تالدىقورعاندا ەمشى «جىنىن شىعارماق» بولعان جاس جىگىت قايتىس بولدى
كىسى ءولىمى تۋرالى فاكت 12 - قاڭتاردا قاراساي اۋدانىندا تىركەلگەن. سوت- مەديتسينالىق ساراپتاما بارىسىندا 28 جاستاعى ازاماتتىڭ كەۋدە تۇسىنان قاتتى جابىق جاراقات العانى، بىرنەشە قابىرعالارىنىڭ سىنعانى جانە وكپەسىنىڭ زاقىمدانعانى انىقتالعان. وسى اۋىر جاراقاتتار كىسى ولىمىنە سەبەپ بولۋى مۇمكىن.
اتالعان فاكتى بويىنشا ءىس قوزعاعان پوليسيا كىسى ولىمىنە كۇدىكتى رەتىندە جەرگىلىكتى ەمشىنى ۇستادى.
«مارقۇمنىڭ تۋىستارى تاراپىنان پوليسياعا رەسمي ارىز ءالى تۇسكەن جوق. دەگەنمەن، وقيعا بويىنشا ق ر قىلمىستىق كودەكسىنىڭ 3 - ءبولىمى، 106 - بابى بويىنشا (كىسى ولىمىنە اكەپ سوعاتىن دەنساۋلىققا قاساقانا اۋىر زالال كەلتىرۋ) سوتقا دەيىنگى تەرگەۋ جۇرگىزىلۋدە. كۇدىكتى رەتىندە ءداستۇرلى ەمەس مەديتسينامەن اينالىساتىن 63 جاستاعى ازامات ۇستالدى» ، - دەلىنگەن وبلىستىق پوليتسيا دەپارتامەنتىنىڭ باسپا ءسوز بايانىندا.
بەلگىلى بولعانىنداي، مارقۇمدى ەمشىگە تۋىستارى اكەلگەن. ولار جاس جىگىتتىڭ ىشىندە جىن بار دەپ ويلاعان. مارقۇم بولعان جىگىت سوڭعى ءۇش جىلدان بەرى ناۋقاس ەكەن.
ەمشى جىگىتتىڭ بويىنان جىندى شىعارامىن دەپ بەس كۇن بويى «ەمدەگەن» . وسىنىڭ سالدارى كىسى ولىمىنە سوقتىرعان بولۋى مۇمكىن.
«سوتقا دەيىنگى تەرگەۋمەن قاراساي اۋداندىق پوليسيا قىزمەتكەرلەرى اينالىسۋدا. ۇستالعان ەمشى قازىر ۋاقىتشا وقشاۋلاۋ يزولياتورىندا قامالدى» ، - دەلىنگەن باسپا ءسوز قىزمەتى تاراتقان اقپاراتتا.