استانادا «قۇرمانعازى» وپەراسى كونسەرتتىك قويىلىم فورماتىندا ۇسىنىلماق
«قۇرمانعازى» كونسەرتتىك وپەراسىندا ورىندايتىن پارتيالار: قۇرمانعازى - قازاقستاننىڭ ەڭبەك سىڭىرگەن قايراتكەرى ازامات جىلتىركوزوۆ، اۋەس - شاحريزادا تىنىشتىق، القا - قازاقستاننىڭ ەڭبەك سىڭىرگەن قايراتكەرى دينا حامزينا، پەروۆسكي - التىنبەك ءابىلدا، اقباي - قازاقستاننىڭ ەڭبەك سىڭىرگەن قايراتكەرى قايىرجان بەردىباي.
سونىمەن قاتار، اتىلمىش ونەر تۋىندىسىنا كامەرالىق حور (كوركەمدىك جەتەكشىسى گۇلميرا قۇتتىباداموۆا) ، سيمفونيالىق وركەستر (باس ديريجەرى ەرنار نۇرتازين) ، ەسترادالىق بي ءانسامبلى (كوركەمدىك جەتەكشىسى لاۋرا مۇقايەۆا) قاتىسادى. رەجيسسەرى - اسحات قوشايەۆ.
كونسەرت «رۋحاني جاڭعىرۋ» باعدارلاماسىنىڭ اياسىندا تاريحي- مادەني مۇرانى ساقتاۋ، دامىتۋ جانە دارىپتەۋ ماقساتىندا وتكىزىلەدى. پرەمەرا «استانا» كونسەرت زالىندا ساعات 18:00 دە باستالادى.
قازاق مۋزىكا ونەرىنىڭ گيمالايى، ساز الەمىنىڭ ساردارى - احمەت قۋان ۇلى جۇبانوۆ، قۇرمانعازى ساعىرباي ۇلىنىڭ كۇيلەرىن وركەسترگە ءتۇسىرىپ ورىنداتقان العاشقى كومپوزيتور. 1951 -جىلدان باستاپ احمەت جۇبانوۆ قۇرمانعازى تۋرالى مۇراعات دەرەكتەرىن جيناۋعا كىرىسەدى. قازاقستانداعى مۇراعاتتاردان، ماسكەۋ مەن سانكت- پەتەربۋرگ قالالارىنداعى كوپشىلىك كىتاپحانالاردان قۇرمانعازى تۋرالى دەرەكتەردى تاۋىپ، ولاردىڭ ءبىرقاتارىن باسپا ءسوز بەتتەرىنە جاريالايدى. كەيىن قۇرمانعازى جايىندا ەڭبەك جازادى. ونىڭ كوپ جىلعى ىزدەنىسى، تولعانىسى «قۇرمانعازى» وپەراسىنىڭ جازىلۋىنا جول اشادى. بۇگىندە اتالمىش اۋقىمدى دۇنيە ونەردىڭ زاڭعارىنا اينالىپ وتىر. بۇل ومىرشەڭ شىعارمادا كۇيشى قۇرمانعازىنىڭ اۋىر تاعدىرى، ءومىر بەلەستەرى، شىعارماشىلىق جولى سۋرەتتەلەدى.