تايلاند قازاقستاندىقتارعا تەگىن ۆيزا بەرۋدى جالعاستىرادى

استانا. قازاقپارات - تايلاند ۇكىمەتى قازاقستاندىق تۋريستەرگە تەگىن ۆيزا بەرۋ مەرزىمىن ۇزارتتى، دەپ حابارلايدى قازاقپارات ق ر سىرتقى ىستەر مينيسترلىگىنە سىلتەمە جاساپ.

«تايلاند ۇكىمەتى 20 ەلدەن، سونىڭ ىشىندە قازاقستاننان كەلگەن تۋريستەرگە تەگىن ۆيزا بەرۋ مەرزىمىن 2019-جىلدىڭ 30- ساۋىرىنە دەيىن ۇزارتۋ تۋرالى شەشىم قابىلدادى»، - دەپ حابارلادى ق ر سىرتقى ىستەر مينيسترلىگى.

مينيسترلىك اتاپ وتكەندەي، بۇعان دەيىنگى ۆيزالىق الىمداردان بوساتۋ رەجىمى 2019-جىلدىڭ 13- قاڭتارىنا دەيىن جارامدى بولعان.

اتاپ وتكەن ءجون، تايلاندقا تۋريستىك ۆيزا الۋ ءۇشىن كەلۋشىلەر 2 مىڭ بات (شامامەن 23400 تەڭگە) تولەۋ قاجەت. 2018-جىلدىڭ 15- قاراشاسىندا 2019-جىلدىڭ 13-قاڭتارىنا دەيىن ءبىرقاتار ەلدەردىڭ، سونىڭ ىشىندە قازاقستان ازاماتتارى ءۇشىن تايلاندقا كەلۋ كەزىندە ۆيزالىق الىمدار الىنىپ تاستالعان ەدى.