بيودوربالاردى قولدانۋعا قازاقستاندىقتار قانشالىقتى دايىن؟

استانا. قازاقپارات - قازاقستاندىقتار دا جىلىنا ميلليونداعان دانا پوليەتيلەن دورباسىن قولدانىپ، پايداعا جاراعان سوڭ قوقىسقا لاقتىرادى. الايدا ونىڭ جويىلىپ كەتۋى ۇزاق.

  كەيبىرى كەمى 100 جىل، ال ەندى ءبىرى ءتىپتى 5 عاسىردان سوڭ عانا ءشىرىپ، جوق بولادى. مۇنان ەكولوگيا لاستانباي قايتسىن؟! سوندىقتان قازىر ءبىزدىڭ ەلدە دە بيودوربالاردى شىعارۋعا ەرەكشە ماڭىز بەرىلىپ وتىر. الايدا، وعان قازاقستاندىقتار قانشالىقتى دايىن؟ ەكولوگتار بۇل تۇرعىدا نە دەيدى؟

پوليەتيلەن دوربالاردىڭ ەكولوگياعا زيان ەكەنى الدەقاشان دالەلدەنىپ قويعان. ورنىنا بيوقالتالاردى قولدانۋ كەرەكتىگى دە ايتىلىپ ءجۇر. ءتىپتى ەلوردادا بيودوربا شىعاراتىن ارنايى كومپانيا دا جۇمىس ىستەيدى.

 باتىرحان جۇمانوۆ، كومپانيا ديرەكتورى:

- لاقتىرىپ تاستاعان پلاستيك پاكەت 500 جىلعا دەيىن شىرىمەي، جويىلماۋى مۇمكىن. بۇل قورشاعان ورتاعا قاۋىپتى. ال، ءبىزدىڭ ونىمدەر كەيىن تىڭايتقىش بولىپ، پايداعا جاراي بەرەدى. وندىرىسكە شيكىزات يسپانيادان اكەلىنەدى.

بيودوربالاردى شىعارۋ تەحنيكالىق تۇرعىدان قيىن. تانىستىرىپ وتەيىك. الدىمەن تۇيىرشىكتەردى ارنايى بوشكەلەردە ەزەدى. كەيىن ول پلەنكاعا اينالىپ، ورالادى. سوسىن بويالادى دا، كەسىلەدى.

ميراس ابباسوۆ كومپانيانىڭ تەحنيكالىق ديرەكتورى:

 - مىنا اپپارات ءبىر مينۋتتا 240 پاكەت شىعارا الادى. بۇل ءبىر جۇمىس كەستەسىندە  12000، ايىنا   5000000 دوربا دايىندالادى دەگەن ءسوز. ءتۇرلى كولەمدە شىعارامىز. ەكولوگياعا زيانسىز بيوپاكەتتەردى ازىرگە استانا مەن الماتىنىڭ ءىرى ساۋدا ورىندارىنان عانا تابۋعا بولادى.

 كومپانيا باسشىلىعى ەندى نارىقتى كەڭەيتپەك نيەتتە. دەسە دە، ەكولوگتار جۋىق ارادا پوليەتيلەن قالتالاردان قوعامنىڭ باس تارتۋى ەكىتالاي دەپ وتىر. سەبەبى، بيودوربانىڭ قۇنى قىمبات. ەكىنشىدەن، ىشىندەگى زات كورىنبەيدى.

 مۇساعالي دۋانبەك، ەكولوگ:

- تەگىن تاراتىلىپ جاتقان پوليەتيلەن پاكەتى مەن ۋداي قىمبات تۇراتىن قاعازدى ەكەۋىن ءبىر- بىرىنە الماستىرۋ ونى بۇگىنگى كۇنى تۇتىنۋشىلار دا، ۇلكەن سۋپەرماركەتتىڭ قوجايىندارى دا وعان دايىن ەمەس. پوليەتيلەن پاكەتتىڭ ىشىنە نە سالىنعانىن ءبىز كورە الامىز. ال ول قاعازعا سالىنعاسىن ءبىز ونى جىرتىپ كورۋىمىز كەرەك. الدە ءبىزدىڭ كوزىمىزشە سالۋى كەرەك. ول سۋپەرماركەت ءۇشىن قوسىمشا جۇمىس. ءبىر جاعىنان. ەكىنشى جاعىنان قاعاز قالتاعا كوشۋ تابيعات ءۇشىن قاۋىپتى. سەبەبى، ەلىمىزدىڭ تەك %3-اق- ى ورمان.

 «ەگەر، جاپپاي بيودورباعا كوشەمىز دەسەك، اعاشتاردى كەسۋگە تۋرا كەلەدى»، - دەيدى ساراپشى. بىلاي تارتساڭ، اربا سىنادى، بىلاي تارتسا، وگىز ولەدى. باستىسى، ەكولوگيانى لاستاماۋ ماڭىزدى بولىپ تۇر عوي. سەبەبى، ءار تۇرعىن جىلىنا شامامەن 300 پاكەت قولدانادى. مىنە، ماسەلە قايدا؟ ! ودان سوڭ جاعىپ جىبەرسە، ءجون عوي! اينالاعا لاقتىرماي. مۇنى ەندى ادامدىق ءھام ازاماتتىق اردىڭ تارازىسىنا قالدىرايىق!

www.24.kz