ەگيپەتتە ءال-فارابي ورتالىعى اشىلدى

استانا. قازاقپارات - ەگيپەت اراب رەسپۋبليكاسىنداعى ق ر ەلشىلىگىنىڭ قولداۋىمەن ءال-فارابي اتىنداعى قازاق ۇلتتىق ۋنيۆەرسيتەتى كاير ۋنيۆەرسيتەتىندە ءال-فارابي عىلىمي-ءبىلىم ورتالىعىن اشتى، دەپ حابارلاي قازاقپارات.

پرەزيدەنتتىڭ «رۋحاني جاڭعىرۋ» باعدارلاماسىن جانە «ۇلى دالانىڭ جەتى قىرى» ماقالاسىن جۇزەگە اسىرۋ اياسىنداعى ورتالىقتىڭ اشىلۋى بارىسىندا «ءال-فارابيدىڭ فيلوسوفيالىق مۇراسى» حالىقارالىق عىلىمي سەمينارى ۇيىمداستىرىلدى.

فاربي تانۋشى عالىمدار، كاير ۋنيۆەرسيتەتىنىڭ فيلوسوفتارى، قاز ۇ ۋ رەكتورى اكادەميك عالىم مۇتانوۆ، ەگيپەتتەگى ق ر ەلشىسى ارمان يساعاليەۆ شىعىستىڭ ۇلى ويشىل مۇرالارى جانە وسكەلەڭ ۇرپاقتىڭ رۋحاني-ونەگەلىك تاربيەسىندەگى ونىڭ يدەياسىنىڭ وزەكتىلىگى جايلى باياندامالار جاسادى.

قازاقستاندىق جەتەكشى جوعارى وقۋ ورنىنىڭ رەكورى ءال-فارابيدىڭ ىزگىلىكتى قوعام يدەياسىنا نەگىزدەلگەن «ىزگىلىكتى قوعام ازاماتىن قالىپتاستىرۋ. زاماناۋي ۋنيۆەرسيتەتتەر ميسسياسى» حالىقارالىق جوباسىنىڭ ب ۇ ۇ وركەنيەتتەر اليانسىمەن بىرلەسە جۇزەگە اسۋى جايلى ايتتى. ول كاير ۋنيۆەرسيتەتىندەگى ءال-فارابي ورتالىعى تەك ءال-فارابي، بەيبارىس سۇلتان مۇرالارىن عانا ەمەس، دوستاس مەملەكەتتەر اراسىنداعى ورتاق تاريحي جانە مادەني قۇندىلىقتاردى وقىتىپ، ناسيحاتتايتىن جاقسى پلاتفورما قىزمەتىن اتقاراتىنىنا سەنىم ءبىلدىردى. ەگيپەتتەگى قازاقستان ەلشىلىگىنىڭ باستاماسىمەن وسى جىلداڭ باستاپ ءال-فارابي ورتالىعى بازاسىندا ءبىرىنشى رەت كاير ۋنيۆەرسيتەتىندە قازاق ءتىلىن وقىتۋ ءپانى ەنگىزىلەدى.

ساپار اياسىندا قازاقستاندىق دەلەگاتسيا مەن باس يمام ءال-ازحار شەيح احماد ات-تايەب، جوعارى ءبىلىم جانە عىلىمي زەرتتەۋلەر ءمينيسترى حالەد ابدەل-گاففار، ەار پارلامەنتى ءبىلىم بەرۋ جانە عىلىمي زەرتتەۋلەر ىستەرى بويىنشا كوميتەت ءتوراعاسى سامي حاشيم، كاير ۋنيۆەرسيتەتىنىڭ رەكتورى موحاممەد وسمان ءال-حوشت جانە «گومحۋريا» گازەتىنىڭ باس رەداكتورى ابدەل-رازەك تاۋفيك ارالارىندا قۇرىلىمدىق ديالوگ ءوربىدى.

كەزدەۋ بارىسىندا بىرلەسە ماماندار دايارلاۋدا ءوزارا ارىپتەستىكتى نىعايتۋ، اكادەميالىق الماسۋ باعدارلاماسىن، ماگيسترانتتار مەن دوكتورانتتاردىڭ عىلىمي تاعىلىمدامالارىن جۇزەگە اسىرۋ، وقىتۋشىلار بىلىكتىلىگىن ارتتىرۋ، عىلىمي-ءبىلىم بەرۋ باعدارلامالارىن جاساۋ، فارابيتانۋ كۋرستارىن ەنگىزۋ سۇراقتارى قاراستىرىلدى. ەگيپەتتەن قاز ۇ ۋ فيليالىن اشۋ جايلى كەلىسىم ءىس-ساپاردىڭ ماڭىزدى ساتىنە اينالدى. تاراپتار 2020 -جىلى ۇلى ويشىل ءال-فارابيدىڭ 1150 جىلدىعىن وتكىزۋگە جانە دايىندىق جۇرگىزۋدە بىرلەسكەن جۇمىستار جاساۋعا دايىن ەكەندىكتەرىن جەتكىزدى.

قاز ۇ ۋ دەلەگاتسياسى قۇرامىنداعى ءتۇسىرۋ توبى قازىرگى ۋاقىتتا ءتۇسىرىلىپ جاتقان ءال-فارابي جانە بەيبارىس سۇلتان تۋرالى كوركەم فيلمدەرگە قاجەتتى ۆيدەوماتەريالدار جيناۋ ءۇشىن ەگيپەتتەگى تاريحي-مادەني نىسانداردى ارالادى.