قاتتى وكىنەمىن: دەنيس تەن سوڭعى رەت تاماقتانعان مەيرامحانانىڭ يەسى قايعىلى وقيعادان بۇرىن نە بولعانىن ايتىپ بەردى

None
None
الماتى. قازاقپارات - دەنيس تەننىڭ ءولىمى بويىنشا ءوتىپ جاتقان سوت وتىرىسى بارىسىندا دەنيستىڭ سىنىپتاسى رۋسلان حايرۋللايەۆ جاۋاپ بەردى، دەپ حابارلايدى قازاقپارات ءتىلشىسى سوت زالىنان.

رۋسلان دەنيس تەنمەن سوڭعى رەت «گەدونيست» مەيرامحاناسىندا بىرگە تۇسكى اس ىشكەن.

«مەن ونى تۇسكى اسقا شاقىردىم. 18 -ماۋسىمدا پانفيلوۆ كوشەسىمەن كەلە جاتقاندا دەنيستى كورگەنمىن. سوسىن ەكەۋمىز سويلەستىك. ول كافە سەكىلدى بيزنەس اشقىسى كەلگەنىن ايتتى. كەلەسى كۇنى مەن وعان كەلە الاسىڭ با دەپ جازدىم. ول 15 مينۋتتا كەلەمىن دەدى. مەن اسپازدارعا دامدىرەك تاماق دايىنداۋدى تاپسىردىم. سوسىن دەنيس، ماركەتولوگ مادينا، ءالجان ەسىمدى سەرىكتەسىم تورتەۋىمىز كوڭىلدى وتىردىق. سوڭىندا دەنيس بارىمىزبەن قوشتاسىپ شىعىپ كەتتى. 10 مينۋتتان سوڭ ەدەن جۋاتىن ايەل بىرەۋدى پىشاقتاپ كەتتى دەپ ۇرەيلەنىپ كەلدى. مەن قىزمەتكەرلەر توبەلەسكەن شىعار دەپ ويلادىم. ءبارىمىز دالاعا جۇگىرىپ شىقتىق. سوسىن مەن مىنا سۇمدىقتى كوردىم»، - دەدى حايرۋللايەۆ.

كۋاگەردىڭ ايتۋىنشا، دەنيس جاتقان جەردە قان وتە كوپ بولعان. ونىڭ قاسىندا اسپاز، بارمەن، قىزىل كويلەكتەگى قىز، ەكى پوليتسيا قىزمەتكەرى بولدى.

«مەن جەدەل جاردەممەن بىرگە بارماعان سەبەبىم بار. ماعان پوليتسيا وقيعا ورنىندا قالىپ، كامەرالاردى تەكسەرۋدى تاپسىردى»، دەدى ول.

وتىرىس بارىسىندا دەنيستىڭ اناسى وكسانا تەن سىنىپتاسىنان دەنيستى نە ءۇشىن شاقىرعانىن ءتۇسىندىرۋدى سۇرادى.

«مەنىڭ بەلگىلى ءبىر ماقساتىم بولعان جوق. مەن تەك تاربيەم سولاي بولعاسىن شىعار، ونى تاماققا شاقىرعىم كەلدى. وسى ۋاقىتقا دەيىن شىعارىپ سالماعانىما وكىنەمىن. دەنيس ەسىنەن تانىپ جاتتى. مەن ونى جەدەل جاردەمگە مىنگىزەر كەزدە دارىگەرلەردىڭ دەنيسكە ءبىر ءدارى ەككەنىن كوردىم. ودان سوڭ ول دەمالعانداي بولدى. سوندىقتان، مەن ونى ولەدى دەپ ويلامادىم»، - دەدى ول.

سونىمەن قاتار، سوت وتىرىسىندا مەيرامحانا قىزمەتكەرلەرى بارمەن، ماركەتولوگ ماماندارىنان سۇراق-جاۋاپ الىندى.

سوت الدىندا ءۇش ادام جاۋاپ بەرۋدە. ولار - ق ر ق ك 434-بابى، ق ر ق ك 24-بابىنىڭ 3- ءبولىمى، 188-بابىنىڭ 2- ءبولىمىنىڭ 1- تارماعى بويىنشا ايىپتالعان جانار تولىبايەۆا، ق ر ق ك 188-بابىنىڭ 2- ءبولىمىنىڭ 1 تارماعى، ق ر ق ك 99-بابىنىڭ 2-بولىمىمەن، 192-بابىنىڭ 2-بولىمىمەن قىلمىستىق جاۋاپكەرشىلىككە تارتىلىپ وتىرعان ارمان قۇدايبەرگەنوۆ، ق ر ق ك 99-بابىنىڭ 2-بولىمىمەن، 192-بابىنىڭ 2-بولىمىمەن قىلمىستىق جاۋاپكەرشىلىككە تارتىلىپ وتىرعان نۇرالى قياسوۆ. قىلمىستىق ءىس 38 تومنان تۇرادى.

ەسكە سالساق، دەنيس تەندى بيىل 19 -شىلدەدە الماتى قالاسىندا بەلگىسىز بىرەۋلەر پىشاقتاپ كەتكەن ەدى. اۋىر حالدە اۋرۋحاناعا جەتكىزىلگەن سپورتشى كوز جۇمعان بولاتىن.

دەنيس تەننىڭ ولىمىنە قاتىستى قىلمىستىق ءىس قوزعالىپ، كۇدىكتىلەر ىزدەستىرىلدى. ەلباسى دەنيس تەنگە قاتىستى قىلمىستى مۇقيات تەكسەرۋدى تاپسىردى. كەيىن ق ر ءى ءى م كۇدىكتىلەردىڭ ۇستالعانىن جاريا ەتتى.

سوڭعى جاڭالىقتار