ۇكىمەت وتاندىق كولىك ماركاسىن جاساپ شىعارۋدى تاپسىردى

استانا. قازاقپارات - قازاقستاننىڭ اۆتوبيزنەس قاۋىمداستىعى وتاندىق كولىك ماركاسىن ازىرلەۋگە كىرىستى، دەپ حابارلايدى قازاقپارات ءتىلشىسى.

ۇيىم باسشىسى اندرەي لاۆرەنتيەۆتىڭ ايتۋىنشا، شەتەلدىك ينۆەستورلار دا قازاقستاندىق كولىكتىڭ ماركاسىنا قارجى سالۋعا دايار.

«قازىرگى كەزدە ءبىز وسى ماسەلەنى جان-جاقتى زەردەلەپ جاتىرمىز. ماسەلەن، قىتايلىق «Jac» كومپانياسى قازاقستاندىق برەندتى جاساپ شىعۋعا مۇددەلى. سوعان قارجى قۇيۋعا دا دايىن. ول وزبەكتىڭ «Uz-Daewoo»  نەمەسە رەسەيلىك «Lada» سياقتى وتاندىق كولىك ماركاسى بولادى. وسى سالاداعى جۇمىس ناقتى قاي ۋاقىتتا اياقتالاتىنىن ايتا المايمىن. دەگەنمەن، تاپسىرما بار. ۇكىمەت تە ناقتى مىندەت قويدى. ەڭ باستىسى، ينۆەستورلار تاراپىنان قىزىعۋشىلىق بار. بالكىم، الداعى ۋاقىتتا قازاقستاندىقتارعا قۋانىشتى حاباردى جەتكىزىپ قالارمىز»، - دەدى ا. لاۆرەنتيەۆ استانادا وتكەن باسپا ءسوز ءماسليحاتىندا.

ونىڭ سوزىنە قاراعاندا، ازىرشە وتاندىق كولىك ماركاسىنا قاتىستى ناقتى اتاۋلار جوق. «Jac» كومپانياسى تاراپىنان ۇسىنىس بولدى. ەندى ونى قولعا الىپ، ىسكە اسىرۋ قاجەت.

«وسى سالاداعى جۇمىس ەندى باستالدى دەۋگە بولادى. ازىرشە، ناقتى ءبىر نارسە ايتۋ قيىن. وتاندىق ماركاعا قاتىستى اتاۋلار دا جوق. شىنىمدى ايتسام، وسى ماسەلەگە قاتىستى اقپاراتتىڭ ەگجەي-تەگجەيىن ايتا المايمىن»، - دەپ اتاپ كورسەتتى ا. لاۆرەنتيەۆ قازاقپارات تىلشىسىنە بەرگەن سۇحباتىندا.

ايتا كەتەيىك، بۇگىن قازاقستاننىڭ اۆتوبيزنەس قاۋىمداستىعى وتكەن جىلدىڭ قورىتىندىسىن شىعاردى. ۇيىمنىڭ ۆيتسە-پرەزيدەنتى انار ماقاشيەۆانىڭ ايتۋىنشا، وتكەن جىلى قازاقستاندىقتار 60 مىڭ جاڭا كولىكتى ساتىپ الدى. سونىڭ تەڭ جارتىسى - ءوز ەلىمىزدە قۇراستىرىلعان اۆتوموبيلدەر. جالپى، قازاقستان حالقى جاڭا كولىكتەردى ساتىپ الۋعا 547 ميلليارد تەڭگەنى جۇمسادى. بۇل 2017-جىلمەن سالىستىرعاندا 24 پروتسەنتكە ارتىق.