قارقارالىدا قىسقى تۋريزمدى دامىتۋ قولعا الىندى
وسىعان وراي، كاسىپ اشامىن دەگەن ازاماتتارعا ۇلتتىق تابيعات پاركى ۇزاق جانە قىسقا مەرزىمگە جالعا جەر بەرىپ جاتىر. باستاما جامان ەمەس. العاشقى اشىلعان شاڭعى تەبۋ الاڭى قازىر ءساتتى جۇمىس ىستەپ تۇر.
دۋمان بەيسەنايەۆ شاڭعىدان اۋەسقويلار اراسىندا حالىقارالىق جارىستارعا قاتىسىپ، تالاي مارتە جۇلدەلى بولعان. جانىنا جاقىن كاسىپتى تابىس كوزىنە اينالدىرۋ ءۇشىن جۋىردا ول قارقارالى مەملەكەتتىك ۇلتتىق تابيعات پاركىنەن 5 جىلعا جالعا جەر الىپ، شاڭعى بازاسىن اشتى. مۇندا تۋريستەر مەن جەرگىلىكتى تۇرعىندار كەز كەلگەن ۋاقىتتا كەلىپ، تىنىعا الادى. ال كەلەشەكتە جاس كاسىپكەر بۇل الاڭدا ۇلكەن شاڭعى جارىستارىن ۇيىمداستىرۋدى جوسپارلاپ وتىر.
«ادامدار بەلسەندى كەلىپ جاتىر. قىسقى تۋريزم وتە جاقسى. اسەم تابيعاتتىڭ اياسىندا شاڭعىمەن جۇگىرۋ، تاۋدان سىرعاناۋ پايدالى. كەلەشەكتە جەردى ۇزاق مەرزىمگە الامىز دەگەن ويىمىز بار. بۇل باستاماسى. بۇل جەر ۇلكەن شاڭعى بازاسىنا اينالادى. شاڭعى تراسساسىنا جارىق وتكىزىلەدى»، - دەيدى كاسىپكەر دۋمان بەيسەنايەۆ.
قارقارالى مەملەكەتتىك ۇلتتىق تابيعات پاركىنە قاراستى 112 مىڭ گەكتاردان استام جەر بولسا، سونىڭ 21 مىڭ گەكتارى تۋريستىك ماقساتتا پايدالانىلىپ وتىر. وسى جىلى 25 جەر ۋچاسكەسى جالعا بەرىلگەن. وندا سالىنعان نىساندار ءساتتى جۇمىس ىستەپ تۇر. مۇنداعى اسەم تابيعاتتى تاماشالاۋ ءۇشىن تۋريستەر نەگىزىنەن جازدا كوپتەپ كەلەدى.
«ولكەدە قىسقى تۋريزمدى دامىتسا، جىل ون ەكى اي ۇزبەي جۇمىس ىستەۋگە بولادى»، - دەيدى ماماندار.
«كوبىنە جازعى مەزگىلدە ادام سانى كوپ بولادى. قىسقى مەزگىلدە بىزدە ارنايى تۇرعىدا تۋريستىك مارشرۋت جوق، سوندىقتان جەر پايدالانۋشىلار جۇمىس ىستەيدى. شامامەن ايتىپ كەتەيىن، بيىلعى جىلى بىزدە 35 مىڭ ادام باقىلاۋ پۋنكتەرىندە تىركەلگەن. سونىڭ 10 مىڭدايى وسى قىسقى مەرزىمدە كەلگەن تۋريستەر. شەتەلدەن دە قوناقتار بولىپ جاتادى»، - دەپ اتاپ ءوتتى قارقارالى مەملەكەتتىك ۇلتتىق تابيعات پاركىنىڭ مامانى نازگۇل جۇماشيەۆا.
تاۋلى ايماققا تىنىعىپ كەلۋشىلەر ءۇشىن زاماناۋي دەمالىس ورىندارى دا جەتكىلىكتى. قازىردىڭ وزىندە 27 نىسان جۇمىس ىستەپ تۇر. ال بيىل تاعى 2 تۋريستىك كەشەن سالىنعان.