پارا العان بىرنەشە لاۋازىمدى قىزمەتكەر قاماۋعا الىندى

استانا. قازاقپارات - تۇركىستان وبلىسى بويىنشا مەملەكەتتىك كىرىستەر دەپارتامەنتىنىڭ لاۋازىمدى قىزمەتكەرى پارا الدى دەگەن كۇدىككە ءىلىندى.

بۇل تۋرالى بۇگىن استانادا وتكەن باسپا ءسوز ءماسليحاتىندا ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ قوعاممەن بايلانىس جونىندەگى دەپارتامەنتىنىڭ ديرەكتورى ارمان بەردالين ءمالىم ەتتى، دەپ حابارلايدى قازاقپارات ءتىلشىسى.

«سىبايلاس جەمقورلىققا قارسى ءىس- قيمىل ۇلتتىق بيۋروسىنىڭ تۇركىستان وبلىسى بويىنشا دەپارتامەنتى تۇركىستان وبلىسى بويىنشا مەملەكەتتىك كىرىستەر دەپارتامەنتىنىڭ كامەرالدىق تەكسەرۋ ءبولىمىنىڭ باس مامانىنا سىبايلاس جەمقورلىق قىلمىسىن جاسادى دەگەن كۇدىك كەلتىرۋدە. ول 2018 -جىلدىڭ 18 -جەلتوقسانىندا سىرتقى ەكونوميكالىق قىزمەتتىڭ قاتىسۋشىسىنا كەدەرگىسىز كامەرالدىق كەدەندىك تەكسەرۋ جانە ونىڭ كاسىپكەرلىك قىزمەتىنە جالپى قامقورلىعى ءۇشىن 1 ميلليون تەڭگە سوماسىندا پارا الۋدا كۇدىكتى دەپ تانىلاۋدا. سوتقا دەيىنگى تەرگەۋ امالدارى جۇرگىزىلىپ جاتىر»، - دەدى ارمان بەردالين.

ونىڭ ايتۋىنشا، سونىمەن بىرگە تابيعي مونوپوليالاردى رەتتەۋ، باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتىنىڭ قاراعاندى وبلىستىق دەپارتامەنتى باسشىسىنىڭ ورىنباسارى ۇستالدى.

«سىبايلاس جەمقورلىققا قارسى ءىس قيمىل ۇلتتىق بيۋروسىنىڭ قاراعاندى وبلىسى بويىنشا دەپارتامەنتى تابيعي مونوپوليالاردى رەتتەۋ باسەكەلەستىكتى جانە تۇتىنۋشىلاردىڭ قۇقىقتارىن قورعاۋ كوميتەتىنىڭ وبلىستىق دەپارتامەنتى باسشىسىنىڭ ورىنباسارى لاۋازىمدىق وكىلەتتىكتەرىن تەرىس پايدالانعانىن انىقتادى. سوت سانكتسياسىمەن ول قاماۋعا الدىندى. سوتقا دەيىنگى تەرگەۋ جۇرگىزىلۋدە»، - دەدى ول.

سونىمەن بىرگە، ارمان بەردالين بيۋدجەت قاراجاتىن جىمقىردى دەگەن كۇدىكپەن اتىراۋ وبلىستىق ءبىلىم بەرۋ باسقارماسىنىڭ باسشىسى، ونىڭ ورىنباسارى جانە ۆەدومستۆوعا باعىنىشتى ۇيىمنىڭ باس بۋحگالتەرى ۇستالعانىن حابارلادى. سوتقا دەيىنگى تەرگەۋ امالدارى باستالدى.

ەسكە سالا كەتسەك، بۇعان دەيىن اتىراۋ وبلىسى اكىمىنىڭ ءبىرىنشى ورىنباسارى سەرىك شاپكەنوۆ ءبىلىم بەرۋ باسقارماسى باسشىسىنىڭ ۇستالۋىنا بايلانىستى تۇسىنىك بەرگەن بولاتىن.