اتامەكەنگە ورالعان اعايىننىڭ جاعدايى - ءجىتى نازاردا
ماقالادا ايتىلعان وزەكتى ماسەلەنىڭ شەشىمىن تابۋدى جۇكتەگەن ەلباسى نۇرسۇلتان نازاربايەۆتىڭ تاپسىرماسىنا سايكەس، قوستاناي وبلىسىنىڭ باسشىلىعى تومەندەگى جايتتى حابارلادى.
ماقالادا وزبەكستاننان رۋدنىي قالاسىنا كوشىپ كەلگەن ىقتيار مەن شارگۇلدىڭ (قۇجات بويىنشا - يحتيەر سارسانوۆيچ تۋحتيبايەۆ، شاريگۋل كالكامانوۆنا نۋرماحانوۆا - رەد. ) وتباسى ورالمان مارتەبەسىن العانىمەن، جارتى جىلداي جۇمىسقا ورنالاسا المايتىنى، ونىڭ نەگىزگى سەبەبى ورالمان مارتەبەسىن العاننان سوڭ ءۇش ايدىڭ ىشىندە ىقتيارحات، ودان كەيىن تاعى ءۇش ايدان سوڭ ازاماتتىق بەرىلەتىنى، ال جەكە زەينەتاقى شوتىن اشتىرۋ ءۇشىن جەكە كۋالىك پەن جەكە سايكەستەندىرۋ ءنومىرىن ۇسىنۋى كەرەكتىگى ايتىلعان بولاتىن. ياعني، ولار «حالىقتىڭ كوشى- قونى تۋرالى» زاڭنىڭ 23-بابى 2-تارماعىنىڭ 5-تارماقشاسىندا ورالمانعا «قازاقستان رەسپۋبليكاسىنىڭ زاڭناماسىنا سايكەس جۇمىسپەن قامتۋعا جاردەمدەسۋ قامتاماسىز ەتىلەدى» دەپ كورسەتىلگەنىمەن، «زەينەتاقىمەن قامسىزداندىرۋ تۋرالى» زاڭ مەن ەڭبەك كودەكسىنىڭ تالاپتارىنا سايكەس جۇمىس ىستەي الماي وتىر. وسى ورايدا اتالعان ماقالادا ايتىلعان وزەكتى ماسەلەنىڭ شەشىمىن تابۋدى جۇكتەگەن ەلباسى نۇرسۇلتان نازاربايەۆتىڭ تاپسىرماسىنا سايكەس، قوستاناي وبلىسىنىڭ باسشىلىعى تومەندەگى جايتتى حابارلادى.
قىسقاشا توقتالار بولساق، ءۇش بالاسى بار بۇل وتباسى ورالمان مارتەبەسىن 2018 -جىلدىڭ 31 - قازانىندا العان. جۇمىسقا ورنالاسۋعا كومەك كورسەتۋ ماسەلەسىمەن رۋدنىي قالاسىنىڭ جۇمىسپەن قامتۋ ورتالىعىنا جۇگىنبەگەن. ال كوشى- قون قىزمەتىنە تۇرعىلىقتى جەرىندە قالدىرۋ تۋرالى ءوتىنىشحاتتى 2018 -جىلدىڭ 30 - قاراشاسىندا بەردى. ش. ك. نۇرماحانوۆا ءۇي- جايدى جيناپ، تازالاۋشى رەتىندە جۇمىسقا ورنالاسۋ ماسەلەسىمەن رۋدنىي يندۋستريالدىق ينستيتۋتىنا جۇگىنگەن بولاتىن. ءبىراق زەينەتاقى شوتىنىڭ جوقتىعى سەبەپتى ولار جۇمىسقا ورنالاستىرۋدان باس تارتتى. جەكە زەينەتاقى شوتىن اشۋ جونىندە «ب ج ز ق» ا ق وبلىستىق فيليالىنا جۇگىنگەنىمەن، قازاقستان رەسپۋبليكاسى ازاماتىنىڭ نەمەسە قازاقستان رەسپۋبليكاسىندا تۇراقتى تۇراتىن شەتەلدىكتىڭ/ازاماتتىعى جوق ادامنىڭ جەكە باسىن كۋالاندىراتىن قۇجاتىن ۇسىنباۋى سەبەپتى، ولار دا باس تارتتى. ال قوستاناي وبلىسى پوليتسيا دەپارتامەنتىنىڭ كوشى- قون قىزمەتى باسقارماسى تۇرعىلىقتى جەردە قالدىرۋ تۋرالى ءوتىنىشحاتتى 2018 -جىلعى 29 - جەلتوقساندا قاناعاتتاندىردى. ازاماتتار ي. س. تۋحتيبايەۆ، ش. ك. نۇرماحانوۆا جانە ا. س. تايباعاروۆا «شەتەلدىك ازاماتتىڭ تۇرۋعا ىقتيارحاتى» كۋالىكتەرىمەن قۇجاتتاندىرىلدى. ي. س. تۋحتيبايەۆتى زايىبىمەن 2018 -جىلعى 29 - جەلتوقساندا وبلىس اكىمى قابىلداپ، ولارعا جۇمىسقا ورنالاسۋ مۇمكىندىگى، اتاۋلى الەۋمەتتىك كومەك تاعايىنداۋ جانە بارلىق تيەسىلى سۋبسيديالاردى تولەي وتىرىپ، ورالمانداردى قابىلداۋدىڭ وڭىرلىك كۆوتاسىنا ەنگىزۋ تۋرالى ءتۇسىندىرىلدى.
قازىرگى ۋاقىتتا ي. س. تۋحتيبايەۆتىڭ وتباسىنا اعىمداعى جىلعى قاڭتار ايىندا تۇرعىن ءۇيدى جالداۋ جانە كوممۋنالدىق قىزمەتتەردى وتەۋ ءۇشىن رۋدنىي قالاسىنىڭ دەمەۋشىلەرى 35 مىڭ تەڭگە كولەمىندە كومەك كورسەتتى. سونداي- اق 20 مىڭ تەڭگە كولەمىندە تاماق ونىمدەرىن ساتىپ الۋ ارقىلى ماتەريالدىق كومەك كورسەتىلدى. سونىمەن بىرگە اكىمدىكتىڭ حاتىندا ي. س. تۋحتيبايەۆتىڭ اعىمداعى جىلعى قاڭتار ايىندا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 -جىلدارعا ارنالعان «ەڭبەك» مەملەكەتتىك باعدارلاماسى اياسىندا قوعامدىق جۇمىستارعا جىبەرىلەتىنى، سونداي- اق زايىبى ش. ك. نۇرماحانوۆا مەن قىزى ا. س. تايباعاروۆاعا جۇمىسقا ورنالاسۋدىڭ بىرنەشە نۇسقاسى ۇسىنىلعانى ايتىلعان. بۇل ماسەلەنى «ەگەمەن قازاقستان» گازەتى الداعى ۋاقىتتا ءجىتى نازارىندا ۇستايدى.