ارزان بيلەتتى قايتارعاندا ۇستالاتىن ايىپپۇل الىنىپ تاستالدى

استانا. قازاقپارات - «جولاۋشىلار تاسىمالى» ا ق ارزان بيلەتتى قايتارعان كەزدە جولاۋشىدان ۇستالىپ قالاتىن ايىپپۇلدى الىپ تاستادى، دەپ حابارلايدى قازاقپارات ءتىلشىسى.

 كومپانيانىڭ باسپا ءسوز قىزمەتىنەن حابارلانىپ وتىرعانداي، بيلەت ساناتتارىنىڭ باعالارىن سارالاۋ ءۇشىن 15 قاڭتاردان باستاپ «جولاۋشىلار تاسىمالى» ا ق بيلەتتى قايتارعانى ءۇشىن جولاۋشىعا 1 مىڭ تەڭگەلىك ايىپپۇل سالۋ ءتارتىبىنىڭ كۇشىن جويادى. بۇل رەتتە ايىپپۇل تەك  3500 تەڭگەگە دەيىنگى بيلەتتەر بويىنشا جويىلادى. اتالمىش شارا جولاۋشىلار تاراپىنان تۇسكەن وتىنىشتەر نەگىزىندە قولعا الىنىپ وتىر.

«قازاقستان رەسپۋبليكاسىنىڭ ينۆەستيتسيالار جانە دامۋ ءمينيسترىنىڭ 2015 -جىلدىڭ 30 - ساۋىرىندەگى №545 بۇيرىعىمەن بەكىتىلگەن «قازاقستان رەسپۋبليكاسىندا تەمىر جول كولىكتەرىمەن جولاۋشىلاردى، باگاجدى، جۇك باگاجىن تاسىمالداۋ ەرەجەسىنىڭ» №255 تارماعىنا سايكەس، قۇنى  3500 تەڭگەلىك بيلەتتى قايتارۋ كەزىندە  1000 تەڭگەلىك كوميسسيالىق تولەم الىنادى. اتالمىش شارا بيلەتتەردى زاڭسىز قايتا ساتۋمەن كۇرەسۋ ماقساتىندا قولعا الىنعان. وسىدان بارىپ بيلەتتەردى قايتارۋ دەڭگەيى 30 پايىزعا تومەندەگەن ەدى»، - دەلىنگەن حابارلامادا.

كومپانيا الداعى ۋاقىتتا جولاۋشىلاردىڭ سۇرانىسىن قاناعاتتاندىرىپ، سەرۆيستى جاقسارتۋ ماقساتىندا وسى باعىتتاعى جۇمىستى جالعاستىرماق.

اۆتور: ايان بەكەن ۇلى