پاۆلودار وبلىسىندا قۇرامىندا رادون بار شيپالى كولدەر انىقتالۋدا
بۇل تۋرالى وبلىستىق اكىمدىكتە وتكەن كەڭەيتىلگەن اپپاراتتىق جيىندا وڭىرلىك كاسىپكەرلىك، ساۋدا جانە تۋريزم باسقارماسىنىڭ باسشىسى داستان رىسپەكوۆ ءمالىم ەتتى.
- تۋريزم سالاسى ءۇشىن سەرپىن بەرەتىن تىڭ جوبالاردىڭ ءبىرى - رادون كوزدەرى، - دەيدى داستان رىسپەكوۆ. - الماتى وبلىسى ۇيعىر اۋدانىنىڭ شونجى كەنتىندە ورنالاسقان رادون كوزدەرىنىڭ انالوگى بويىنشا مينەرالدى سۋدى پايدالانۋ ادام اعزاسىنا وڭ اسەر ەتەدى. وسى جوبا اياسىندا قالالار مەن اۋدانداردىڭ اكىمدىكتەرىنە ىستىق كوزدەردىڭ بار-جوعىن انىقتاۋ بويىنشا حات جولدانعان. ناتيجەسىندە جەلەزين اۋدانىنىڭ ميحايلوۆسك اۋىلىنداعى چالدۋك كولىندە جانە ۋسپەن اۋدانىنىڭ تەميريازيەۆو اۋىلىندا بار بولىپ شىقتى.
باسقارما باسشىسى جەلەزين اۋدانىندا وزدىگىنەن اعىپ جاتقان ۇڭعىما اۋداننىڭ ادىلەت باسقارماسىندا 2018-جىلى 31- جەلتوقساندا يەسىز رەتىندە تىركەلگەنىن اتاپ ءوتتى.
- بۇل كول گەوگرافيالىق كارتادا كورسەتىلمەگەن، - دەيدى داستان رىسپەكوۆ. - ءبىر جىل وتكەننەن كەيىن مەنشىك يەسى جوق دەپ تانۋ ءۇشىن قۇجاتتار سوتقا جىبەرىلەدى. بۇل كوزدەر ەمدىك-ساۋىقتىرۋ تۋريزمى ءۇشىن جاڭا باعىت بولادى. وسى باعىتتا ورىندى انىقتاۋ، كولدىڭ تەمپەراتۋراسى مەن ەمدىك قاسيەتى تۋرالى اقپارات جيناۋ، زەرتتەۋ جۇرگىزۋ بويىنشا جۇمىس جوسپارلانىپ وتىر.
ايتا كەتەرلىگى، جەر قويناۋىنان 37 گرادۋس بولىپ شىعاتىن سۋدىڭ ادام اعزاسىنا بەرەر پايداسى مول. ءتۇرلى بورتپەلەر مەن قىشىما اۋرۋلارعا، بۋىن، سوزىلمالى، قان قىسىمىنىڭ كوتەرىلۋىن ەمدەيدى.