جاپونيا تۋريستەر ءۇشىن سالىقتىڭ جاڭا ءتۇرىن ەنگىزدى

توكيو. قازاقپارات - جاپونيا ۇكىمەتى ەلگە كەلەتىن تۋريستەر ءۇشىن 7 -قاڭتاردان باستاپ سالىقتىڭ جاڭا ءتۇرىن ەنگىزدى، دەپ حابارلايدى قازاقپارات Kyodo news اگەنتتىگىنە سىلتەمە جاساپ.

وسى جىلدىڭ 7 -قاڭتارىنان باستاپ جاپونيادان تەڭىز جانە اۋە جولدارى ارقىلى شىعاتىن جولاۋشىلار 1000 يەن (9 ا ق ش دوللارى) كولەمىندە سالىق تولەيتىن بولادى.

جاپونيا ۇكىمەتىنىڭ بولجامى بويىنشا، 2020 -جىلعا قاراي ەلگە كەلەتىن تۋريستەردىڭ سانى 40 ميلليون ادامعا جەتپەك. ولاردىڭ باسىم بولىگىن قىتاي، وڭتۇستىك كورەيا، تايۆان، گونكونگتان كەلەتىن تۋريستەر قامتىماق. سونداي-اق ەۋروپدان دا كەلۋشىلەر سانى ارتپاق.

بۇل سالىقتان تەك دەپورتاتسيالاۋعا ۇشىراعان ازاماتتار، ەكى جاسقا دەيىنگى بالالار، ترانزيتتىك جولاۋشىلار، ديپلوماتتار مەن ارنايى ۇكىمەتتىك رەيستەرمەن ۇشۋشىلار بوساتىلادى.