قازاقستاندا سيريادان قايتارىلعان ادامدارعا قاتىستى فيلم ءتۇسىرىلۋى مۇمكىن

None
None
استانا. قازاقپارات - پارلامەنت ءماجىلىسىنىڭ دەپۋتاتى قۋانىش سۇلتانوۆ «جۋسان» وپەراتسياسى نەگىزىندە دەرەكتى، پاتريوتتىق تاربيەدەگى كوركەم فيلم ءتۇسىرۋ تۋرالى ۇسىنىس جاسادى.

وسىعان بايلانىستى ق ر پرەمەر-ءمينيسترى باقىتجان ساعىنتايەۆتىڭ اتىنا دەپۋتاتتىق ساۋال جولداندى، دەپ حابارلايدى قازاقپارات.

«جاڭا جىلدىڭ العاشقى اپتاسى ق ر پرەزيدەنتى نۇرسۇلتان ءابىش ۇلى نازاربايەۆتىڭ سيريادان ءبىزدىڭ ەلدەن الداۋ جولدارىمەن شىعارىلعان جانە تەرروريستەردە تۇتقىندا بولعان 11 ايەل، 30 بالا بارلىعى 47 ادامنىڭ ءوز وتانىنا قايتارىلۋى بويىنشا «جۋسان» گۋمانيتارلىق وپەراتسياسىنىڭ ءساتتى اتقارىلعانى تۋرالى ەرەكشە ءارى جۇرەككە جىلى تيەتىن مالىمدەمەسىمەن ەستە قالدى. پرەزيدەنت مۇنداي قايىرىمدىلىق ءارى گۋمانيزم اكتىسىنە باستاماشى بولۋ ارقىلى قازاقستان ازاماتتارىنىڭ قاي جەردە بولسا دا ولاردىڭ تاعدىرىنا دەگەن قامقورلىعى مەن الاڭداتۋشىلىعىن كورسەتتى. وپەراتسيا قالاي دايىندالعاندىعى جانە قانداي قيىندىقتار مەن قاۋىپ-قاتەرلەردى وتكەرگەندىگى تۋرالى ماعلۇمات تەك پرەزيدەنت پەن ناقتى ورىنداۋشىلارعا عانا ءمالىم، مۇنىڭ ءوزى قۇرمەتكە لايىق»، - دەپ توقتالدى قۋانىش سۇلتانوۆ.

وسى ورايدا ول ەڭ باستىسى - ادامدار، ءبىزدىڭ وتانداستارىمىز قۇتقارىلعانىن اتاپ ءوتتى.

«ال ءبىزدىڭ جاستاردىڭ ساناسى كينوزالداردىڭ، ەلەكتروندىق قۇرىلعىلاردىڭ ەكراندارىنان پاتريوتيزمنەن باسقا قاجەتسىز نارسەنىڭ بارلىعىمەن اياۋسىز ۋلانىپ جاتىر. مەملەكەت باسشىسىنىڭ ارنايى تاپسىرماسىمەن جوعارى دەڭگەيدە جۇزەگە اسىرىلعان قازاقستاندىق ازاماتتاردى قۇتقارۋ وپەراتسياسى سەكىلدى ەرەكشە وقيعالار وسكەلەڭ ۇرپاققا پاتريوتتىق تاربيە بەرەتىن جوعارى كوركەمدىك كينو تۇسىرۋگە تاماشا سيۋجەت بولار ەدى»، - دەدى دەپۋتات.

وسىعان بايلانىستى ق. سۇلتانوۆ بىرنەشە ۇسىنىسىن جاريالادى.

بۇل رەتتە مەملەكەتتىك تاپسىرىس بويىنشا «جۋسان» وپەراتسياسى نەگىزىندە شىتىرمان وقيعالى، دەرەكتى، پاتريوتتىق تاربيەدەگى كوركەم فيلم ءتۇسىرۋ قاجەتتىگى ايتىلدى.

«پرەزيدەنتتىڭ ۇستىمىزدەگى جىلدى جاستار جىلى دەپ جاريالاۋىنا بايلانىستى جاستاردىڭ رۋحاني جانە پاتريوتتىق تاربيەسى جالپى مەملەكەتتىك مۇددە بولعاندىقتان، جاستاردىڭ پاتريوتتىق ءارى رۋحاني تاربيەسىنىڭ كەشەندى جوسپارى مەن شارالارىن قاراستىرۋ ءجون بولار ەدى»، - دەدى ول.

ەستەرىڭىزگە سالا كەتەيىك، جاقىندا قازاقستان پرەزيدەنتى نۇرسۇلتان نازاربايەۆ قازاقستان ازاماتتارىن سيريادان ەۆاكۋاتسيالاۋعا بايلانىستى مالىمدەمە جاساعان بولاتىن. مەملەكەت باسشىسى ءوز سوزىندە اتاپ وتكەندەي، 6- قاڭتاردا قۇقىق قورعاۋ ورگاندارى مەن سىرتقى ىستەر مينيسترلىگى جۇرگىزگەن گۋمانيتارلىق شارا ناتيجەسىندە سيريادان 47 ازاماتىمىز، سونىڭ ىشىندە 30 بالا ەلىمىزگە قايتارىلعان.

سوڭعى جاڭالىقتار