تۇركىستان وبلىسىندا پروكۋراتۋرا ايىپپۇل ءوندىرۋدى قاداعالاۋدى كۇشەيتتى
وبلىستىق پروكۋراتۋرانىڭ جۇرگىزگەن تالداۋى وتكەن جىلى اكىمشىلىك ايىپپۇلدىڭ ءوندىرىلۋ دەڭگەيى تومەندەگەنىن كورسەتكەن.
بۇل سوت ورىنداۋشىلارىنىڭ ماجبۇرلەپ ءوندىرۋ شارالارىن ۋاقتىلى ءارى پارمەندى جۇرگىزبەيتىنىن ايعاقتاعان. اتالعان كەمشىلىكتى جويۋ ماقساتىندا وتكەن جىلى وبلىس پروكۋراتۋراسى ۋاكىلەتتى ورگانداردى ۇيلەستىرۋ ارقىلى ايىپپۇلدى قاساقانا تولەمەۋشىلەردىڭ ليتسەنزيالارى مەن جۇرگىزۋ كۋالىكتەرىن، مۇلىكتەرىن انىقتاۋعا باعىتتالعان بىرلەسكەن ءىس- شارالاردى ۇيىمداستىرعان.
ودان بولەك، اكىمشىلىك ايىپپۇلدى ورەسكەل تولەمەگەن اۆتوكولىك يەلەرىن انىقتاۋ بويىنشا رەيدتىك ءىس-شارالار ۇيىمداستىرىپ، ءاربىر پاتەر مەن ءۇي يەلەرىنە ايىپپۇلدى تولەۋ قاجەتتىگىن تۇسىندىرگەن.
انىقتالعان قۇقىق بۇزۋشىلىقتارعا قاتىستى 31 نارازىلىق پەن 71 ۇسىنىس ەنگىزىلىپ، تارتىپتىك جاۋاپكەرشىلىككە 39 قىزمەتكەر تارتىلعان. تاعى 6 تۇلعا اكىمشىلىك جازاعا تارتىلىپ، 7 مىڭنان استام قۇجات پروكۋرورلىق شارالارمەن ورىندالعان.