ەلىمىزدە شەتەلدىك ستۋدەنتتەر سانى ۇلعايعان
مۇندا كورشىلەس ەلدەردىڭ جاستارى تەك مەديتسينا ۋنيۆەرسيتەتىندە عانا ەمەس، تەحنيكالىق جوعارعى وقۋ ورىندارىندا دا بىلىمدەرىن شىڭدايدى. كوپشىلىگى وقۋىن ءتامامداعان سوڭ قازاقستاندا قالىپ، جۇمىس ىستەۋگە نيەتتى.
قازىر ءبىر عانا قاراعاندى مەديتسينا ۋنيۆەرسيتەتىندە مىڭعا جۋىق شەتەلدىك ستۋدەنت وقيدى. كوپشىلىگى ءۇندىستان ەلىنەن. ولار ءۇشىن ساباق تەك اعىلشىن تىلىندە وتەدى. «سوعان قاراماستان شەتەلدىك ستۋدەنتتەردىڭ قازاق ءتىلىن ۇيرەنۋگە دەگەن قۇلشىنىسى باسىم»، - دەيدى ۇستازدارى.
ديكسيت اكحيل، مەديتسينا ۋنيۆەرسيتەتىنىڭ ستۋدەنتى:
- ءبىزدىڭ ۇستازداردىڭ كوپشىلىگى اعىلشىن ءتىلىن جەتىك مەڭگەرگەن. زاماناۋي زەرتحانا، كىتاپحانامىز بار. جاتاقحانادا جايلى ءومىر سۇرۋگە بارلىق جاعداي جاسالعان. مەن وقۋىمدى ءتامامداعان سوڭ، وسىندا ۇستاز بولىپ قالعىم كەلەدى.
سوڭعى 4-5 جىلدا مەديتسينا ۋنيۆەرسيتەتىن ءتامامداعان شەتەلدىك 5 تۇلەك قازاقستاندا قالىپ، ەڭبەك ەتۋگە شەشىم قابىلداعان. سونىڭ ءبىرى - مۇحاممەد يرفان قازىر ساياساتتانۋ كافەدراسىندا ساباق بەرەدى. پاكىستاندىق ازامات قاراعاندىدا وتباسىن قۇرىپ، بۇگىندە ءۇش بالا تاربيەلەپ وتىر.
مۇحاممەد يرفان، مەديتسينا ۋنيۆەرسيتەتىنىڭ ۇستازى:
- پاكىستاننان كەلىپ وقىعان ستۋدەنتتەر قاراعاندىداعى مەديتسينا ۋنيۆەرسيتەتىن ماقتاپ، مەنىڭ قۇشتارلىعىمدى وياتتى. سودان سوڭ ينتەرنەتتەن وقۋ ورنى جايلى اقپارات ىزدەي باستادىم. اقىرى تاڭداۋىم قازاقستانعا ءتۇسىپ، وسىندا ءبىلىم الدىم. وتباسىن قۇردىم. كەيىن قالىپ، ەڭبەك ەتۋگە بەل بۋدىم.
قاراعاندىداعى تەحنيكالىق ۋنيۆەرسيتەتتە دە وزبەكستان، رەسەي، اۋعانستاننان كەلگەن 300-گە جۋىق ستۋدەنت وقيدى. شەتەلدىك جاستاردىڭ دەنى «قۇرىلىس»، «ەلەكترو ەنەرگەتيكا»، «اۆتوماتتاندىرۋ جانە باسقارۋ» ماماندىقتارىن تاڭداعان.
گۇلنار جەتەسوۆا، قاراعاندى تەحنيكالىق ۋنيۆەرسيتەتىنىڭ پرورەكتورى:
- ءبىزدىڭ ۋنيۆەرسيتەتتە حالىقارالىق ىنتىماقتاستىقتى دامىتۋعا ارنالعان ارنايى ءبولىم بار. ستۋدەنتتەرگە قۇجاتتارىن راسىمدەۋگە كومەكتەسەدى. جاتاقحانامەن تولىق قامتاماسىز ەتەمىز.
مامانداردىڭ ايتۋىنشا قازىر قاراعاندىلىق جاستاردىڭ اراسىندا دا سىرت ەلدە وقىعىسى كەلەتىندەر كوبەيگەن. تەك وتكەن جىلدىڭ وزىندە 1200 ستۋدەنت ءبىلىم قۋىپ، شەكارا اسىپتى.