كيىمدەگى تۇيىرشىكتەن قالاي ارىلۋعا بولادى

نۇر-سۇلتان. قازاقپارات - كيىمدى ۇزاق ۋاقىت بويى كيسەڭىز، تۇيىرشىكتەر پايدا بولىپ، كوركى بۇزىلاتىنى انىق.

بۇل اسىرەسە توقىلعان بۇيىمدار مەن جۇننەن جاسالعان ماتەريالدارعا ءتان. انگور ءجۇنى مەن موحەردەن تىگىلگەن كيىمدەردى كيەتىن ادامدار بۇعان ءجيى باس اۋىرتادى، دەسە دە بۇل تۇيىرشىكتەردەن ارىلۋعا ابدەن بولادى.

كيىمنەن شيىرشىقتالعان تۇيىرشىكتەردى قالاي الۋ قاجەت

1. ءادىستىڭ ەڭ قاراپايىم جانە شىعىنسىز ءتۇرى جيناقتالعان تۇيىرشىكتى قولمەن جۇلۋ. بۇل نۇسقا تۇيىرشىكتەر كوپ بولماعان جاعدايدا ىسكە اسادى. مانيكيۋرگە پايدالاناتىن قايشىنى دا پايدالانۋعا بولادى.

2. تىعىز، تەگىس ەمەس ماتادان جاسالعان بۇيىمدى قىرىنۋعا ارنالعان قۇرالمەن تازالاۋعا بولادى. مۇنى تۇيىرشىك كوپ ءارى ۇساق بولسا جاساۋ مۇمكىن. كيىمدى تەگىس جەرگە جايىپ، قولمەن ماتەريالدى سوزىپ، ءارى قاراي ساقتىقپەن تازالاۋ قاجەت. ماتانى كەسىپ الماۋ ءۇشىن قاتتى باتىرماۋ كەرەك.

3. كيىمگە ارنالعان تازالاعىشپەن. كەز كەلگەن تۇرمىستىق زاتتار ساتاتىن دۇكەندەردەن مۇنداي تازالاعىشتى ساتىپ الۋعا بولادى. پالتو، پيدجاكتان ۇساق قىلداردى، قوقىستاردى تازالاۋعا دا بولادى. مىنە، وسى قۇرالمەن تۇيىرشىكتەردى دە الۋ مۇمكىن.

4. ەگەر جاعدايدى تۇزەۋگە مۇمكىندىك تە، نيەت تە بولماسا، ەڭ وڭاي ءادىس - كيىمدى حيميالىق تازارتۋعا بەرۋ. ول جەردەگى ماماندار تۇيىرشىكتەردى الىپ، كيىمدى تازارتادى.

5. توقىلعان كيىمنەن جينالىپ قالعان تۇيىرشىكتى قاراپايىم ءتىس شەتكاسىنىڭ كومەگىمەن تازالاۋعا بولادى. جاشىكتەن ەسكى شەتكانى تاۋىپ الىپ، كيىمدى تارتىپ تۇرىپ، تازالاۋ كەرەك.

6. كادىمگى سكوتچتىڭ كومەگىمەن. جابىسقاق لەنتانى تۇيىرشىك بار جەرگە جابىستىرىپ، سوسىن بىردەن جۇلىپ الۋ قاجەت. ماتا، ارينە، بۇلىنە قويماس، ال تۇيىرشىك پەن قوقىس سكوتچتا قالادى.

7. تۇيرشىكتى جوياتىن ماشينا ساتىپ الۋ. بۇل قۇرال كەز كەلگەن تۇرمىستىق تەحنيكا ساتاتىن جەردەن تابىلادى. سىرت كەلبەتى ەرلەردىڭ قىرىناتىن قۇرالدارىنا ۇقسايدى. ول كەز كەلگەن ماتاداعى ءىرىلى- ۇساقتى تۇيىرشىكتەردى كەتىرە الادى.

كيىمدە تۇيىرشىك از پايدا بولۋى ءۇشىن ونى جۇمسارتقىش كونديسيونەر قوسىپ جۋعان دۇرىس.

دەرەككوز: Flytothesky.ru