قازاقستانىق عالىمدار دارۋمەندەرگە باي ۇن ءتۇرى شىعارۋدى قولعا الماق
وتاندىق ءونىم دارۋمەندەرگە باي، سونداي- اق قانت ديابەتىمەن اۋىراتىن ادامدار ءۇشىن پايدالى بولماق. بۇگىندە كراحمال جانە قۇرعاق كىلەگەي ەكسپورت نارىعىندا جوعارى سۇرانىسقا يە. سول سەبەپتى ەلىمىزدە بيدايدى تەرەڭ وڭدەۋگە ەرەكشە نازار اۋدارىلادى. وسى باعىتتا بىرنەشە كاسىپورىندار جۇمىس ىستەيدى.
قازاق اۋىل شارۋاشىلىعى ونىمدەرىن قايتا وڭدەۋ عىلىمي- زەرتتەۋ ينستيتۋتىنىڭ ماماندارى بۇگىندە باسقا دا استىق تۇرلەرىن وڭدەپ جاتىر. ونىڭ ىشىندە ادام دەنساۋلىعىنا پايداسى زور ۇننىڭ جاڭا ءتۇرىن شىعارۋدى ۇسىنىپ وتىر.
مارجان قيزاتوۆا، اعا عىلىمي قىزمەتكەر:
- قازىرگى نارىقتى باعالاي جانە سالىستىرا كەلە، ارنايلاندىرىلعان ۇننىڭ جوقتىعىن ءبىز بايقادىق. وسىعان بايلانىستى قانت ديابەتىمەن، ينسۋلين تاپشىلىعىمەن اۋىراتىن ادامدارعا ارنايلاندىرىلعان ۇندى دايىنداۋعا كىرىستىك.
عىلىمي قىزمەتكەر مارجان قيزاتوۆا ايتىپ وتىرعان ۇن جاسىمىق، نۇقات، بۇرشاق جانە ۇرمەبۇرشاقتان جاسالادى. ولاردىڭ قۇرامى اقۋىزعا وتە باي. ەل نامىسىن ءتۇرلى دودالاردا قورعاپ جۇرگەن سپورتشىلار مەن قانت ديابەتىنە شالدىققان ادامدار ءۇشىن وسىنداي ۇننان جاسالعان ونىمدەردىڭ پايداسى مول دەيدى مامان.
جانار چاكانوۆا، وسىمدىك شيكىزاتىن باستاپقى وڭدەۋ لابوراتورياسىنىڭ جەتەكشىسى:
- وڭدەلگەن ۇندا پايدالى دارۋمەندەر وتە كوپ. ياعني، ۇن ونىمدەرىنىڭ اقۋىز جانە تاعامدىق قۇندىلىعى جوعارى. مۇنداي استىق تۇرلەرىنەن جاسالعان ۇن قازىر ەلىمىزگە شەتەلدەن جەتكىزىلەدى. تيىسىنشە، باعاسى دا ارزان ەمەس. ءبىزدىڭ جوبا ارقىلى تۇتىنۋشىلارعا ساپالى، مينەرالدىق زاتتارعا باي ءارى قولجەتىمدى ونىمدەردى ۇسىنا الامىز. زەرتتەۋ جۇمىستارىنىڭ باستالعانىنا ءبىر جىل بولدى. وسى ارالىقتا 4 استىق تۇرىنەن 8 جارما ءتۇرى الىندى.
ماماندار ءالى شامامەن 2 جىل بويى زەرتتەۋ جۇرگىزۋ قاجەت دەيدى. سودان كەيىن جوبا قورىتىندىسى كاسىپورىندارعا تانىستىرىلىپ، جۇزەگە اسىرىلادى.
www.24.kz