رەسەيلىك قىز قازاق ءتىلىن ۇيرەنىپ، قازاقتىلدى ارنا اشىپ العان
بويجەتكەننىڭ ايتۋىنشا، ول ءتىلدى ۋنيۆەرسيتەت قابىرعاسىندا ۇيرەنگەن.
بۇل تۋرالى «ياتس» سايتى حابارلايدى.
ەليزاۆەتا وسيپوۆا 2012 -جىلى ماسكەۋ مەملەكەتتىك لينگۆيستيكالىق ۋنيۆەرسيتەتىنە ءتۇسىپ، «شەت ەل ءوڭىرتانۋى» ماماندىعى بويىنشا ءبىلىم الىپتى. سول كەزدە وقىتۋشىلارى قازاق ءتىلىن ۇيرەنۋگە ىنتالارىن اشىپتى.
«باستاپقىدا فيلولوگيا عىلىمدارىنىڭ دوكتورى مۇسابەكوۆا ۇلجان ەسەن قىزى، ارتىنشا شاحاتوۆ كامشات تىلەك قىزى قازاقستاندى تانۋعا، قازاق ءتىلى مەن مادەنيەتىن سۇيۋگە ىنتالاندىردى. وسىلايشا، 4 جىل باكالاۆرياتتا، ارتىنشا 2 جىل ماگيستراتۋرادا قازاق ءتىلىن ۇيرەندىك» ، - دەيدى رەسەيلىك بويجەتكەن.
ءوز سوزىندە ول قازاق ءتىلىن ۇيرەنۋ ءۇشىن قاجەتتى وقۋلىقتار جەتكىلىكتى بولماعاندىقتان، ءتىلدى مەڭگەرۋ قيىنعا سوققانىن ايتتى.
«ارينە، قازاق ءتىلىن وزدىگىنەن ۇيرەنۋ ءۇشىن ءتۇرلى وقۋلىقتار كوپ بولعانىن قالايمىن. تاعى ءبىر قيىندىق، ءتىلدى مەڭگەرۋ ءۇشىن تاجىريبەنىڭ جوقتىعىندا. بىزگە ماسكەۋدەن قازاق تىلىندە سويلەيتىن ادامداردى ىزدەۋگە تۋرا كەلدى. جالپى، ءبىز «ماسكەۋ قازاقشا» جوباسىن قازاق تىلىندە سويلەۋگە جاتتىعىپ، ونى ۇمىتىپ قالماس ءۇشىن قۇردىق. ەگەر عالامتوردا قازاقتىلدى ورتادان تىس جەردە قازاق ءتىلىن ۇيرەنىپ جۇرگەن ادامدارعا ءتىلدى مەڭگەرۋگە، دامىتۋعا ارنالعان ۆيدەو جانە اۋديوكونتەنت بولسا، جاقسى بولار ەدى. ەگەر مەن ۇيرەنگەن قازاق ءتىلى قاجەتكە جاراماسا، رەنىش تۋدىراتىن ەدى» ، - دەيدى ول.
سونىمەن قاتار ەليزاۆەتا قازاق ءتىلى ارقىلى مۇلدە بولەك مادەنيەتپەن تانىسقانىن اتاپ ءوتتى.
«قازاق ءتىلى ارقىلى ءبىز قازاقتىڭ مادەنيەتىمەن، بۇعان دەيىن بىزگە تاڭسىق بولعان مادەنيەتپەن تانىستىق. قازاقتىڭ مەنتاليتەتى، سالت- ءداستۇرى، تۇرمىسى، اسحاناسى، جالپى قازاقستان تۋرالى كوپ دۇنيەگە قانىق بولدىق. ءتىپتى، قازاق پەن ورىستىڭ مادەنيەتتەرىنەن ۇقساستىقتار تاپتىق. مىسالى، ءبىزدىڭ ەلدەردىڭ قوناقجايلىعى، شىنايىلىعى مەن اشىق- جايساڭدىعى. اسىرەسە، بىزگە قازاقتىڭ «اسپانعا قارايمىن» ، «سۇلۋ قىز» ، «كوزىمنىڭ قاراسى» ، «ارمانداستار» اندەرى ۇناپ قالدى» ، - دەيدى ەليزاۆەتا وسيپوۆا.
ەليزاۆەتانىڭ ايتۋىنشا، «ماسكەۋ قازاقشا» جوباسىن قازاق ءتىلىن مەڭگەرۋ دەڭگەيىن ودان ءارى قولداپ، دامىتۋ ءۇشىن قۇرعان. ءبىر جاعىنان جوبانىڭ ءبىزدى تاماشالايتىن اۋديتورياعا قىزىق بولعانىن قالادىق، دەيدى ول.
«نەدەن باستارىمىزدى بىلمەدىك. سول كەزدە مەن ماسكەۋ كوشەلەرى تۋرالى ايتىپ، وسىلايشا، قالانىڭ قىزىقتى جانە كورنەكتى ورىندارىنىڭ كارتاسىن جاساۋدى ۇسىندىم. ونى قازاق تىلىندە جۇرگىزەمىز دەپ شەشتىك. ءبىر جاعىنان، رەسەيدە قازاق ءتىلىن ۇيرەنىپ جۇرگەن ادامداردى تارتقىمىز كەلدى. ەكىنشى جاعىنان، قازاقستاندىق جاستارعا ماسكەۋ تۋرالى ءوز انا تىلىندە ءبىلۋ قىزىق بولار ەدى.
جوبانى قولعا الىپ، العاشقى روليكتى تۇسىرگەن كەزدە ءبىزدىڭ ۋنيۆەرسيتەتىمىز ورنالاسقان وستوجەنكا كوشەسى تۋرالى ايتتىق. ارينە ، وزدىگىنەن سەناري مەن ءماتىندى جازىپ شىعۋ قيىن بولدى. الايدا ءبىز پەداگوگتار مەن قازاقستاندىق دوستارىمىزدان ادەيى كومەك سۇرامادىق. بالكىم، ءبىزدىڭ سويلەگەنىمىزدە قاتەلىكتەر بار شىعار، الايدا ءبىز ونى ادەيى تۇزەمەدىك. سەبەبى قازاق تىلىندە قاتە سويلەسەڭىز، بۇدان قورىقپاڭىز. ءتىل يەلەرىنىڭ الدىندا ماڭىزدى كورىنەتىن دۇنيەلەردى جاساڭىز. ولار ءبىزدىڭ مۇنداي قاتەلىكتەرىمىزگە تۇسىنىستىكپەن قارايدى دەپ ۇمىتتەنەمىن» ، - دەپ تۇيىندەدى بويجەتكەن.
Stan.kz