دەپۋتات مينيسترگە جانتۇرشىگەرلىك جول اپاتتارى تۋرالى ساۋال جولدادى
«2018 -جىلى جول- كولىك وقيعاسىنان 2 مىڭنان استام ادام كوز جۇمدى، 20445 ادام جاراقات الدى. بەيبىت زاماندا ادامدار سوعىس كەزىندەگى سەكىلدى قازا بولۋدا. زارداپ شەككەندەردىڭ جالپى سانىنان 70 پايىزعا جۋىعى ەڭبەككە جارامدى جاستا. جول-كولىك وقيعاسى سالدارىنان زارداپ شەككەندەردىڭ كوبىسى مۇگەدەك بولىپ قالادى»، - دەدى دەپۋتات ءماجىلىستىڭ جالپى وتىرىسىندا.
ونىڭ سوزىنە قاراعاندا، ەلىمىز 28 جىل ىشىندە 82 مىڭعا تارتا ادامدى جوعالتتى، ال زارداپ شەككەندەر جارتى ميلليونعا جەتتى.
«ەگەر دە بىزدە قازا بولعاندار سانى جىل سايىن تومەندەسە، ال زارداپ شەككەندەر كورسەتكىشى 2018 -جىلدىڭ 11 ايىندا 1991 -جىلداعى دەڭگەيدەن اسىپ ءتۇستى. بۇل رەتتە وسى جىلدارى اۆتوكولىك سانى ارتقانى تۇسىنىكتى. دەگەنمەن دە جول- كولىك وقيعالارىنىڭ كوبىسى كولىكتەگى اقاۋ نەمەسە جول ينفراقۇرىلىمى جاعدايىنا بايلانىستى ەمەس. جولداعى اپاتتىڭ باسىم بولىگى جول قوزعالىسىنداعى ادامداردىڭ، جۇرگىزۋشىلەردىڭ كىناسىنەن ورىن الۋدا. بۇل ءوز كەزەگىندە بارلىق ج ك و- نىڭ 95 پايىزىن قامتىپ وتىر»، - دەدى دەپۋتات.
وسى ورايدا پ. كازانسەۆ قالىپتاسقان جاعدايدى كەشەندى تۇردە شەشۋ كەرەكتىگىن تىلگە تيەك ەتتى.
«كولىك جۇرگىزۋدى ۇيرەتەتىن ۇيىمدارعا قاتىستى، سونداي-اق جۇرگىزۋشى كۋالىگىن الۋ بويىنشا ەمتيحاندار مەن راسىمدەرگە تالاپتاردى كۇشەيتۋ كەرەك. جولاۋشىلاردى تاسىمالداۋدى ۇيىمداستىرۋ تۇرعىسىندا قادامداردى قايتا قاراۋ قاجەت»، - دەدى ول.
ەستەرىڭىزگە سالا كەتەيىك، 2018 -جىلعى 29 -جەلتوقساندا الماتىداعى سەيفۋللين مەن اباي كوشەلەرىنىڭ قيىلىسىندا Mitsubishi Galant پەن «Mercedes Benz G-55» كولىكتەرى سوقتىعىسقان. جول اپاتىنان Mitsubishi Galant كولىگىندە بولعان ءۇش ادام، بەلگىلى اكتريسا شولپان ەلگەزەكوۆا مەن ونىڭ قۇربىسى جانە Mitsubishi Galant جۇرگىزۋشىسى كوز جۇمدى.
ال كولىكتە بولعان م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ اكتريساسى جانە تەلەجۇرگىزۋشى ايزادا ساتىبالديەۆا التى قابىرعاسى سىنىپ، اسا اۋىر حالدە الماتى قالالىق شۇعىل كومەك كورسەتۋ اۋرۋحاناسىنىڭ جانساقتاۋ بولىمىنە جەتكىزىلگەن ەدى.