باياناۋىلدا تۋريزم سالاسىن دامىتۋعا تۇركيا كومپانياسى قىزىعۋشىلىق تانىتۋدا
- بىلتىر استانادا وتكەن حالىقارالىق فورۋمدا «AHISKALI EMLAK» تۇرىك كومپانياسىمەن بايلانىس ورناتىلدى، - دەيدى وڭىرلىك كاسىپكەرلىك، ساۋدا جانە تۋريزم باسقارماسىنىڭ باسشىسى داستان رىسپەكوۆ. - كومپانيانىڭ وكىلدەرى باياناۋىل شيپاجاي ايماعىنا كەلىپ كەتىپ، سابىندىكول كولىنىڭ جاعاسىن دامىتۋعا ينۆەستيتسيا سالۋعا نيەت ءبىلدىردى. قازىرگى تاڭدا مەكەمە باسشىسى شيەۆكەت ءراشيدتى كۇتىپ وتىرمىز جانە مەموراندۋمعا قول قويىلادى.
بۇدان باسقا، باسقارما باسشىسى تۋريستەر ءۇشىن ارقان ساياباعى، ارقانمەن تۇسۋگە بولاتىن «زيپ-لاين» اتتراكتسيون ايماقتارىن اشۋ كوزدەلىپ وتىرعانىنا توقتالىپ ءوتتى.
- بۇل جوبالاردى جۇزەگە اسىرۋ ءۇشىن كاسىپكەرلەردىڭ اراسىندا «ب ج ك-2020» باعدارلاماسى اياسىندا وتىنىشتەردى قابىلداۋعا قاتىستى ءتۇسىندىرۋ جۇمىستارى جۇرگىزىلۋدە، - دەيدى داستان رىسپەكوۆ. - زاماناۋي ۇلگىدەگى «زولوتىە پەسكي» دەمالىس ءۇيىنىڭ قۇرىلىسى 90 پايىزعا اياقتالدى. قازىرگى تاڭدا ىشكى جۇمىستار قالدى. 128 ورىندىق نىساننىڭ بوي كوتەرۋىنە بىلتىر 300 ميلليون تەڭگە سالىنسا، بيىل 40 ميلليون ينۆەستيتسيا قۇيۋ كوزدەلىپ وتىر. قىسقى ۋاقىتتا باياناۋىل شيپاجاي ايماعىندا تۋريستەردى بەس دەمالىس ءۇيى قابىلداي الادى.
وبلىس اكىمى بولات باقاۋوۆ باسقارما باسشىسىنا سۋ تارتۋ ماسەلەسى شەشىلگەنگە دەيىن قانداي دەمالىس ۇيلەرى تۋريستەردى قابىلداي الاتىندىعىنا ساراپتاما جاساۋدى تاپسىردى.
- ءبىر عانا «فاكەل» مەن ەكى شيپاجاي جۇمىس ىستەپ تۇر، - دەيدى وبلىس اكىمى. - اقپاراتتىق تۋرلار جانە ەكسكۋرسيامەن شەكتەلىپ قالماۋ كەرەك. باياناۋىل كوپشىلىككە تانىلعان برەند.
ءبىرىنشى كەزەكتە تۇرعان اۆتوجول ماسەلەسى شەشىمىن تاپتى. قاراعاندى جانە پاۆلودار وبلىستارىن العاندا ەكى ميلليوننان استام ادام بار. بۇل تولىق كولەمدە جۇمىس ىستەۋ ءۇشىن جەتكىلىكتى. جاسىبايدان باسقا، تورايعىر، بىرجانكول جانە سابىندىكول اۋماعىن دامىتۋعا نازار اۋدارۋ كەرەك.