بيلەر كەڭەسى تۋرالى ەرەجە قابىلداندى

ورال. قازاقپارات - بيلەر كەڭەسى تۋرالى ەرەجە قابىلداندى، دەپ حابارلايدى قازاقپارات ءتىلشىسى.

ب ق و- دا بيلەر كەڭەسىن قۇرۋ جونىندەگى جۇمىستاردىڭ ۇيلەستىرۋشىسى، وبلىستىق سوتتىڭ سۋدياسى ەسەنباي بورانبايەۆتىڭ ايتۋىنشا، بۇل رەتتە ەلباسى ن. ءا. نازاربايەۆتىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» باعدارلامالارىنىڭ نەگىزگى قاعيدالارى باسشىلىققا الىندى.

ق ر جوعارعى سوتىنىڭ «تاتۋلاسۋ: سوتقا دەيىن جانە سوتتا» جوباسىن جۇزەگە اسىرۋ ماقساتىندا جانە ب ق و سوتى مەن ب ق و اكىمى اراسىنداعى ءوزارا ىنتىماقتاستىق تۋرالى 2016 -جىلعى 22 - ساۋىردەگى مەموراندۋم نەگىزىندە باتىس قازاقستان وبلىسىنىڭ سۋديالار قاۋىمداستىعى بيلەر كەڭەسى تۋرالى ەرەجە جوباسىن دايىنداعان بولاتىن.

وسى ەرەجە جوباسى باتىس قازاقستان وبلىسىنىڭ اكىمىنىڭ 2019 -جىلعى 11 - قاڭتارداعى №4 شەشىمىمەن ماقۇلداندى.

ەرەجەگە سايكەس بيلەر كەڭەسى «رۋحاني جاڭعىرۋ» اياسىندا ۇلتتىق كود رەتىندە قازاقتىڭ بيلەرىنىڭ ءداستۇرىن جاڭعىرتۋ، قوعامداعى بىرلىك پەن ىنتىماقتىقتى ناسيحاتتاۋ، داۋلاسۋشىلىق دەڭگەيىن تومەندەتۋ، قۇقىق بۇزۋشىلىققا توزبەۋشىلىك پەن ونىڭ الدىن الۋ ماسەلەلەرى بويىنشا، سالت، عۇرىپ، وزىق داستۇرلەردى ساقتاۋ جونىندەگى اۋىلدىق، اۋداندىق، قالالىق اكىم جانىنداعى كەڭەسشى ورگان بولىپ تابىلادى.

ەرەجەمەن بيلەر كەڭەسىنىڭ نەگىزگى مىندەتتەرى، قۇرۋ ءتارتىبى، بيلەر كەڭەسىنىڭ قىزمەتىن ۇيىمداستىرۋ جانە قىزمەتىنىڭ توقتاتىلۋى تۋرالى ماسەلەلەر رەتتەلگەن.

2019 -جىلدىڭ 1 - قاڭتارىنا دەيىن وبلىستاعى 12 اۋداننىڭ 10 ىنداعى 95 اۋىلدىق وكرۋگتە بيلەر كەڭەستەرى قۇرىلىپ، ناقتى ىسكە كىرىسىپ، ءوز جۇمىستارىن اتقارۋدا. قۇرىلعان بيلەر كەڭەسىنىڭ ارالاسۋىمەن وتكەن جىلى 14 داۋ قارالىپ، شەشىمىن تاپتى. بەكىتىلگەن ەرەجە بيلەر كەڭەسىنىڭ جۇمىستارىن جانداندىرۋعا جاڭا سەرپىن بەرەدى.

«بۇل ەرەجە قازاقستاندا تۇڭعىش رەت قابىلدانىپ وتىر» ، دەدى قازاقپارات تىلشىسىنە ەسەنباي بورانبايەۆ.

ەسكە سالا كەتەيىك، بۇدان بۇرىن ب ق و- دا بيلەر كەڭەستەرىنىڭ قۇرىلىپ جاتقانى جونىندە جازعان بولاتىنبىز.