ريددەردە بولاشاق كوشباسشىلار باس قوستى

 وسكەمەن. قازاقپارات - ريددەر قالاسىندا «رۋحاني جاڭعىرۋ» باعدارلاماسىنىڭ اياسىندا «كوشباسشى بولعىڭ كەلسە، مەنەن سۇرا» اتتى شارا ءوتتى، دەپ حابارلايدى قازاقپارات ءتىلشىسى.

«رۋحاني جاڭعىرۋ» جالپى ۇلتتىق يدەياسىنىڭ ءبىر تارماعى «تاربيە جانە ءبىلىم» كىشى باعدارلاماسىن قامتيدى. سول كىشى باعدارلاما اياسىندا ريددەر قالاسىندا «وتانىم - تاعدىرىم» - «دارىندى ۇرپاق - ەل بولاشاعى» اتتى جوبا جەلكەنىن كەردى.

 

جەرگىلىكتى №1 مەكتەپتە وتكەن شاراعا اكىمدىك وكىلدەرى، قوعامدىق ۇيىم مۇشەلەرى، «ماڭگىلىك ەل» تاربيە جانە ءبىلىم بەرۋ ورتالىعىنىڭ قىزمەتكەرلەرى قاتىسىپ، جاستارعا كوشباسشىلىقتىڭ قىر- سىرىن ۇقتىردى.

 

 30 عا جۋىق جىگەرلى جاستىڭ باسىن قوسقان شارادا ءۇش ءتۇرلى شەبەرلىك ساعاتى ۇيىمداستىرىلدى. «شەشەندىك نەگىزدەرى» ، «توپتىق جۇمىس» ، «كرەاتيۆتى ويلاۋ» تاقىرىبىندا وتكەن سەميناردا كوشباسشىلىققا ىنتالى جاستار ءوز بويلارىندا بۇعىپ جاتقان يگى قاسيەتتەردى وياتىپ، دامىتۋدىڭ تاسىلدەرىن مەڭگەردى. «ساتىلىم ۋاقىتى» دەگەن اتپەن وتكەن ىسكەرلىك ويىنى ساۋدانى ساۋاتتى جۇرگىزۋگە باۋلىسا، «ءوز ويىم بار» پىكىرتالاس كلۋبى تىڭ ويلاردىڭ ءتۇر- ءتۇرىن تۋعىزدى.

 «قالا جاستارى ءۇشىن بۇل شارانىڭ ماڭىزى زور. تۇتاس ۇلتتىڭ باسەكەگە قابىلەتتى بولۋى ءارقايسىمىزدىڭ ادامي قاسيەتتەرىمىزگە تىكەلەي بايلانىستى. سوندىقتان، وركەنيەتتى قوعام قۇرۋعا قاۋقارلى ۇلت قالىپتاستىرۋ ءۇشىن جاس بۋىندى قىرانداي باپتاپ، بالاپانداي باۋلۋىمىز قاجەت. بۇگىنگى جاستىڭ بويىندا كاسىبي كوشباسشىلىق پەن جەكە ادامي قاسيەتتەر ۇيلەسىم تابا ءبىلۋى شارت. وتكىزگەن شارامىز سول ۇيلەسىمگە جول اشاتىن جاتتىعۋلار مەن ويىندارعا تولى بولدى» - دەيدى اۋداندىق ىشكى ساياسات ءبولىمىنىڭ باسشىسى انار دۇكەنبايەۆا.

 

شارا سوڭىندا بەلسەندىلىك تانىتقان قاتىسۋشىلار ماقتاۋ قاعازدارىمەن، سىيلىقتارمەن ماراپاتتالدى.