سەمەيلىك ستۋدەنتتەر نە سەبەپتى كورەياعا جىبەرىلمەدى؟ - ق ر س ءى م جاۋابى

 استانا. قازاقپارات - شاكارىم اتىنداعى سەمەي مەملەكەتتىك ۋنيۆەرسيتەتىنىڭ ستۋدەنتتەرى وڭتۇستىك كورەياعا بارار جولدا كەدەرگىگە ۇشىرادى.

ولار الماتىعا جەتپ، ارى قاراي كورەياعا ۇشۋى ءتيىس بولعان. الايدا ۇشاققا مىنەر الدىندا ولاردى بورتقا جىبەرمەگەن، دەپ حابارلايدى قازاقپارات.

الەۋمەتتىك جەلى پايدالانۋشىسى ناسيما قورعانبەكوۆا فەيسبۋكتەگى پاراقشاسىندا وزىنە سەمەيلىك ستۋدەنتتەردىڭ حابارلاسىپ، جاعدايلارىن جەتكىزگەنى تۋرالى جازبا جاريالادى. جازبادا كورەياعا ءتىل ۇيرەنۋ كۋرسىنا بارا جاتقان سەمەيلىك ستۋدەنتتەردىڭ الماتىدا بورتقا وتىرعىزىلماعانى ايتىلادى. ولاردىڭ شاقىرتۋى بار، ءبىراق ۆيزالارى جوق. سەبەبى ولار وڭتۇستىك كورەيا مەن قازاقستان اراسىنداعى ۆيزاسىز رەجيم تۋرالى كەلىسىمگە سەنگەن. الايدا بۇل كەلىسىمنىڭ شارتتارىمەن تولىق تانىس بولماعان سىڭايلى. ق ر سىرتقى ىستەر مينيسترلىگى بۇل ماسەلەگە قاتىستى پىكىر ءبىلدىردى. ۆەدومستۆونىڭ باسپا ءسوز قىزمەتى جولداعان حابارلامادا سىرتقى ىستەر مينيسترلىگى بۇل جاعدايمەن تانىسقانىن، سونىمەن قاتار ماسەلە ەكى ەلدىڭ ۆيزاسىز رەجىم تۋرالى كەلىسىمىنىڭ تالاپتارىن ستۋدەنتتەردىڭ ساقتاماۋىنان تۋىنداعانىن مالىمدەگەن.

 «ستۋدەنتتەر قازاقستان رەسپۋبليكاسى مەن وڭتۇستىك كورەيا رەسپۋبليكاسى اراسىندا 2014 -جىلى كۇشىنە ەنگەن ۆيزاسىز رەجىم تۋرالى كەلىسىمىنىڭ تالاپتارىن ورىنداماعانى انىقتالدى. قۇجاتقا ساي ق ر ازاماتتارى كورەيادا 30 كۇن ۆيزاسىز بولا الادى. الايدا ولار تەك تومەندەگى ماقساتتارمەن بارعاندا عانا بۇل كەلىسىم جۇزەگە اسادى: تۋريستىك ماقساتتا، ىسكەرلىك ماقساتتا، ەم الۋ، ەمدەلۋ ماقساتىندا جانە جەكە ىستەرىمەن بارعان جاعدايدا (تۋىستارىنا، دوستارىنا قىدىرىپ بارۋ) . ال جۇمىسقا تۇرۋ، ءبىلىم الۋ ءۇشىن بارعاندار، كوشىپ بارعاندار جانە ميسسيونەرلىك ماقساتتا بارعان ادامدار بۇل كەلىسىمدى پايدالانا المايدى» دەلىنگەن حابارلامادا.

مينيسترلىك ستۋدەنتتەر بۇل ساپارعا شىعار الدىندا استاناداعى وڭتۇستىك كورەيا رەسپۋبليكاسى ەلشىلىگىندە نەمەسە الماتىداعى باس كونسۋلدىعىندا ءتيىستى كاتەگورياداعى ۆيزانى راسىمدەپ الۋى كەرەك بولعانىن مالىمدەيدى. بۇعان دەيىن وڭتۇستىك كورەيادا 12 مىڭ قازاقستاندىقتىڭ زاڭسىز جۇرگەنىن حابارلاعان بولاتىنبىز. بۇل ازاماتتار 31 - ناۋرىزعا دەيىن ەلگە ەشبىر كەدەرگىسىز ورالا الادى. ايتا كەتەيىك، وتكەن جىلى دا كورەياعا وقۋعا بارعان قازاقستاندىقتار دەپورتاتسياعا ۇشىراعان بولاتىن.