قىزىلوردا وبلىسىندا ەگىزدەر اۋىلى بار

None
None
قىزىلوردا. قازاقپارات -  قىزىلوردا وبلىسى قازالى اۋدانىنداعى ءۇرماش تۇكتىبايەۆ اتىنداعى اۋىلدى ەگىزدەر اۋىلى دەپ اتايدى.

ويتكەنى، ەلدىمەكەندە ەگىزدەر ءجيى دۇنيەگە كەلەدى ەكەن، دەپ حابارلايدى قازاقپارات ءتىلشىسى.

اتالمىش اۋىلدا 1800 دەن استام ادام تۇرادى، وتباسىلار سانى 300 دەن اسىپ جىعىلادى. سوڭعى شيرەك عاسىردان استام ۋاقىتتان بەرى مۇندا وننان استام ەگىز جارىق دۇنيە ەسىگىن اشقان.

ولاردىڭ اراسىندا ۇلكەنى سانالاتىن جانارىس جانە بەكارىس ساپايەۆتار بۇگىندە وتىز جاسقا تاياپ قالدى. ەگىز جىگىتتەر ەلىمىز تاۋەلسىزدىك العان جىلداردا ومىرگە كەلگەن. بۇگىندە ءبىلىم سالاسىندا جەمىستى قىزمەت اتقارىپ كەلەدى. سول جىلى دۇنيەگە كەلگەن المات پەن سامات تا ەلىمىزدىڭ وركەندەۋىنە ءوز ۇلەسىن قوسىپ جۇرگەن جاندار. بۇل جىگىتتەر مۋزىكالىق ءبىلىم الىپ، قازىرگى تاڭدا ونەر سالاسىندا ەڭبەك ەتۋدە.



وسىنداي ەگىز جىگىتتەر ايماقوۆتار وتباسىندا دا بار. بۇل وتباسىنداعى ەرجان قوستاناي وبلىسى رۋدنىي قالاسىنداعى پەداگوگيكالىق ينستيتۋتتا وقىسا، نۇرجان استانادا تەمىرجول ماماندىعى بويىنشا ءتالىم العان. ولاردىڭ نەمەرە باۋىرلارى ەدىل مەن جايىق ابزالدار قازالى كولىك- تەحنيكالىق كوللەدجىندە ماماندىق الدى.

ەدىل مەن جايىق ابزالدار وزدەرىنىڭ ەگىز بولۋىنا بايلانىستى ءارتۇرلى قىزىقتى وقيعالاردى باستان وتكەرگەنىن ايتۋدا. «ءبىز وتە ۇقساسپىز. دوستارىمىز ءىس-ارەكەتتەرىمىزدى سىرتتاي قاداعالاپ جۇرەتىنىن اڭعارامىز. ۇقساستىعىمىزدىڭ پايداسىن كوپ كوردىك»، - دەيدى ولار.

سونداي-اق، كيىكباي ناعىزاليەۆ پەن ايىمگۇل الدامبەرگەنوۆتىڭ وتباسىندا 1997-جىلى ەرقانات پەن نۇرقانات تۋعان. بۇگىندە جيىرما جاستان اسقان جىگىتتەر اتا-اناسىنىڭ ءۇمىتىن اقتاۋعا تىرىسىپ كەلەدى. بۇل وتباسىندا تاعى ءبىر ەگىز بار. قازىر 13 جاسقا كەلگەن بەكزات پەن سايات - وزدەرىن جاقسى قىرىنان تانىتىپ جۇرگەن ورەندەر.

بيىل18 گە تولعان نۇرسۇلتان مەن سارا دا وسى اۋىلدا دۇنيەگە كەلگەن.



2006-جىلى اۋىلدا تاعى ەكى ەگىز اتا-انالارىنىڭ كوز قۋانىشىنا اينالدى. اتاپ ايتقاندا، ايدانا مەن ايبەك يگەنبەرگەن، ەركەماي مەن ەركەتاي اساندار دۇنيە ەسىگىن اشتى.

ال 2010-جىلى تولعاناي مەن تولاعاي امانجول، 2012-جىلى اقتىلەك پەن اقنيەت جاقايىمدار اۋىلدىڭ، اعايىننىڭ قۋانىشى بولدى. قازىرگى كۇنى اۋىلداعى ەگىزدەردىڭ ەڭ كىشىسى مارجان مەن ايجان دا شاڭىراقتى شاتتىققا تولتىرىپ كەلەدى.

اۋىلدىڭ اكۋشەر دارىگەرى ءاليا ايبەرگەننىڭ ايتۋىنشا، اۋىلدا جىلىنا 45-50 نارەستە ومىرگە كەلەدى. ەگىزدەردىڭ ءجيى تۋۋىن قالىپتى جاعداي رەتىندە باعالايتىنىن ايتادى. بارلىق نارەستە جارىق دۇنيەگە دەنى ساۋ كەلگەن.

ەلىمىزدە ەگىزدەر ءجيى دۇنيەگە كەلەتىن وزگە دە اۋىلدار بار. ولاردىڭ ءبىرى - قوستاناي وبلىسى سارىكول اۋىلىنداعى ءتاپىل اۋىلى. وندا 28 ەگىز دۇنيە ەسىگىن اشقان ەكەن.

سوڭعى جاڭالىقتار