كوزگە لازەرلىك كوررەكسيا جاساتۋ قانشالىقتى ءتيىمدى؟

 استانا. قازاقپارات -  كوز - ادام جانىنىڭ ايناسى. بۇگىندە قاراشىقتىڭ كورۋ قابىلەتىن ساقتاپ قانا قويماي، ونى ەمدەۋدە تىڭ تەحنولوگيالار قولدانىلىپ كەلەدى.

كورۋ قابىلەتى ناشار ادامنىڭ كوزى بۇلدىرلايدى. بۇلدىرلاۋدى بولدىرماس ءۇشىن ازاماتتار اراسىندا كوزىلدىرىك پەن جاناسپالى لينزالار كەڭىنەن تاراعانى بارشاعا ءمالىم. ەكەۋىنەن دە قۇتىلۋ ءۇشىن سوڭعى كەزدە تۇرعىندار اراسىندا كوزگە لازەرلىك كوررەكسيا جاساتۋعا سۇرانىس ارتىپ وتىر.

اتالعان وپەراتسيانىڭ ءتۇرى بۇگىندە قانشالىقتى قاۋىپسىز، قانشالىقتى ءتيىمدى؟ تاياۋدا عانا كوزىنە لازەرلىك كوررەكتسيا جاساتقان استانالىق ارايلىمنىڭ بۇگىندە كورۋ قابىلەتى ەداۋىر جاقساردى. مەكتەپ كەزىنەن كوزىلدىرىك، ارتىنشا جاناسپالى لينزا قولدانىپ كەلگەن فيلولوگ مامان جوعارىدا اتالعان وپەراتسيانىڭ ساناۋلى مينۋتتار ىشىندە ءارى جەڭىل جاسالاتىنىن ايتتى.

ارايلىم مالكەنوۆا، قالا تۇرعىنى:

 - مەكتەپ جاسىنان كورۋ قابىلەتىم الىستان ناشار بولدى. سول سەبەپتى لينزا تاعۋعا تۋرا كەلەتىن. كوپ ويلانىپ، لازەرلىك كوررەكسيا جاساتۋدى شەشتىم. وپەراتسيا كەزىندە ەش اۋىرمايدى، تەز ءارى ءساتتى ءوتتى دەۋگە بولادى.

 وپەراتسياعا شامامەن 15 مينۋت ۋاقىت كەتەدى. ونىڭ 10 مينۋتى اپپارات پەن ناۋقاستىڭ دايىندىقتارىنا جانە قالعان 5 مينۋت وتانىڭ وزىنە جۇمسالادى. وپەراتسيا جاسالعاننان كەيىن كوز اۋىرماسا دا، قولدى تىيۋعا تۋرا كەلەدى. ماسەلەن، 2 اپتا بويى مونشاعا بارۋعا تىيىم سالىنسا، قىز- كەلىنشەكتەرگە بويانۋعا بولمايدى. فرانسيا، گەرمانيا جانە انگليادا كاسىبي بىلىكتىلىك شىڭداعان وفتالمولوگ- دارىگەر، مەديتسينا عىلىمدارىنىڭ كانديداتى قۋاتحان مانابايەۆتىڭ كەڭەسى وسىنداي.

 قۋاتحان مانابايەۆ، وفتالمولوگ- دارىگەر:

- لازەرلىك كوررەكسيادان كەيىن كوز 100 پروتسەنت انىق كورە باستايدى دەسەم ارتىق ايتقانىم ەمەس. بۇرىن وپەراتسيا 18-40 جاس ارالىعىنداعى پاتسيەنتتەرگە عانا جاسالىپ كەلسە، بۇگىندە جاسى 40-تان اسقان ناۋقاستار دا قامتىلادى. سونداي- اق «قۇرعاق كوز سيندرومىنا» قاتىستى قارسى كورسەتىم جوق. ادەتتە وپەراتسيادان كەيىن 1 ساعات وتكەن سوڭ پاتسيەنتتى ۇيىنە جىبەرەمىز. كوزگە تامىزاتىن ءدارى- دارمەكتەرى مەن كوز كۇتىمىنە قاجەت كەڭەستەرىمىزدى جازىپ بەرەمىز. ارينە، وپەراتسيا الدىندا ازدى- كەم تولقۋ بولادى. ويتكەنى ءار وپەراتسيانىڭ ءوز تاۋەكەلى بار.

دەگەنمەن دارىگەر ءوزىنىڭ پاتسيەنتى الدىندا تولقىپ تۇرعانىن بىلدىرتپەۋى ءتيىس. كەرى جاعدايدا سوڭعىسى سەنىمسىزدىك پەن ۇرەيگە بوي الدىرۋى مۇمكىن. جالپى كورۋ قابىلەتىن جاقسارتۋ بويىنشا الەمدە 10-عا جۋىق تەحنولوگيا بار.

 ايتا كەتەيىك، كوزدى لازەرلىك كوررەكسيالاۋ تەحنولوگياسى ەلىمىزدە العاش رەت 2005 -جىلى ەنگىزىلدى. ال وتكەن جىلى ەلوردادا شامامەن 10 مىڭنان استام وپەراتسيا جاسالعان. وتكەن جىلعى كورسەتكىشتى 2017 -جىلعىمەن سالىستىرعاندا، 15-20 پروتسەنت ءوسىم بايقالادى.

www.24.kz