بەلارۋس پەن رەسەي قارىم- قاتىناسى مۇناي ساۋداسىنا بايلانىستى ناشارلاۋى مۇمكىن

استانا. قازاقپارات - بەلارۋس پەن رەسەي قارىم- قاتىناسى مۇناي ساۋداسىنىڭ سالدارىنان تاعى دا ناشارلاۋى مۇمكىن. سەبەبى رەسمي مينسك ماسكەۋ تاراپى قابىلداعان سالىقتىق وزگەرتۋلەرگە قىرىن قارادى.

 سول ارقىلى رەسەي باتىس ەلدەرگە جول اشاتىن جالعىز وداقتاسىنان ايىرىلىپ قالۋ مۇمكىن ەكەنىن ەسكەرتتى. بۇعان قاتىستى ماسكەۋ رەسمي مالىمدەمە جاساۋعا اسىقپاۋدى قۇپ كورىپ وتىر.

بەلارۋس حالقى تيىننان تەڭگە قۇرالاتىنىن ەندى عانا تۇسىنگەن سىڭايلى. بىلتىر بۇل ەلدە جانار- جاعارماي ءبىر تيىنعا قىمباتتادى. باعا 30 مارتە ءوستى. ءار قىمباتتاعان سايىن 1 تيىننان قوسىلىپ وتىردى. جۇرگىزۋشىلەر قانشا نارازىلىق بىلدىرگەنىمەن، مۇناي ءوندىرۋشى كومپانيالار الەمدىك قارا التىن نارىعىنداعى جاعدايدى سىلتاۋ ەتتى. جىل قورىتىندىسىندا مۇناي باعاسى باررەلىنە 85 دوللارعا قىمباتتاعان. ءبىراق بىرنەشە كۇن بۇرىن ەلدە جانارماي ءبىر تيىنعا ارزاندادى. قازىر 95 ماركالى بەنزيننىڭ ءبىر ليترى 71 سەنتكە پارا- پار.

ەندى بەلارۋس حالقىن بۇل ماسەلەمەن قوسا، مينسك پەن ماسكەۋ اراسىنداعى قارىم- قاتىناس الاڭداتا باستادى. سەبەبى رەسەي 2024 -جىلعا قاراي بەلارۋس يمپورتتايتىن مۇنايعا باج سالىعىن سالۋدى كوزدەپ وتىر. بۇل وداقتاس ەلدەردىڭ ىنتىماقتاستىعىنا كەرى اسەرىن تيگىزۋى مۇمكىن.

ولەگ گايدۋكيەۆيچ، بەلارۋس ليبەرالدى- دەموكراتيالىق پارتياسى ءتوراعاسىنىڭ ءبىرىنشى ورىنباسارى:

- ءبىز رەسەيدەن ارتىق ەشتەڭە سۇرامايمىز. تەك مەملەكەت باسشىلارى اراسىندا جاسالعان كەلىسىمدەر بويىنشا وداقتاستىق تۋرالى شارت تالاپتارى ورىندالۋى ءتيىس. ال جانار- جاعارماي باعاسىنىڭ قىمباتتاۋىنا كەلسەك، بۇل وندىرۋشىلەردىڭ كوپ تابىس تابۋعا دەگەن ىنتاسىنان تۋعان ماسەلە.

جالپى بەلارۋس مۇناي وڭدەۋشى ەكى زاۋىتى ءۇشىن رەسەيدەن 18 ميلليون توننا شيكىزات ساتىپ الادى. ءسويتىپ، ىشكى نارىعىنا جانار- جاعارماي وندىرەدى. ونىڭ باعاسىن رەسمي مينسك تە وسىرمەۋ قاجەتتىگىن العا تارتىپ وتىر. الايدا، بۇل ماسەلە مۇناي وڭدەۋشى زاۋىتتار ارقىلى شەشىلەدى. باعانى كەزەڭ- كەزەڭىمەن وسىرمەسە، شيكىزاتقا كەتەتىن شىعىن وتەلمەي قالادى. سوندىقتان ساراپشىلار جانارماي قۇنى تاعى قىمباتتايدى دەپ بولجام جاسادى.

 ارتەم ۆولچەك، جۇرگىزۋشى:

 - ەۋروپا ەلدەرىنە بارعان كەزىمىزدە بىزدەگى جاعدايدىڭ قالىپتى ەكەنىن تۇسىنەمىز. ونىڭ ۇستىنە، وتاندىق بەنزين ساپاسى جوعارى. ءبىراق، ەلىمىزدەگى جالاقى تومەن. سايكەسىنشە، جانار- جاعارماي باعاسى قالتامىزدى قابادى. تاعى ءبىر ماسەلە مۇناي قۇنى ارزانداسا دا، بەنزين نەگە قىمباتتاي بەرەدى؟

 بەلارۋس پرەزيدەنتى ۇكىمەتكە رەسەيلىك شيكىزاتقا بالاما ىزدەۋدى تاپسىردى. ليتۆا، لاتۆيا سىندى ەلدەردەن مۇناي ساتىپ الۋ مۇمكىندىگىن قاراستىرۋدى مىندەتتەدى. ال ساراپشىلار قازاقستان، يران، ازەربايجان ءتىپتى ۆەنەسۋەلا مەملەكەتتەرىمەن سەرىكتەستىك ورناتۋعا شاقىرىپ وتىر. سولاي بولعان جاعدايدا رەسمي مينسك پەن ماسكەۋ اراسىنداعى قارىم- قاتىناس قالاي وزگەرەدى؟ ونى الداعى ۋاقىت كورسەتەدى.

www.24.kz