تۇماۋدى ءدارىسىز ەمدەۋ جولدارى

نۇر-سۇلتان. قازاقپارات - سۋىق كۇندەرى ادامداردىڭ كوپشىلىگى تۇماۋمەن اۋىرادى. زاماناۋي مەديتسينا ستاتيستيكاسىنىڭ مالىمەتىنشە، الەم بويىنشا ادامداردىڭ دارىگەرگە ءجيى قارالۋىنىڭ باستى سەبەبى دە وسى تىنىس الۋ جولدارىنىڭ جۇقپالى اۋرۋى ەكەن.

تۇماۋدى ءدارىسىز ەمدەۋدىڭ جولدارىن ۇسىنامىز. تۇماۋدى ادەتتە دارىگەر جازىپ بەرەتىن ارنايى ءدارى- دارمەكپەن ەمدەيدى. الايدا كۇردەلى ەمەس تۇماۋدى حالىقتىق مەديتسينامەن دە ەمدەۋگە بولادى.

سەبەبى حالىقتىق مەديتسينا ارقىلى اۋرۋدى كەتىرىپ قانا قويماي، يممۋنيتەتتى كوتەرۋگە بولادى. قازىرگى كەي دارىلەردىڭ ءوزى حالىقتىق مەديتسيناعا نەگىزدەلە پايدا بولعان. كۇردەلى تۇماۋ بولعان كەزدە حالىقتىق قۇرالداردى دارىگەر جازىپ بەرگەن دارىلەرمەن بىرگە قولدانسا، ول اۋرۋدان جىلدام قۇتىلۋعا كومەكتەسەدى. تۇماۋ ادەتتە مۇرىن بىتەلۋدەن باستالادى.

الايدا، بىردەن ءدارى ءىشۋدى باستاماڭىز. جىلى شىرعاناق (وبلەپيحا) نەمەسە يتمۇرىن مايىن مۇرىنعا تامىزىپ كورىڭىز. سونىمەن قاتار، سارىمساق تامشىسىن دايىنداۋعا بولادى.

ول ءۇشىن 2-3 سارىمساقتى ۇساقتاپ، وعان شامامەن 50 م ل قايناعان سۋ قۇيىپ، جىلى جەردە 2 ساعاتتاي ۇستاۋ كەرەك. الىنعان تۇنبانى كۇنىنە 3-4 رەت تامىزۋ كەرەك. تابيعي جوكە بالىن قايناعان سۋمەن 1:2 قاتىناستا ارالاستىرۋ ارقىلى دا، تۇماۋعا قارسى ەمدىك ءدارى جاساۋعا بولادى. ونى 5-8 تامشىدان كۇنىنە 3-4 رەت تامىزۋ كەرەك.

جۇقپانىڭ ودان ءارى تاراماۋىنا كومەكتەسەتىن ءادىستىڭ ءبىرى - تاماقتى شوپتەر قايناتپاسى نەمەسە تۇنباسىمەن شايۋ. ەمدىك شوپتەر كەز كەلگەن ءدارىحانادا قولجەتىمدى باعادا ساتىلادى.

ولاردى دايىنداۋ وڭاي: 1 اس قاسىق شوپكە 1 ستاقان قايناعان سۋ قۇيىپ، تارەلكەمەن 20 مينۋتقا جاۋىپ قويۋ كەرەك. بۇل تۇنبامەن تاماقتى كۇنىنە 5 رەت شايۋ كەرەك. تۇماۋ كەزىندە انگينا پايدا بولادى. ەگەر انگينانىڭ باستالايىن دەپ تۇرعانىن سەزسەڭىز، ءار 3 ساعات سايىن ليموندى قابىعىن ارشىماي شايناۋعا تىرىسىڭىز نەمەسە جاڭا سىعىلعان ليمون سۋىمەن تاماعىڭىزدى شايىڭىز. شايعان سوڭ 1 ساعاتتاي ەشتەڭە جەمەي جانە ىشپەي تۇرا تۇرىڭىز.

ەگەر تەمپەراتۋرا بولماسا، تىنىس الۋ جولدارىن ەمدەۋ ءۇشىن ۇيدە ينگالياتسيا (تاماقتى بۋلاۋ) جاساۋعا بولادى. ينگالياتسيا 15 مينۋتتان ارتىققا سوزىلماۋ كەرەك. ەگەر ۇيدە ينگالياتور بولماسا، قايناعان سۋى بار شاينەككە 10 تامشى يود نەمەسە 1 شاي قاسىق پياز سۋىن (نەمەسە 5 تامشى سامىرسىن مايىن) قۇيىپ، ينگالياتسيا جاساۋعا بولادى.

سونىمەن قاتار، سارىمساق ينگالياتسياسى جاقسى كومەكتەسەدى. بىرنەشە سارىمساقتى ەزىپ بينتكە سالىڭىز. سول ءبينتتى قىزدىرىلعان بوس شاينەككە سالىپ، قاقپاعىن جاۋىپ قويىڭىز.

شاينەكتىڭ شۇمەگىن اۋزىڭىزعا سالىپ، اۋزىڭىزبەن باياۋ تىنىس الىپ، مۇرنىڭىزبەن دەم شىعارىڭىز. اۋزىڭىزبەن تىنىس العاندا مۇرنىڭىزدى قولىڭىزبەن قىسىپ تۇرىڭىز. بۇل پروتسەدۋرا شىدامدىلىقتى قاجەت ەتكەنمەن، جاقسى ناتيجە بەرەدى. ونى كۇنىنە 6 رەت جاساساڭىز، تۇماۋدى، جوتەلدى جانە انگينانى كەتىرەدى.

ءوز دەنساۋلىعىڭىزعا قاۋىپ توندىرمەڭىز: كەز كەلگەن اۋرۋدىڭ العاشقى بەلگىلەرىن بايقاعان كەزدە دارىگەرگە قارالۋعا تىرىسىڭىز. جۇمىسقا نەمەسە ساباققا بارساڭىز، تۇماۋدى ودان ءارى ۇلعايتىپ الاسىز جانە باسقالارعا جۇقتىراسىز. سوندىقتان مۇمكىندىك بولسا، ۇيدە جاقسىلاپ ەمدەلگەن ءجون. تۇماۋ كەزىندە ۋايىمداۋدىڭ جانە اۋىرىپ قالۋدان قورقۋدىڭ قاجەتى جوق. سەبەبى ءبىزدىڭ ويىمىز جۇزەگە اسادى. باستىسى، دەنساۋلىعىڭىزدى كۇتىپ، ءارقاشان يممۋنيتەتىڭىزدى نىعايتىپ ءجۇرىڭىز.

ئ