قولدانىستاعى ۇيعىر جازۋىن لاتىنعا كوشىرۋ كەرەك- دەپۋتات

استانا. قازاقپارات - قازاقستان حالقى اسسامبلەياسىنان سايلانعان ءماجىلىس دەپۋتاتى شايماردان نۇرىموۆ قولدانىسىنداعى ۇيعىر جازۋىن لاتىن گرافيكاسىنا كوشىرۋ قاجەتتىگىن ايتتى.

 وسى ورايدا، ق ر پرەمەر- ءمينيسترى باقىتجان ساعىنتايەۆتىڭ اتىنا ءتيىستى دەپۋتاتتىق ساۋال جولداندى، دەپ حابارلايدى قازاقپارات.

 «قازاقستاندىق ۇيعىرلار قاۋىمداستىعى مەملەكەتتىك قازاق ءتىلىن لاتىن الفاۆيتىنە كوشىرۋ يدەياسىنىڭ ماڭىزدى ءارى زامانعا ساي ەكەنىن ەسكەرىپ، اتالعان باستاماعا قىزۋ قولداۋ ءبىلدىردى. مەملەكەتتىك ءتىلدى لاتىن الىپبيىنە كوشىرۋ كەزىندە قازاقستانداعى ۇيعىرلاردىڭ قولدانىسىنداعى ۇيعىر جازۋىن دا لاتىن گرافيكاسىنا ءبىر مەزگىلدە كوشىرۋ قاجەت دەپ شەشتى. سەبەبى، ءدىنىمىز ءبىر، ءتىلىمىز دە ءبىر، ءبىزدىڭ جازۋىمىز دا ورتاق بولعانىن، ءبىر- ءبىرىمىزدى ەركىن وقي العانىمىزدى قالايتىنىن ءبىلدىردى»، - دەدى ش. نۇرىموۆ ءماجىلىستىڭ جالپى وتىرىسىندا.

ونىڭ سوزىنە قاراعاندا، 2017 -جىلدىڭ قازان ايىندا قازاقستان ۇيعىرلارىنىڭ رەسپۋبليكالىق ەتنومادەني ورتالىعى جانىنان ۇيعىر جازۋىنىڭ لاتىن ءالىپبيىن جاساۋ بويىنشا ارنايى كوميسسيا قۇرىلدى. كوميسسيا قۇرامىندا ر. سۇلەيمەنوۆ اتىنداعى شىعىس تانۋ ينستيتۋتىنىڭ جانىنداعى ۇيعىر تانۋ ورتالىعىنىڭ ماماندارى، الماتى قالاسى مەن الماتى وبلىسىندا ۇيعىر تىلىندە ءبىلىم بەرەتىن مەكتەپ مۇعالىمدەرى، «ۇيعىر اۆازي» گازەتىنىڭ ماماندارى، عالىمدار، قوعام قايراتكەرلەرى، زيالى قاۋىم وكىلدەرى، جۋرناليستەر، شەتەلدەگى ۇيعىر قاۋىمداستىقتارىنىڭ وكىلدەرى باس قوسىپ، ۇيعىر ءتىلىنىڭ لاتىن ءالىپبيىنىڭ ماسەلەسى تالقىلاندى. ناتيجەسىندە، ۇسىنىلعان جوبالاردىڭ ىشىنەن بەس نۇسقاسى تاڭدالىپ الىندى.

«بۇل جوبالار قوعامنىڭ ءتۇرلى سالالارىندا سىناقتاردان وتكىزىلدى. عىلىمي ۇيىمداردا وتكەن ساراپتامالار، اقپاراتتىق تەحنولوگيا ماماندارىنىڭ زەرتتەۋ جۇمىستارىنىڭ ناتيجەسىندە، وسى جىلدىڭ 12 - مامىرىندا وتكەن كوميسسيا وتىرىسىندا قازاقستانداعى ۇيعىر ءتىلىنىڭ قازاق تىلىندەگى لاتىن الىپبيىنە بەيىمدەلگەن نۇسقاسى بەكىتىلدى. قازاق لاتىن گرافيكاسى نەگىزىندە بەكىتىلگەن ۇيعىر لاتىن جازۋى ۇيعىر ءتىلىنىڭ بارلىق فوندىق- گرامماتيكالىق جۇيەسىنىڭ ەرەكشەلىگىنە جانە تالابىنا ساي كەلەتىندىكتەن، جالپى حالىقارالىق ۇيعىر قاۋىمداستىعىنىڭ ۇيعىرتانۋشى ماماندارىنىڭ ۇسىنعان نۇسقالارىن ەسكەرەتىندىكتەن، ءبىز بۇل نۇسقانى تەك قازاقستاننىڭ ۇيعىرلارى عانا ەمەس، ونىڭ ىشىندە بارلىق ۇيعىر قاۋىمداستىعى دا قابىلدايدى دەپ سەنەمىز»، - دەدى دەپۋتات.

وسى ورايدا، ش. نۇرىموۆ مەملەكەتتىك ءتىلدى لاتىن الفاۆيتىنە وتكىزۋ بارىسىندا قازاقستانداعى ۇيعىر ءتىلىن دە لاتىن گرافيكاسىنا وتكىزۋدى مەملەكەتتىك تىلمەن بىرگە جۇزەگە اسىرۋ كەرەكتىگىن اتاپ ءوتتى.

اۆتور: رۋسلان عابباسوۆ