12:06, 14 - قاڭتار 2019 | GMT +6
قازاقستان رەسەيدەن بەنزين تاسۋعا تىيىم سالۋ تۋرالى قاۋلى جوباسى ازىرلەندى
استانا. قازاقپارات - ەنەرگەتيكا مينيسترلىگى رەسەيدەن بەنزين جەتكىزۋگە تىيىم سالۋ تۋرالى قاۋلى جوباسىن ازىرلەدى. ماسەلەن، مۇنان بىلاي جانارمايدى تەمىرجول ارقىلى تاسىمالداۋ شەكتەلەدى.
ۆەدومستۆونىڭ باسپا ءسوز قىزمەتى حابارلاۋىنشا، قۇجاتقا قول قويىلىپ جاتىر. رەسمي جاريالانعاننان كەيىن 10 كۇن ىشىندە بۇيرىق كۇشىنە ەنەدى. وسىدان بۇرىن كورشى ەلدەن بەنزين اكەلۋگە وتكەن جىلدىڭ تامىزىندا 3 ايعا شەكتەۋ قويىلعان ەدى.
ەنەرگەتيكا ءمينيسترى قانات بوزىمبايەۆتىڭ ايتۋىنشا، تىيىم ىشكى نارىقتى تۇراقتاندىرۋعا باعىتتالىپ وتىر. «باسقا امال جوق. كەرى جاعدايدا جەرگىلىكتى مۇناي وڭدەۋ زاۋىتتارىنداعى ءوندىرىس قۋاتتىلىعىن ازايتۋعا تۋرا كەلەدى. وسىلايشا وتاندىق پەن شەتەلدىك وندىرۋشىلەر اراسىندا تاڭداۋ جاساۋعا ءماجبۇرمىز. البەتتە ءبىز وتاندىقتى تاڭدايمىز. بۇل ۋاقىتشا شارا».