استانادا مۇزدان جاسالعان ەڭ ۇزدىك مۇسىندەردىڭ حالىقارالىق بايقاۋى باستالدى
ەلوردا اكىمدىگىنىڭ رەسمي سايتىندا ءمالىم ەتىلگەندەي، حالىقارالىق كونكۋرستىڭ اشىلۋى بۇگىن بوتانيكالىق باقتىڭ اۋماعىندا ءوتتى.
ماقسات - سۋرەتشىلەرگە شىعارماشىلىق تاجىريبە الماسۋعا جاعداي جاساۋ، قالا تۇرعىندارى مەن قوناقتارىنىڭ بوس ۋاقىتىن ءتيىمدى ۇيىمداستىرۋ، استانانىڭ يميدجىن مادەني تۋريزم ورتالىعى رەتىندە قالىپتاستىرۋ.
«مۇزدى مۇسىندەر «مىڭ ءبىر ءتۇن» تاقىرىبىندا ەسىل وزەنىنەن ويىلىپ الىنعان مۇزداردان جاسالادى. قىس ماۋسىمىنىڭ سوڭىنا دەيىن قانداي مۇسىندەر سوعىلاتىنى ءبىز ءۇشىن دە جۇمباق. ولار بوتانيكالىق باق كەلۋشىلەرىن قۋانتاتىن بولادى»، - دەدى ەسىل اۋدانى اكىمىنىڭ الەۋمەتتىك ماسەلەلەر جونىندەگى ورىنباسارى نۇرلان وماروۆ.
بايقاۋعا قازاقستان، رەسەي جانە قىتاي ەلدەرىنەن 6 كوماندا قاتىسۋدا. قازاقستاندىق كوماندا اقتوبە، قاراعاندى، ماڭعىستاۋ، باتىس قازاقستان، شىعىس قازاقستان، قىزىلوردا، قوستاناي، اقمولا جانە الماتى وبلىستارىنىڭ مۇسىنشىلەرىنەن قۇرالعان. ال استانا قالاسىنىڭ اتىنان بىردەن 4 كوماندا قاتىسۋدا. ءار كوماندا قازىلار القاسىنا ءبىر ءمۇسىندى تانىستىراتىن بولادى. جەڭىمپازدار 16- قاڭتار كۇنى بەلگىلى بولادى.
«گران-پري جانە جۇلدەلى ورىندارعا يە بولعاندار كۋبوكتارمەن، ديپلومدارمەن جانە اقشالاي سەرتيفيكاتتارمەن ماراپاتتالادى. باسقا قاتىسۋشىلار دا نازاردان تىس قالمايدى»، - دەيدى ۇيىمداستىرۋشىلار.