ۇيقى الدىندا لينزالاردى شەشپەسە
وفتالمولوگ (كوز دارىگەرى) ۇيىقتار الدىندا لينزانى شەشۋدى ۇسىنسا دا، سول كۇيى ۇيىقتاپ قالاتىندار بارى جاسىرىن ەمەس. ەگەر ءسىز دە لينزانى شەشپەستەن كوز ءىلۋ داعدىڭىزعا اينالدىرىپ العان بولساڭىز، مىنا ماقالىنى تولىقتاي وقۋعا كەڭەس بەرەمىز. «جاناسپالى لينزالاردى شەشپەستەن ۇيىقتاۋ دەنساۋلىققا ۇلكەن قاۋىپ ءتوندىرۋى ابدەن مۇمكىن» ، - دەيدى نيۋ- مەكسيكو ۋنيۆەرسيتەتىنىڭ دوتسەنتى دجون فەملينگ (Jon Femling) ءوزىنىڭ Annals of Emergency باسىلىمىنا جاريالاعان زەرتتەۋ جۇمىسىندا.
لينزالاردى ۇزاق پايدالانۋ مەن ونى ۇيىقتار الدىندا شەشپەۋ كەسىرەنەن كەراتيت ميكروبى ءتۇرلى ينفەكتسيالاردى تاراتادى. ناتيجەسىندە كوزدىڭ ءمولدىر قاباتى قابىنادى. لينزانى دۇرىس قولدانباۋ كەسىرەنەن زارداپ شەككەن ەمدەلۋشىلەردىڭ كوزى قايتا قالپىنا كەلۋ ءۇشىن بىرنەشە اي ەمدەۋ شاراسى كەرەك بولسا، ەندى بىرىنە كوزدىڭ ءمولدىر قاباتىن قايتا جاڭارتۋ كەرەك بولعان. ارنايى وتا كوز ينفەكتسياسىن قاراپايىم انتيبيوتيكتەر ارقىلى ەمدەۋ مۇمكىندىگى بولماي، قاتتى اسقىنعان كەزدە عانا جاسالادى. ال، قالعان ۋاقىتتا بىرنەشە اپتا نەمەسە اي بويىنا كوزگە ارنالعان ارنايى تامشىلاردى ساعات سايىن تامىزۋ ارقىلى ەمدەگەن. مامان مىسالعا العان ءبىر جاعدايدا 34 جاستاعى ەر ازامات اپتاسىنا 3-4 رەت جاناسپالى لينزامەن تەك ۇيىقتاپ قانا قويماي، سونىمەن بىرگە سۋ استىندا جۇزگەنىن حابارلاعانىن ايتادى. كەيىن كوزىنىڭ قىزارىپ، سول كوزىندە تاعى ءبىر ءمولدىر قاباتتىڭ پايدا بولعانىن بايقاعان. دارىگەرگە بارعان سوڭ، ەكى اي كوزدىڭ باكتەريا مەن ساڭىراۋقۇلاق ينفەكتسياسى دەگەن دياگنوز بويىنشا ەم قابىلداعان. ءبىراق، بەلگىلەر جوعالۋدىڭ ورنىنا، اسقىنا تۇسكەن. Wikimedia Commons كەيىن دارىگەرلەر قايتا زەرتتەۋ جۇرگىزىپ، سيرەك كەزدەسەتىن كوز ينفەكتسياسىن اڭعارعان. ول Acanthamoeba keratitis دەپ اتالاتىن تابيعاتتا، سونىڭ ىشىندە سۋ استىندا كەزدەسەتىن امەبا اسەرىنەن پايدا بولعان. ارينە، دياگنوزى انىقتالعان سوڭ، ارنايى ەمدى قايتا قابىلداپ قالپىنا كەلگەنمەن، بۇل ءۇردىس التى ايعا جۋىق ۋاقىتتى كەرەك ەتكەن. ودان بولەك، ونىڭ كورۋ قابىلەتى ناشارلاعان. ال، 59 جاستاعى ەر ازامات اڭشىلىق كەزىندە ءتۇنى بويى لينزانى شەشپەستەن كيگەن. كيىن كوزىنىڭ قىزارىپ، قاتتى اۋىرعانىن ايتىپ دارىگەرگە بارعان. ناتيجەسىندە وتا جاسالعان.
ال، ەكى اپتا بويىنا شەشپەستەن كيگەن 57 جاستاعى ازاماتتىڭ كوزدەرىنىڭ ءمولدىر قاباتىنىڭ جۇقارىپ، تەسىلگەنى انىقتالعان. كوز دارىگەرلەرى كەراتيت ميكروبىنىڭ وسۋىنە تەك ءتۇنى بويى لينزامەن ۇيىقتاۋ عانا ەمەس، كوزدى دۇرىس كۇتپەۋ، لينزالاردى قولدانۋ بارىسىندا تازالىقتى ساقتاماۋ اسەر ەتەدى دەيدى. «ساراپتاما كورسەتكەدەي، لينزانىڭ ارنايى جارامدىلىق مەرزىمىنەن اسىرىپ قولدانۋ، ۇيقى الدىندا لينزانى شەشپەۋ، ۇزاق ۋاقىت قولدانۋ، دەزينفەكتسيا مەن جەكە گيگيەنا قابىنۋدى كۇشەيتە تۇسەدى» ، - دەيدى فەملينگ.
كوزدىڭ ءمولدىر قاباتىنىڭ قابىنۋىنا جول بەرمەۋ ءۇشىن:
• جاناسپالى لينزالاردى قولدانباستان بۇرىن قولىڭىزدى جۋىڭىز.
• سۋعا شومىلماس بۇرىن، ۇيىقتار الدىندا مىندەتتى تۇردە لينزالاردى شەشىڭىز.
لينزالاردى دەزينفەكتسيالاۋ ءۇشىن ارنايى ەرىتىندىلەردى قولدانىڭىز.
• ارنايى قوراپتارعا سالماس بۇرىن پايدالانىلعان ەرىتىندىنى جاڭاسىنا الماستىرىڭىز.
• لينازاعا ارنالعان قوراپتاردى تازارتىپ تۇرىڭىز جانە ءۇش اي سايىن جاڭارتۋدى ۇمىتپاڭىز. كوز ساۋلىعى تازالىقتان باستالادى.
Massaget.kz