مەن قازىر قورقىت اتا كىتابىن ءتۇپ نۇسقادان اۋدارىپ جاتىرمىن - مىرزاتاي جولداسبەكوۆ
دەپ حابارلايدى قازاقپارات ءتىلشىسى.
«قازاقستان پرەزيدەنتى نۇرسۇلتان نازاربايەۆتىڭ «ۇلى دالانىڭ جەتى قىرى» ەڭبەگىندەگى يننوۆاتسيالىق تۇجىرىمدامالار» تاقىرىبىندا وتكەن دوڭگەلەك ۇستەلدە مىرزاتاي جولداسبەكوۆ ۇلت تاريحىن تۇگەندەۋ ءۇشىن قانداي ەڭبەك اتقارىلىپ جاتقانىن ايتتى. دوڭگەلەك ۇستەل ق ر ب ع م مەملەكەت تاريحى ينستيتۋتىنىڭ ۇيىمداستىرۋىمەن استانادا ءوتىپ جاتىر.
«ەلباسىمەن تاياۋدا مەن دە كەزدەستىم. سوندا ەلباسى «ماقالانى وقىدىڭىزدار، ەندىگى كەزەكتە نە ىستەپ جاتىرسىزدار؟ » دەپ سۇرادى. مەن نە ىستەپ جاتقانىمدى سىزدەرگە ايتىپ وتەيىن. بىزدە دەرەكتانۋ عىلىمى دامىماي قالعان. «اناۋ ايتتى نەمەسە مىناۋ ايتتى» دەي بەرەمىز. تاريحتىڭ ءبارىن دە اينالىپ كەلگەندە جاسايتىن - ءوزىمىز، ياعني حالىق. شەجىرەگە سۇيەنگەنىمىزبەن، ناقتى دەرەكتەرگە باسا ماڭىز بەرۋىمىز كەرەك. بۇرىنعى تاريحتان ايىرىلىپ قالا جازدادىق. ەندى جىلاپ كورىسىپ جاتىرمىز. كەزىندە ەلباسىنا تاۋەلسىزدىك داۋىرىندە مەملەكەتتىڭ شەجىرەسىن جاسامايمىز با دەگەن ەدىم. مەملەكەت باسشىسى سول كەزدە قولداۋ ءبىلدىرىپ، 14 تومىن شىعارىپ، تۇساۋكەسەرىن وتكىزگەن ەدىك. اقىرى ونىڭ ەلۋ تومىن دا شىعاردىق»، - دەيدى مىرزاتاي جولداسبەكوۆ.
مىرزاتاي جولداسبەكوۆ ءوز سوزىندە اشحابادقا بارعان ساپارىن ەسكە الدى.
«ول جاقتا كەرەمەت ءبىر سۋرەت سالىنىپتى. مۋزەيدىڭ جانىندا «كۇلتەگىن تۇرىكمەن»، «تونىكوك تۇرىكمەن» - ءبارى دە تۇرىكمەن ەكەنى جازىلعان. مەن ونىسىن قىزعانعانىم دا جوق، جازعانى دا دۇرىس شىعار، ءبىراق «اتتەگەن- اي، ءبىز وسىنى ايتا الماي وتىر ەكەنبىز عوي» دەپ ويلادىم. ويتكەنى، كەزىندە ماعجان اقىننىڭ ءوزى دە قاراشاڭىراق قازاققا قالعانىن ايتقان عوي. مەن، ماسەلەن، سوناۋ جەتىنشى عاسىرداعى ورحون ەسكەرتكىشتەرىن زەرتتەگەن اداممىن. وسى ۋاقىتقا دەيىن ءبىر ادام بۇل سوزىمە قارسى كەلگەن جوق: ويتكەنى، ونىڭ (جوعارىدا اتالعان تاريحي تۇلعالاردىڭ - اۆت. ) ءبارى دە قازاق. سول كەزدىڭ وزىندە «ارتىق ايتىپ وتىرسىڭ» دەگەن اكادەميك اعالارىمىز بولدى»، - دەيدى قوعام قايراتكەرى.
مىرزاتاي جولداسبەكوۆ ءوز سوزىندە قورقىت اتادان قالعان، ون ءۇشىنشى عاسىردا جازىلعان كىتاپ بارىن اتاپ ءوتتى. ونىڭ ءبىر نۇسقاسى ۆاتيكان كىتاپحاناسىندا، ەكىنشىسى درەزدەن كىتاپحاناسىندا ساقتالعان.
«درەزدەن كىتاپحاناسىندا ساقتالعان نۇسقاسى قىپشاق تىلىندە جازىلعان. ونى الدىمەن ورىستار، ودان كەيىن تۇرىكتەر، ازەربايجاندار مەن تۇرىكمەندەر اۋدارعان. قازاقشا دا اۋدارىلعان. ءبىراق، ول اۋدارما ورىس تىلىندەگى اۋدارمادان كوشىرىلگەنىن اتاپ ءوتۋ كەرەك. سوندىقتان، مەن قازىر قورقىت اتا كىتابىن (تىكەلەي - اۆت.) اۋدارىپ جاتىرمىن. بيىل اياقتايمىن دەگەن ويدامىن»، - دەدى مىرزاتاي جولداسبەكوۆ.
اۆتور: ايان بەكەن ۇلى