استانانىڭ ەمحانالارىندا ءۇش جۇزدەن استام شەتەل ازاماتى ەم قابىلدادى

استانا. قازاقپارات - قازاقستاننىڭ باس قالاسىندا مەديتسينالىق تۋريزم دامىپ كەلەدى، دەپ حابارلايدى استانا اكىمدىگىنىڭ رەسمي سايتى.

رەسپۋبليكالىق دەنساۋلىق ساقتاۋدى دامىتۋ ورتالىعىنىڭ مالىمەتىنە سۇيەنسەك، وتكەن جىلى قالانىڭ 9 جەتەكشى ەمحاناسىندا 300 دەن استام شەتەلدىك ەم قابىلداعان. ولارعا كارديوحيرۋرگيا، ترانسپلانتولوگيا، ە ك و، وڭالتۋ، ورتوپەديا سياقتى كلينيكالىق باعىتتار بويىنشا كومەك كورسەتىلگەن بولاتىن.

مۇنداي مالىمەتتەر بۇگىن استانانىڭ جەتەكشى كلينيكالارىنا جاسالعان اقپاراتتىق مەديتسينالىق تۋر بارىسىندا كەلتىرىلدى. شاراعا تۋريستىك وپەراتورلار، ەلوردالىق تۋريزم قاۋىمداستىعىنىڭ وكىلدەرى مەن بلوگەرلەر قاتىستى.

تۋرعا قاتىسۋشىلار ۇلتتىق كارديحيرۋرگيا ورتالىعىنا، ۇلتتىق نەيروحيرۋرگيا ورتالىعىنا، انا مەن بالا ۇلتتىق عىلىمي ورتالىعىنا، «ق ر پرەزيدەنتى ىستەرىن باسقارۋ مەديتسينالىق ورتالىعىنىڭ» اۋرۋحاناسىنا، ۇلتتىق عىلىمي مەديتسينالىق ورتالىققا، سونداي-اق، «ءۇمىت» توموتەراپيا مەن يادرولىق مەديتسينا ورتالىعىنا بارىپ قايتتى. شارا اياسىندا قاتىسۋشىلارعا نەيروحيرۋرگيا، كارديوحيرۋرگيا، ورتوپەديا، ونكولوگيا، ەكو سياقتى كلينيكالىق باعىتتار بويىنشا يننوۆاتسيالىق مەديتسينالىق قىزمەتتەر، «Check-up» (دياگنوستيكا) قىزمەتتەرى، ساۋلەلىك دياگنوستيكا تانىستىرىلدى.

كەزدەسۋ بارىسىندا مەديتسينالىق تۋريستەر اراسىندا سۇرانىسقا يە مەديتسينالىق ورتالىقتار بولىمدەرى قىزمەتىنىڭ نەگىزگى اسپەكتىلەرى جايلى ايتىلدى.

ماسەلەن، رەنتگەن وپەراتسيالار جاسالاتىن بولمەلەر، «Carto» اپپاراتىنىڭ جۇمىسى، توموپەراپيانىڭ كومەگىمەن قاتەرلى ىسىك اۋرۋلارىن ەمدەۋ تاسىلدەرى كورسەتىلدى.

ەسكە سالايىق، بۇگىن مەديتسينالىق مەكەمەلەر، ولاردىڭ ۇسىناتىن قىزمەتتەرى مەن ماماندارى، مەكەمەدە بار قۇرال-جابدىقتار تۋرالى اقپاراتتى الۋعا مۇمكىندىك بەرەتىن www.medicaltourism.kz ءبىرىڭعاي ونلاين-پورتالى ىسكە قوسىلعان بولاتىن.

بۇدان بولەك، مەديتسينالىق تۋريزمگە قاتىستى «Call-ورتالىق» جۇمىسىن باستادى. قازاقستاندىق جانە شەتەلدىك پاتسيەنتتەر وزىنە قاجەتتى اقپارات پەن كەڭەستى 1430 ءنومىرى بويىنشا تاۋلىك بويى الا الادى.