نەكە شارتى دەگەنىمىز نە؟ نە ءۇشىن كەرەك؟
نەكە (ەرلى-زايىپتىلىق) جانە وتباسى تۋرالى كودەكستىڭ 39-بابىنا سايكەس نەكەگە وتىراتىن (ەرلى-زايىپتى بولاتىن) ادامداردىڭ كەلىسىمى نەمەسە ەرلى-زايىپتىلاردىڭ نەكەدەگى (ەرلى- زايىپتىلىقتاعى) جانە (نەمەسە) ول بۇزىلعان جاعدايداعى مۇلىكتىك قۇقىقتارى مەن مىندەتتەرىن ايقىندايتىن كەلىسىم نەكە شارتى دەپ تانىلادى.
نەكە شارتىن كەز-كەلگەن ۋاقىتتا جاساي الاسىز. ياعني، كودەكستىڭ 40-بابىنا سايكەس نەكە شارتىن نەكەنى تىركەۋگە ءوتىنىش بەرگەن كۇننەن باستاپ، نەكەنى تىركەۋ راسىمىنە دەيىن، سونداي-اق نەكە كەزەڭىنىڭ كەز-كەلگەن ۋاقىتىندا جاساسۋعا بولادى.
نەكە شارتىن جاساسۋ ءۇشىن قايدا جۇگىنۋ كەرەك جانە نە قاجەت؟
نەكە شارتى جازباشا نىساندا جاسالادى جانە مىندەتتى نوتاريالدىق كۋالاندىرۋعا جاتادى. نەكە شارتىن جاساسۋ ءۇشىن ەرلى-زايىپتىلاردىڭ ەكەۋىنە دە نوتاريۋسقا بارۋ قاجەت، وزىمەن بىرگە
نەكە قيۋ تۋرالى كۋالىك.
ەرلى-زايىپتىلاردىڭ ءارقايسىنىڭ جەكە باسىن كۋالاندىراتىن قۇجات.
ەگەر شارت بۇرىن بار مۇلىككە قاتىستى جاسالسا، مۇلىككە قۇقىقتى بەلگىلەيتىن قۇجاتتار، سونداي-اق مۇلىكپەن مامىلەلەردى راسىمدەۋگە قاجەتتى باسقا قۇجاتتار (بۇل قاجەت بولعان جاعدايدا ادىلەت ورگانىنىڭ جىلجىمايتىن مۇلىكتىڭ بولماۋى (بولۋى) تۋرالى، جىلجىمايتىن مۇلىككە تىركەلگەن جانە توقتاتىلعان قۇقىقتار تۋرالى انىقتامالار بەرۋ، جىلجىمايتىن مۇلىككە تىركەلگەن قۇقىقتار (اۋىرتپالىقتاردى) جانە ونىڭ تەحنيكالىق سيپاتتامالارى تۋرالى انىقتاما، بۇل قاجەت بولعان جاعدايدا) بولۋى ءتيىس.
نەكە شارتى قانداي جاعدايلاردا كۇشىن جويادى؟
نەكە شارتىن بىرلەسكەن كەلىسىم بويىنشا كەز-كەلگەن ۋاقىتتا وزگەرتۋگە نەمەسە بۇزۋعا بولادى. نەكە شارتىن بۇزۋ نەمەسە وزگەرتۋ تۋرالى كەلىسىم نەكە شارتى سياقتى، ياعني نوتاريۋستا جەكە باسىن كۋالاندىراتىن قۇجاتتارمەن جانە جىلجىمايتىن مۇلىككە قۇقىقتى بەلگىلەيتىن قۇجاتتارمەن ەرلى-زايىپتىلاردىڭ ەكەۋىنىڭ دە قاتىسۋىمەن جاسالادى.
نەكە شارتىن ورىنداۋدان ءبىر تاراپتى باس تارتۋعا رۇقسات ەتىلمەيدى، ونىڭ تالاپتارىن ەرلى-زايىپتىلاردىڭ ەكەۋى دە مىندەتتى تۇردە ورىنداۋى ءتيىس. سونداي-اق ەگەر كەلىسىمگە بىرلەسە جەتۋ مۇمكىن بولماسا، نەكە شارتىن سوت شەشىمى بويىنشا بۇزۋعا نەمەسە وزگەرتۋگە بولادى.