كورەياعا باراتىن قازاقستاندىقتار نەنى ەسكەرۋى كەرەك - ق ر س ءى م

None
None
استانا. قازاقپارات - ق ر سىرتقى ىستەر مينيسترلىگى كورەياعا بارعىسى كەلەتىن قازاقستاندىقتار ءۇشىن ارنايى مالىمدەمە جاسادى، دەپ حابارلايدى قازاقپارات ءتىلشىسى اتالعان ۆەدومستۆونىڭ باسپا ءسوز قىزمەتىنە سىلتەمە جاساپ.

ق ر س ءى م مالىمەتىندە ايتىلعانداي، سوڭعى ۋاقىتتا كورەياعا بارماق بولعان قازاقستان ازاماتتارى وندا جەتە الماي قالىپ جاتىر. سەبەپ ءارتۇرلى: ءبىرى ۇشاققا مىنە المايدى، ەندىگى بىرەۋلەرى وڭتۇستىك كورەيا اۋەجايىنداعى كوشى-قون باقىلاۋىنان وتپەي قالىپ جاتادى.

وسىعان بايلانىستى سىرتقى ىستەر مينيسترلىگى ەل ازاماتتارى ءۇشىن كورەيا مەملەكەتىنە بارۋدىڭ باستى تالاپتارى مەن ەرەجەلەرىن نازاردا ۇستاۋعا شاقىرادى.

2014 -جىلدىڭ 19 -ماۋسىمىنداعى قازاقستان مەن وڭتۇستىك كورەيا ۇكىمەتى اراسىنداعى ەكىجاقتى قارىم- قاتىناستا ۆيزانى تالاپ ەتپەۋ تۋرالى كەلىسىم تالاپتارىنا سايكەس، ق ر ازاماتى ءتيىستى قۇجاتتارىمەن (شەتەلگە شىعۋ پاسپورتى) كورەيا رەسپۋبليكاسىندا 30 كۇننەن اسپايتىن ۋاقىت ىشىندە تومەندەگىدەي سەبەپتەرمەن بولا الادى:

- تۋريستىك ماقساتتا؛

- ىسكەرلىك ماقساتتا؛

- ەمدەلۋ نەمەسە ەم الۋ ماقساتىندا؛

- جەكە جۇمىستارىمەن (تۋىستارىنا، دوستارىنا نەمەسە تانىستارىنا بارۋ).

دەگەنمەن اتالعان كەلىسىم وڭتۇستىك كورەياعا مىنا ماقساتپەن بارعان ازاماتتارعا رۇقسات ەتپەيدى:

- جۇمىس ىستەۋگە؛

- وقۋعا (ءتىل ۇيرەنۋ كۋرستارى، تاعىلىمداما جانە ت. ب. )؛

- تۇراقتى ءومىر سۇرۋگە؛

- ميسسيونەرلىك ماقساتتا.

«ق ر سىرتقى ىستەر مينيسترلىگى قازاقستاننان شىعار الدىندا استاناداعى كورەيا رەسپۋبليكاسىنىڭ ەلشىلىگىندە نە بولماسا الماتىداعى اتالعان ەلدىڭ باس كونسۋلدىعى ارقىلى ءتيىستى ماقساتتاعى ۆيزانى الدىن الا راسىمدەۋدى ۇسىنادى. ولاي بولماعان جاعدايدا كورەيا رەسپۋبليكاسىنىڭ كوشى- قون بيلىگى ءوز ەلىنە جىبەرۋدەن باس تارتادى نەمەسە سول ەلدىڭ زاڭناماسىنا سايكەس دەپورتاتسيالاۋ رەجيمىن قولدانادى»، - دەلىنگەن مينيسترلىكتىڭ حابارلاماسىندا.

سونىمەن قاتار، مينيسترلىك وڭتۇستىك كورەيانىڭ كوشى-قون قىزمەتى ءوز ەلىنىڭ زاڭدارىنا سايكەس كەز-كەلگەن شەتەل ازاماتىنان ول ەلگە بارۋ سەبەبىن سۇراۋعا، ساپار ۆيزادا كورسەتىلگەن ماقساتپەن سايكەس كەلمەگەن جاعدايدا ازاماتتى ەلگە كىرگىزۋدەن باس تارتۋعا قۇقىلى ەكەندىگىن ەسكەرتەدى.

«وسىعان بايلانىستى قانداي ماقساتپەن بولۋىنا قاراماسان كورەيا رەسپۋبليكاسىنا باراتىن بارلىق ازاماتتار وزىمەن بىرگە كەرى قايتۋ بيلەتىن، قوناق ءۇيدى برونداۋدى، كوشى-قون كارتاسىندا ەلگە بارۋ ماقساتىن، تۇراتىن جەرىنىڭ مەكەنجايىن جانە سوندا شاقىرعان نەمەسە كۇتىپ الاتىن ازامات نەمەسە ۇيىم تۋرالى اقپاراتتى تولىق كورسەتۋدى سۇرايدى»، - دەپ حابارلايدى ق ر س ءى م.

ودان بولەك، اتالعان ەلگە شاقىرۋشى نەمەسە كۇتىپ الۋشى تۇلعا ءسىزدىڭ كورەيادا زاڭدى تۇردە بولۋىڭىزعا جانە ەشقانداي ءتارتىپتى بۇزباي ەلگە ورالۋىڭىزعا كەپىل بولۋى ءتيىس. ولاي بولماعان جاعدايدا وڭتۇستىك كورەيانىڭ كوشى-قون قىزمەتى ەلگە جىبەرۋدەن باس تارتاتىنى ايتىلعان. سونداي-اق، ازاماتتارعا قازاقستاننان شىقپاس بۇرىن مەديتسينالىق ساقتاندىرۋدى راسىمدەۋدى تالاپ ەتەدى. سەبەبى كورەيادا تەگىن مەديتسينالىق قىزمەت قاراستىرىلماعان.

 

سوڭعى جاڭالىقتار