تۇركىستاندا شەتەلدىكتەردى تاڭعالدىرعان اعاش شەبەرى تۇرادى

None
None
استانا. قازاقپارات - تۇركىستان شاھارىندا عاجايىپ تۋىندىلارىمەن شەتەلدىك تۋريستەردى تاڭداي قاقتىرعان اعاش شەبەرى تۇرادى، دەپ حابارلايدى «حابار 24».

گاۋحاربەك كۇنقوجايەۆ بۇگىندە ۇلتتىق ناقىشتاعى بوياۋى قانىق دۇنيەلەر جاساپ، ونى جاس ۇرپاقتىڭ بويىنا سىڭىرۋدە. گاۋحاربەك كۇنقوجايەۆتىڭ نەگىزگى ماماندىعى مۋزىكانت.

شىمكەنتتەگى بۇرىنعى پەداگوگيكالىق ونەر ينستيتۋتىنىڭ بايان سىنىبىن بىتىرگەن. ءبىراق ءوز سالاسى بويىنشا ەكى جىل عانا جۇمىس ىستەپتى.

كەيىن بالا كۇنگى ارمانى - ۇلتتىق اسپاپ جاساۋدى قولعا العان.

«وعان ەكىنىڭ ءبىرى دومبىرا جاساپ، ۇلتتىق ونەردىڭ قۇنىن ءتۇسىرىپ جىبەرگەنى سەبەپ بولدى»، - دەيدى ول.

سوڭعى 10 جىلدىڭ كولەمىندە ادامعا وي سالاتىن سالماقتى دۇنيەلەر جاساپ ءجۇر.

«ءدال مىناداي جۇمىس شىعارۋ ءۇشىن 1,5 جىل ۋاقىت كەتىپ قالادى. ويتكەنى ءبىرى مەن ءبىرىن بايلانىستىرىپ كەلتىرۋ وتە قيىن. ول جەردە وي تۋىنداتۋ، بايلانىسپاسا بۇنداي تۋىندى شىقپايدى. ويعا كوپ ۋاقىت كەتەدى»، - دەيدى شەبەر.

گاۋحاربەك كۇنقوجايەۆتىڭ ايتۋىنشا، ءاربىر شەبەر مۋزىكانت بولۋى ءتيىس.

«جاساعان دۇنيەڭنىڭ بويىنان اسەم ءبىر اۋەن توگىلىپ تۇرسا، كورگەن ادامنىڭ جانى راحاتقا بولەنەدى»، - دەيدى.

ال جاقسى دۇنيە جاساۋ ءۇشىن ساپالى اعاش قاجەت. شەبەر ونى ءوزى تۋىپ-وسكەن سىردىڭ بويىنان ىزدەيدى. ورمان- توعايدى كەزىپ، قۋراعان ورىك پەن جاڭعاق، ۇيەڭكى مەن قايىڭ سياقتى اعاشتاردى جينايدى. ءاربىر دۇنيەسىن عىلىمي ىزدەنىسپەن جاسايدى. ونى تۋىندىلارىنان دا بايقاۋعا بولادى. سوندىقتان بولار شەتەلدىك تۋريستەر شەبەردىڭ قولىنان شىققان جادىگەرلەرگە قۇمار.

«شەتەلدەن كەپ جاتىر. انگليا، يتاليا، گوللانديادان مادەنيەتى جەتىلگەن. سولار تاڭعالىپ، اينالىپ تۇرعاندا مەن سۇرايمىن - «سىزدەردە بار ما، مۇنداي جۇمىس؟» دەپ، ولار تاڭعالادى «بىزدە جوق بۇنداي جۇمىس» دەپ تاڭعالعاننان كەيىن، نەگە وسىنى شىعارماسقا دەپ «ونەگە ونەر» دەپ ات قويىپ، قازىر دايىنداپ جاتىرمىن. بۇنى ساحنالاپ سويلەتۋ كەرەك، سوعان جۇمىس ىستەپ جاتىرمىن. قارجى تاۋىپ، اقشا تابايىن دەگەن مەندە جوق. مەنىڭ بايلىعىم - ونەرىم!»، - دەيدى گ. كۇنقوجايەۆ.

سوڭعى جاڭالىقتار