كوزگە جاس كەلتىردى: مەيرامبەك بەسبايەۆ ەرنار ايدارمەن بىرگە جانتەبىرەنتەرلىك بەينەبايان ءتۇسىردى

 استانا. قازاقپارات - ەرنار ايداردىڭ بالا ارمانى ورىندالدى. حيتمەن ەلىمىزگە بەلگىلى ءانشى مەيرامبەك بەسبايەۆپەن دۋەت ورىنداپ، بىرىگىپ بەينەبايان ءتۇسىردى.

جانتەبىرەنتەرلىك تۋىندى كوپشىلىكتى بەي-جاي قالدىرمادى، دەپ جازادى Stan.kz.

بۇل - مەيرامبەك پەن ەرناردىڭ ەكىنشى دۋەتى. وسىدان جارتى جىل بۇرىن قوس ونەر يەسى «سەن جوقتا» اتتى ءاندى حالىق نازارىنا ۇسىنعان بولاتىن. ال بەينەبايان تۇسىرىلگەن بۇل ءان «مەن سەنى ۇمىتپايمىن» دەپ اتالادى.

سيۋجەت جەلىسى بويىنشا، ەر ازامات سۇيگەن قىزىنا ۇسىنىس جاساماق بولعاندا ول تالىپ قالادى. كەيىننەن ونىڭ ناۋقاس ەكەنى انىقتالادى. وتا بولمەسىنە كىرمەس بۇرىن قىز سۇيگەن جىگىتىنە ساقيناسى مەن ەڭ جاقىن قۇربىسىنىڭ سۋرەتىن ۇستاتادى. سول ساتتە قوس عاشىق قوشتاسادى.

جانتەبىرەنتەرلىك بەينەبايان كوپشىلىكتى بەي-جاي قالدىرمادى. تىڭدارماندار ءاننىڭ ماعىنالى، ال بەينەباياننىڭ ساپالى شىققانىن قۋانا جەتكىزدى. كوپشىلىك تۋىندىنى كورە وتىرىپ، كوزدەرىنە جاس العاندارىن جاسىرمادى.