قازاقستاندىق عالىمدار ءبيدايدىڭ ءونىمى مول جاڭا سۇرپىن شىعاردى
شورتاندى اۋدانىنداعى ا. بارايەۆ اتىنداعى استىق شارۋاشىلىعى عىلىمي-وندىرىستىك ورتالىعىنىڭ مالىمەتى بويىنشا، اتالمىش ورتالىقتاعى قاتتى ءبيداي زەرتحاناسىنىڭ قىزمەتكەرلەرى وتكەن جىلى «دامسا 2017» ءبيداي سورتىن سىناقتان وتكىزىپ، ناتيجەسىندە ءار گەكتاردان 46,5 تسەنتنەردەن ءونىم الدى.
«عالىمدار ءبيدايدىڭ جاڭا سۇرپىن شىعارۋدا زەرتتەۋ جۇمىستارىن 2015-جىلى باستاعان. تابىستى جۇمىستىڭ ناتيجەسىندە بىرنەشە جىلدان كەيىن ءبيدايدىڭ توزىمدىلىگى جوعارى «دامسا 2017» جاڭا سورتى دۇنيەگە كەلدى. ەلىمىزدىڭ سولتۇستىك وڭىرلەرىندە وسىرۋگە ارنالعان بۇل سورت اۋا جانە توپىراق قۇرعاقشىلىعىنا ءتوزىمدى. ەكولوگيالىق جازدىق دالالىق تۇرگە جاتادى.
«دامسا 2017» سورتى شيكى پروتەين مەن اقۋىزدىلىعىنىڭ تۇراقتى قۇرامىمەن ەرەكشەلەنەدى. وسى ءبيدايدان الىنعان ماكارون ءتۇسى جانە جالپى باعالاۋ بويىنشا ستاندارتتى كورسەتكىشتەن اسىپ تۇسەدى»، - دەيدى ا. بارايەۆ اتىنداعى استىق شارۋاشىلىعى عىلىمي-وندىرىستىك ورتالىعىنىڭ باسپا ءسوز حاتشىسى ايان قايىربايەۆ.
سونىمەن قاتار، ەكولوگيالىق سورتتى سىناقتان وتكىزۋ سولتۇستىك قازاقستان وبلىسىنىڭ ەگىستىك القاپتارىندا دا جۇرگىزىلدى. ودان ءار گەكتاردان 46,3 تسەنتنەردەن ءونىم الىندى. ايتالىق، ا. بارايەۆ اتىنداعى استىق شارۋاشىلىعى عىلىمي-وندىرىستىك ورتالىعىندا بىلتىر جازدىق ءبيدايدىڭ ونىمدىلىگى 2,5 ەسە ارتىپ 25,5 تسەنتنەرگە جەتتى.