ديماشتى قولداڭىزدار: الەمنىڭ ۇزدىك انشىلەرى رەيتينگىندە ديماشقا قالاي داۋىس بەرۋ كەرەك؟

استانا. قازاقپارات - ديماش قۇدايبەرگەن الەمدەگى ەڭ ايگىلى انشىلەرمەن تالاسقا تۇسۋدە. وتانداسىمىز بارلىق كەزەڭدەردىڭ ەڭ مىقتى ءانشىسى اتانۋدان ءۇمىتتى.

امەريكالىق Ranker سايتىندا جۇرگىزىلەتىن رەيتينگكە بيىل ديماشتىڭ دا ەسىمى قوسىلعان، دەپ حابارلايدى Stan.kz اقپاراتتىق اگەنتتىگى.

Facebook قولدانۋشىسى قانات بۇقاربايەۆ الەمنىڭ ۇزدىك انشىلەرىمەن تالاسقا ءتۇسىپ جاتقان ديماش قۇدايبەرگەندى قولداۋعا شاقىردى. ديماشقا مىنا سىلتەمە ارقىلى ءوتىپ، داۋىس بەرۋگە بولاتىنىن ايتا كەتەيىك.

«بۇل تىزىمدە ەڭ مىقتى دەگەن انشىلەر، سۋپەر ستارلار، ەسترادالىق جانە وپەرالىق انشىلەر»، - دەيدى ول.

ايتا كەتەيىك، اتالعان سايت لوس-اندجەلەس قالاسىندا قۇرىلعان. مۇندا ءارتۇرلى سالا وكىلدەرىنىڭ رەيتينگتەرى بار. ارتىستەردىڭ، تاۋارلار مەن قىزمەتتەردىڭ تانىمالدىلىعىن زەرتتەيتىن ماركەتينگ ماماندارى وسى رەيتينگكە قاراپ ساراپتاما جاسايدى. Ranker- گە ايىنا 50 ميلليون ادام كىرەدى.

ەسكە سالا كەتەيىك، وسىدان بىرەر كۇن بۇرىن ديماش بۇل رەيتينگتە 6-ورىنعا شىققان بولاتىن. ال بۇگىن قۇدايبەرگەنوۆ ۇزدىك انشىلەر رەيتينگىندە 35- ورىندا تۇر.