قازاقستاندىقتار جاڭا كولىكتەرگە جارتى تريلليون تەڭگە جۇمسادى

استانا. قازاقپارات - قازاقستاننىڭ اۆتوبيزنەس قاۋىمداستىعى وتكەن جىلدىڭ قورىتىندىسىن شىعاردى، دەپ حابارلايدى قازاقپارات ءتىلشىسى.

ۇيىمنىڭ ۆيتسە-پرەزيدەنتى انار ماقاشيەۆانىڭ ايتۋىنشا، وتكەن جىلى قازاقستاندىقتار 60 مىڭ جاڭا كولىكتى ساتىپ الدى. سونىڭ تەڭ جارتىسى - ءوز ەلىمىزدە قۇراستىرىلعان اۆتوموبيلدەر. جالپى، قازاقستان حالقى جاڭا كولىكتەردى ساتىپ الۋعا 547 ميلليارد تەڭگە جۇمسادى. بۇل 2017-جىلمەن سالىستىرعاندا 24 پروتسەنتكە ارتىق.

«ارينە، ۇكىمەت تاراپىنان جاسالعان قولداۋ شارالارى وتاندىق اۆتوونەركاسىپتىڭ دامۋىنا وڭ ىقپالىن تيگىزدى. ماسەلەن، ەسكى كولىكتەردى ۋتيليزاتسيالاۋ باعدارلاماسى اياسىندا قازاقستاندىقتار 90 مىڭ ەسكى كولىكتى تاپسىرىپ، جاڭا كولىك ساتىپ الدى. بۇگىندە وسى جۇمىسپەن «وپەراتور روپ» كومپانياسى اينالىسادى. ولار ەسكى كولىك ءۇشىن اقشانى، ءيا بولماسا، ارنايى اقشالاي كۋالىكتى بەرەدى. اتالعان كۋالىكتىڭ اقشاسىن سالوننان جاڭا كولىكتى العاندا پايدالانۋعا مۇمكىندىك بار. ءبىر ادام ەكى كۋالىكتىڭ اقشاسىن قوسىپ، سۋ جاڭا تەمىر تۇلپاردى ساتىپ الۋعا سالا الادى. بۇدان بولەك، 4 پروتسەنتتىك اۆتونەسيە بار. ۇكىمەت اتالعان باعدارلاماعا قارجىلاي قولداۋ كورسەتىپ، اعىمداعى جىلى ونى ارى قاراي جالعاستىرادى دەگەن ءۇمىتىمىز بار»، - دەدى ا. ماقاشەۆا استانادا وتكەن باسپا ءسوز ءماسليحاتىندا.

ايتا كەتكەن ءجون، وتكەن جىلى ءوز ەلىمىزدە قۇراستىرىلعان كولىكتەر يمپورتپەن كەلەتىن اۆتوموبيلدەردى ىعىستىرىپ، ءوز ۇلەسىن العاش رەت 55 پروتسەنتكە دەيىن جەتكىزدى. قازاقستاننىڭ اۆتوبيزنەس قاۋىمداستىعىنىڭ بولجامىنا سايكەس، قازىرگى كورسەتكىشتەر ساقتالا بەرسە، 2019-جىلدا جاڭا كولىك ساتىلىمى 70 مىڭ داناعا جەتەدى.