اقتوبەدە جانىبەك حان، شاكەن ايمانوۆ، ساۋران، سامۇرىق كوشەلەرى پايدا بولدى

 اقتوبە. قازاقپارات - اقتوبەدە ءبىرقاتار كوشەلەرگە جاڭا اتاۋ بەرىلىپ، ەسكى اتاۋلار وزگەرتىلدى، دەپ حابارلايدى قازاقپارات ءتىلشىسى.

اقتوبە وبلىسىندا بىرنەشە جىل بويى اتاۋسىز تۇرعان كوشەلەرگە اتاۋ بەرىلدى. ولار قازىر بالۋان شولاق، قاجىمۇقان مۇڭايتپاس ۇلى، قۇس جولى، جەتى قازىنا، كەلەشەك، ءىنجۋ- مارجان، بەس قاينار، بالبىراۋىن، سۇلۋتوبە، توعايلى، سارىارقا، تايقازان، كەڭجايلاۋ، اقبەسىك، بازارلى دەپ اتالادى. وسىنداي 95 كوشە بار. سونىمەن قاتار، پۋگاچيەۆ - مۇحتار اۋەزوۆ، ستەپان رازين - ءماشھۇر ءجۇسىپ كوپەي ۇلى، روزا ليۋكسەمبۋرگ - دينا نۇرپەيىسوۆا، سوۆحوزنىي پروەزد - ءۇش تاعان، شورس - اراي كوشەسى، دەميان بەدنىي - قاسىم حان، كولتسوۆ - ورال، ۋدارنىي - تەمىرقازىق، كوبوزيەۆ - بۋراباي، اعايىندى كوروستىليەۆتار - كەرەي حان اتىنداعى كوشە بولىپ وزگەردى. وسى جولمەن ەسكى كوشە اتاۋلارى جانىبەك حان، شاكەن ايمانوۆ، ساۋران، سامۇرىق، ىزگىلىك تۇيىق كوشەسى بولدى.

«اقتوبە وبلىستىق ونوماستيكا كوميسسياسى اتاۋسىز قۇرامداس بولىكتەرگە اتاۋ بەرۋ تۋرالى 95, قايتا اتاۋ تۋرالى 79, ەلدى مەكەندەردى قايتا اتاۋ تۋرالى 2, بارلىعى 176 ۇسىنىستى قاراپ، ونىڭ 155 ىنە وڭ قورىتىندى بەردى. سونداي- اق 224 اتاۋ رەسپۋبليكالىق ونوماستيكا كوميسسياسىنىڭ وڭ قورىتىندىسىن الدى. قازىرگى تاڭدا وبلىس توپونيميكا كەڭىستىگىندەگى قازاق تىلىندەگى اتاۋلاردىڭ ۇلەسى %93  قۇرادى. 2017 -جىلمەن سالىستىرعاندا وتكەن جىلى وبلىستاعى يدەولوگيالىق تۇرعىدان ەسكىرگەن اتاۋلار ۇلەسى ەكى ەسەگە ازايدى» ، - دەدى اقتوبە وبلىستىق تىلدەردى تىلدەردى دامىتۋ باسقارماسىنىڭ باسشىسى گۇلايىم تولەبايەۆا.