بۇگىننەن باستاپ سىر وڭىرىندە ۋاقىت بەلدەۋى ءبىر ساعات كەيىنگە شەگەرىلەدى
بۇل شارا جەلتوقساننىڭ 20-سىنان 21-ىنە قاراعان ءتۇنى ساعات 00:00-دەن جۇرگىزىلەدى، دەپ حابارلايدى قازاقپارات ءتىلشىسى وڭىرلىك كوممۋنيكاتسيالار قىزمەتىنە سىلتەمە جاساپ.
«سىر وڭىرىندە تابيعي بيولوگيالىق ۋاقىتتان اۋىتقۋشىلىق ماسەلەسى سوڭعى 10 جىل بەدەرىندە ءجيى كوتەرىلىپ كەلدى. ءتۇرلى عىلىمي- زەرتتەۋ ينستيتۋتتارى دا ءومىر ءسۇرۋ ءريتمىنىڭ بۇزىلۋى تۇرعىنداردىڭ دەنساۋلىعىنا تەرىس اسەر ەتەتىنىن راستادى. وبلىستا ۋاقىتتى وزگەرتۋگە بايلانىستى تۇرعىندار اراسىندا ارنايى ساۋالناما جۇرگىزىلىپ، وعان قاتىسۋشىلاردىڭ 70 پروتسەنتى ۋاقىت بەلدەۋىن وزگەرتۋ قاجەت دەگەن پىكىر بىلدىرگەن. بايقوڭىر قالاسىنىڭ ۋاقىتى دا قىزىلوردا وبلىسىمەن بىرگە ءتورتىنشى ساعاتتىق بەلدەۋگە سايكەستەندىرىلەدى»، - دەدى قىزىلوردا وبلىسى اكىمىنىڭ ورىنباسارى رۋسلان رۇستەموۆ.
وبلىس اكىمدىگىنىڭ رەسمي پاراقشاسىندا وبلىس اكىمىنىڭ ساعات بەلدەۋى تۋرالى ەكى تىلدە مالىمدەمەسى جاريالاندى. سونداي- اق، وبلىستىق، قالالىق، اۋداندىق باسىلىمداردا قاۋلىنىڭ تولىق ءماتىنى جارىق كوردى. جەرگىلىكتى تەلەارنالاردا ارنايى بەينەروليكتەر ازىرلەندى. ايتا كەتەر جايت، قالا مەكتەپتەرىندە ساباقتىڭ باستالۋ ۋاقىتى وزگەرتىلمەيدى.
بۇگىن قىزىلوردا قالاسىنداعى ورتالىق الاڭدا اتالمىش ۋاقىت بەلدەۋىن وزگەرتۋگە بايلانىستى ارنايى شارا وتكىزىلەدى دەپ جوسپارلانىپ وتىر.
بۇدان بۇرىن قىزىلوردا وبلىسىنىڭ اكىمى قىرىمبەك كوشەربايەۆ سىر وڭىرىندە ۋاقىت بەلدەۋىن شەگەرۋگە قاتىستى مالىمدەمە جاساعان ەدى.