان بولەك، مەشىتتىڭ مۇناراسى، كۇمبەزى جانە ىشكى- سىرتقى بەزەندىرىلۋى جەرگىلىكتى داستۇرگە ساي بولۋى ءتيىس.

 «سونىمەن قاتار، قابىلداعان قۇجات بويىنشا، مەشىت جەرگىلىكتى جاماعاتتىڭ سانىنا لايىقتاپ سالىنادى. بۇعان قوسا، مەشىت اۋلاسىنا اۆتوتۇراق، ساياباق، ت. ب. قاجەتتى نىساندار تۇرعىزىلماق. مەشىت قۇرىلىسىنا ساپالى جانە ۇزاق مەرزىمگە جارايتىن ماتەريالداردى پايدالانۋ تالاپ ەتىلەدى. قاۋىپسىزدىك شارالارىن ساقتاۋ ماقساتىندا ارنايى قۇرىلعىلار دا ورناتىلادى»، - دەپ حابارلايدى قمدب.

ايتا كەتسەك، وتكەن جىلى ەلىمىز بويىنشا 38 مەشىت پايدالانۋعا بەرىلدى. ال جالپى رەسپۋبليكا بويىنشا بۇگىندە  2626 مەشىت حالىققا قىزمەت ەتەدى.

اۆتور: داۋلەت ىزتىلەۋ