كومپوزيتور نۇرلان بەكەنوۆ فاريزا وڭعارسىنوۆاعا ارناپ كۇي شىعاردى

استانا. قازاقپارات - قوعام قايراتكەرى، قازاقتىڭ بەلگىلى اقىنى فاريزا وڭعارسىنوۆاعا ارنالعان «تولعام» اتتى كۇي دۇنيەگە كەلدى. كۇيدىڭ اۆتورى - كومپوزيتور، مادەنيەت قايراتكەرى نۇرلان بەكەنوۆ، دەپ حابارلايدى قازاقپارات.

 استانا مەملەكەتتىك اكادەميالىق فيلارمونياسى حالىق اسپاپتارى وركەسترىنىڭ ديريجەرى، كۇيشى نۇرلان بەكەنوۆ اتالعان كۇيدىڭ قالاي تۋعانىن ايتىپ بەردى.

«فاريزا وڭعارسىنوۆانىڭ قازاق ادەبيەتىندەگى الاتىن ورنى ەرەكشە ەكەنى بەلگىلى. بۇكىل تۇركى الەمىنىڭ رۋحاني بايلىعىنا قوسقان ۇلەسى دە وتە مول. ول تەرەڭ ليريكالىق ولەڭدەر جازعان اقىن. سونىمەن قاتار ادامعا قايرات بەرەتىن داۋىلپاز جىرلاردىڭ دا اۆتورى. ادەبيەتىمىزگە ۇلكەن جاڭالىق الىپ كەلگەن قالامگەر عوي. ءوزىم ءبىراز ۋاقىت بويى فاريزا اقىننىڭ جان- دۇنيەسىن اشاتىن، حالقىنا ايتا الماي كەتكەن ويلارىن جەتكىزۋگە تىرىساتىن ءبىر كۇي شىعارسام دەگەن تولعانىستا ءجۇردىم. ونەردەگى ۇستازىم، استانا مەملەكەتتىك اكادەميالىق فيلارمونياسى حالىق اسپاپتارى وركەسترىنىڭ كوركەمدىك جەتەكشىسى ءارى باس ديريجەرى، قازاقستاننىڭ ەڭبەك سىڭىرگەن قايراتكەرى، پروفەسسور ايتقالي جايىموۆ اعامىز جانە باسقا دا ازاماتتار فاريزاعا ارنالعان كۇي شىعاتىن بولسا، ول ۇلتتىق ونەرىمىزگە قوسقان ناقتى ۇلەسىمىز بولاتىنىن ايتتى. ماعان وسى تۇرعىدا ويلانىپ، جاڭا شىعارما جازۋ تۋرالى كەڭەس بەردى. مىنە، جۋىردا عانا جاڭا كۇي دۇنيەگە كەلدى»، - دەدى قازاقپارات تىلشىسىنە بەرگەن سۇحباتىندا كومپوزيتور نۇرلان بەكەنوۆ.

 بۇل ف. وڭعارسىن قىزىنا ارنالعان تۇڭعىش كۇي ەكەنىن ايتا كەتكەن ءجون. 23 - قاڭتار كۇنى «استانا» كونسەرت زالىندا ەلوردامىزدىڭ مەملەكەتتىك اكادەميالىق فيلارمونياسى حالىق اسپاپتارى وركەسترىنىڭ ۇجىمى فاريزا وڭعارسىنوۆانىڭ 80 جىلدىعىنا ارنالعان ارنايى ادەبي- مۋزىكالىق كەش وتكىزگەلى وتىر. سول كەشتە اقىنعا ارنالعان جاڭا اندەر جانە اتالعان كۇي ورىندالادى دەپ كۇتىلۋدە.

اۆتور: ەلجان ەرالى